Read Tobelo O TAWARIKH MADODIHIRAKA 29 Bible Online

O TAWARIKH MADODIHIRAKA 29 - Tobelo bible

O TAWARIKH MADODIHIRAKA 29

¹ Daha wotemo ma Koano Daud o nyawa mata-mataika imato toomuino genangoka, ”Mata-mata ahingohaka o naurino, o Salomo wïiriki ma Jou Madutu. Mä ünanga duru kawomagöikahi de i kurangohi aidibanga, enahioko o manarama nënanga duru i lamoko. Ikali aha ihigögoko-goko gënanga mangale o nyawaua makadato, mä mangale ma Jou Madutu Ai Tau.

²Mapakakaha mangale o tau gënanga ikali makiahonanga tabötoka de hagala ahidagakunu. Ngohi tasadiaka o gurasi, o haaka, o tabaga, o behi, o gota, o helewo dema ija-ijaka de o intan mahelewo, o helewo-helewo marupa irupa-irupaka mangale o poromu-o poromu de duru kohangöe o pualam mahelewo.

³Igoungu karana toigo ahi Jou Madutu Ai Tauika gënanga ngohi tohilapahiokaö o haaka de o gurasi ahiarataino tongohi madutu mahirete:

⁴o gurasi maoa-oa o ton o 100 iholoi, de o haaka madutu o ton o 240 iholoiua mangale ihilape ma Jou Ai Tau mabebeno, de mangale o bara-baranga kiani yamanarama o tuka-tukanga duru yanönako-nako. Aa, öraha nënanga o nagonali yomau ihidöaka manga huhuba-huhuba ma Jouika de manga hininga isösanangi?”

⁶Daha o ahali mabalu-baluhu, o hoana mabalu-baluhu, o tentara manga balu-baluhu de yatagongo hagala moi-moi toma koano madutu aiarata ihinyata onangö yoigo yoriwo.

⁷Daha onangö ihidöaka enanenangohioli mangale ma Jou Ai Tau ihigoko gënanga: o gurasi o ton o 170 iholoi, o haaka o ton 340 iholoi, o tabaga ngade o ton 620, deʼ o behi o ton 3.400 iholoi.

⁸Hagala o nyawa toönanga manga intan ma helewo ihilapahi o Yehielika mangale wonoa ma Jou Ai Tau makas magoronaika. (O Yehiel ganga o Lewi manyawa womatengo o Gerson ai ahalino.)

⁹O kawaha ihi döaka de manga hininga mangigo ma Jouika de önanga yomorene karana mangöeoka önanga ihihuba. Ma Koano Daudö duru womorene.

¹⁰O nyawa yowöe-wöe manga himangoka gënanga ma Koano Daud wihigiriri ma Jou. Unanga wato, ”Ya Jou Madutu wonihö huba-huba o Yakub tongomi miaete de miatohora, o higiriri Ngona mangale kahi ado-adonika!

¹¹ Ngona igoungu nolamoko, de nokuaha. Ngona nomulia, noutumu de nokurutil̄e. Hagala moi-moi o dihangoka de o duniaka ganga kato Ngona. Ngona o koano nomomulia, nakuaha hagala mata-mata.

¹²Mata-mata o kaya de mata-mata demaenangoka maahali Ngonaino; hagala moi-moi Ngona nakuaha de o kuata de Ani kuaha ikokurutil̄e; Ngona nokuaha Nädiai o nagona dika yodadi o nyawa yoago-agomo de yokuata.

¹³Oraha nënanga, ya mia Jou Madutu, ngomi mitemo sukur Ngonaika, de ngomi mihigiriri Ani romanga imomulia.

¹⁴Ngohi de ahikawaha nënanga igou-goungu miakunua mihidöaka okianaga Ngonaika, karana hagala mata-mata ganga Ani ngongike, de okia ngomi mihidöaka nënanga gangö kato Ngona.

¹⁵Ngona nohi öriki, ya Jou, hokä tongomi mia totohora, ngomiö miodagi o wowango nënanga hokä yoboa-boaino de o nyawa maporetino. Tongomi miawowango hokä o gurumini aha i hihanga de ngomi miakunua mimahirehene de o honenge.

¹⁶Ya Jou, tongomi mia Jou Madutu, okia honanga dema ija-ijaka mata-mata nënanga ngomi miatoomu nenangoka mangale mihigoko moi o tau mangale Ngona hupaya ngomi yakunu miahoromati Ani romanga itötebi-tebini. Mä mata-mata gënanga ngomi miatarima Ngonaino mahirete de ganga kato Ngonaö madutu.

¹⁷Ngohi tohi öriki Ngona nauji o nyawa moi-moi manga hininga de ngona näigo o nyawa manga hininga idödodono. De ahihininga magoungu de ahi hininga isosanangi tohihuba mata-mata nënanga Ngonaika. Ngohi tahakihioka sakaria Ani umati imatotoomuino nenangoka önanga yao manga huhuba Ngonaika de manga hininga isosanangi.

¹⁸Ya Jou Madutu, inihö huba-huba o Abraham, o Ishak deʼ o Yakub, tongomi miaete de miatohora, tanu Ngona nägoana hupaya Ani umati kahirahi inihininga hokä oraha nënanga de nariwo hupaya önanga hoko genangika yosetia Ngonaika.

¹⁹Nihidöaka o Salomoika, ahingohaka o nauru, o igo magou-goungu mangale wamoteke mata-mata Anipareta de mangale wohigoko o puji matau gënanga tohidiai taböbotoka.”

²⁰Womaniata iböto hoko genanga, o Daud wätemo o nyawa yowoe-woeika imatotoomuino genangoka, ”Niwihigiriri ma Jou Madutu!” Daha mata-mata o nyawa gënanga iwihigogiriri ma Jou, ma Jou Madutu iwihohuba-huba toönanga manga ete de manga tohora. Daha önanga yatilabukuku mangale iwihoromati ma Jou de ma koano.

²¹Mawange yaino önanga yotoaka o aiwani mangale ihihuba hokä o huhuba ma Jouika, daha yahikodoku o kawahaika yongodumu. Mahomoa gënanga naga o hapi manauru o 1.000, o duba ma nuaru o 1.000 deʼ o duba magö o 1.000 yatoaka de yatuhuku ihidagahumika o huba mangï mal̄okuoka. Onanga ihihuba o anggur yahipo patu-patutu mangale o huhuba-o huhuba gënanga.

²²O wange gënanga önanga yol̄omo de yokere de yomore-morene ma Jou Ai himangoka. Daha mangale higali mahinotoka önanga ihingahu de madiai o kawahaika o Salomo hokä o koano. De ma Jou Ai romanga, önanga iwihitatapu unanga wodadi toönanga manga koano deʼ o Zadok wodadi o imam.

²³ Daha hokä aidagali aiama o Daud, o Salomo wogogere o pöpareta makuruhi wohitötatapuoka ma Jou. Unanga o koano wohöhasi-hasili de iwidodato o Israel manyawa yongodumu.

²⁴Mata-mata o popareta yopangka-pangkati de o tentara hiädono o Daud aingoha-ngohaka o naurika mahomoaö ihigoungu aikuaha o Salomo hokä o koano.

²⁵Ma Jou wadiai o kawaha yongodumu iwïheranga ma Koano Salomo de iwihidadi o koano iholoi wolamoko o koano okiainoö mamoi iböto yapareta o Israeloka.

²⁶O Daud o Isai aingohaka wapareta o Israeloka yongodumu

²⁷ o taongo moruata madekana. O Hebronoka wopareta o taongo tumidi madekana de o Yerusalemoka o taongo moruange de hange madekana.

²⁸Unanga wokaya de aihoromati de wohonenge ai umuru koha gurutoka. O Salomo aingohaka o nauru wodadi o koano witagali ünanga.

²⁹Ma Koano Daud aiwowango majarita mamulaenge hiädono mabaha itulihoka ma Nabi Samuel, ma Nabi Natan deʼ ma Nabi Gad manga buku magoronaka.

³⁰O buku gënanga magoronaka ihi ade-ade aipareta, aikuaha de hagala idödadadi aidiriika, mangale o Israel manyawa de o pareta-o pareta o Israeloka yäko kilolitino.