Read Tobelo O TAWARIKH MADODIHIRAKA 4 Bible Online

O TAWARIKH MADODIHIRAKA 4 - Tobelo bible

O TAWARIKH MADODIHIRAKA 4

¹Inoli nënanga ganga o hidoku moi o Yehuda aidifaukuino: o Peres, o Hezron, o Karmi, o Hur, deʼ o Syobal.

²O Syobal ganga o Reaya ai ama, o Reaya o Yahat aiama. O Yahat toünanga aingohaka o nauru yahinoto: o Ahumai deʼ o Lahad. Önanga o Zora makota manyawa manga ete deʼ manga tohora.

³Aingohaka o nauru o riaka o Kalebino deʼ ngoihekata amiromanga o ngo Efrat ganga o Hur. O Hur aidifauku ganga wohigögoko-goko o Betlehem makota. O Etam, o Pnuel, deʼ o Ezer ganga o Hur aingoha-ngohaka. O Etam toünanga aingohaka o nauru yaruange manga romanga o Yizreel, o Isma deʼ o Idbas, deʼ o ngohaka o ngoheka momatengo amiromanga o Hazelelponi. O Pnuel wohigoko o Gedor makota deʼ o Ezer wohigoko o Husa makota.

⁵O Asyhur wohigoko o Tekoa makota toünanga ngoihekata yahinoto enagënanga o ngo Hela deʼ o ngo Naara.

⁶De o ngo Naara, ünanga wamake o ngohaka o nauru yaruata: o Ahuzam, o Hefer, o Temeni deʼ o Ahastari.

⁷De o ngo Hela, o Asyur wamake o ngohaka o nauru yaruange, enagënanga o Zeret, o Yehozar deʼ o Etnan.

⁸O Anub deʼ o Hazobeba ganga o Kos aingoha-ngohaka o nauru o Aharhel o Harum aingohaka aidifauku manga hoana manga ete deʼ manga tohora.

⁹Naga womatengo o nauru airomanga o Yabes; ünanga iholoi iwihoromati ngaro deʼ airoriadodoto. Unanga mihidöaka o romanga o Yabes mangale ngoi ayo, karana ngoi ayo duru mohangihara maöraha mihingohaka ünanga.

¹⁰Mä o Yabes womäniata ma Jou Madutuika iwihö huba-huba o Israeloka manyawa, wato, ”Ya Jou Madutu, nohihi barakati ngohi, deʼ nohiwoata tanu ahidaera. Nohi hohongino ngohi deʼ nohihi kurutika o huha hupaya ngohi tohangiharaua.” De ma Jou Madutu watarima aigogahoko.

¹¹O Kelub o Suha airiadodoto toünanga aingohaka o nauru airomanga o Mehir. O Mehir aingohaka ganga o Eston,

¹²deʼ o Eston toünanga aingohaka o nauru yaruange, enagënanga o Bet-Rafa, o Paseah, deʼ o Tehina, wohigögoko-goko o Nahas makota. Hagala o nyawa manga difauku gënanga yogogere o Reka makotaka.

¹³O Kenas toünanga aingohaka o nauru yahinoto manga romanga o Otniel deʼ o Seraya. O Otnielö toünanga aingohaka o nauru yahinoto, enagënanga o Hatat deʼ o Meonotai.

¹⁴O Meonotai aingohaka enagënanga o Ofra. O Seraya aingohaka enagënanga o Yoab wohigögoko-goko yogögao-gao ma Wai. O waioka gënanga manyawa yongodumu ganga yosawaro yogögao-gao.

¹⁵O Kaleb o Yefune aingohaka toünanga aingohaka o nauru yaruange: o Iru, o Ela deʼ o Naam. O Ela aingohaka enagënanga o Kenas.

¹⁶O Yehaleleel toünanga aingohaka o nauru yaruata: o Zif, o Zifa, o Tireya deʼ o Asareel.

¹⁷O Ezra aingohaka o nauru naga yaruata: o Yeter, o Mered, o Efer deʼ o Yalon. O Mered wokawingi de o ngo Bica o Mesir makoano ngoiora. Onanga yamake o ngohaka o ngoheka momatengo amiromanga o ngo Miryam, deʼ o ngohaka o nauru yahinoto manga romanga o Samai deʼ o Yisba. O Yisba ganga wohigö goko-goko o Estemoa makota. O Meredö wokawingi deʼ o ngoheka momatengo o Yehuda aihoanino; toönanga manga ngohaka o nauru naga yaruange: o Yered wohigögoko-goko o Gedor makota, o Heber wohigögoko-goko o Sokho makota, deʼ o Yekutiel wohigögoko-goko o Zanoah makota.

¹⁹O Hodia wokawingi de o Naham ngoihiranga. Toönanga manga difauku ganga o Garmi manyawa deʼ o Maakha manyawa manga ete deʼ manga tohora. O Garmi manyawa yogogere o Kehila makotaka, deʼ o Maakha manyawa yogogere o Estemoa makotaoka.

²⁰O Simon toünanga aingohaka o nauru yaruata: o Amnon, o Rina, o Benhanan deʼ o Tilon. O Yisei toünanga aingohaka o nauru yahinoto: o Zohet deʼ o Ben-Zohet.

²¹O Yehuda aingohaka womatengo airomanga o Sela. Aidifauku ganga hokä hoko nënanga: O Er wohigögoko-goko o Lekha makota O Lada wohigögoko-goko o Maresa makota O hoana yododiai o pakeanga o lenan o Bet-Asybea makotaoka O Yokim O Kozeba makota manyawa O Yoas O Saraf wokawingi deʼ o Moab mangongoheka deʼ ipaha wolio o Betlehemika. O buku gënanga yal̄ë madulihi ihöhira-hiraino.

²³Onanga mata-mata yodiai o kendi deʼ o rube mangale makoano deʼ yogogere o Netaim deʼ o Gedera makotaka.

²⁴O Simeon toünanga aingohaka o nauru yamotoa: O Nemuel, o Yamin, o Yarib, o Zerah deʼ o Saul.

²⁵O Saul ai difauku ganga hokä hoko nënanga: O Salum O Mibsam O Misma O Hamuel O Zakur O Zimei.

²⁷O Simei toünanga aingohaka yamonaoko deʼ yahinoto: o nauru yangimoi deʼ yabutanga deʼ o ngo ngoheka yabutanga. Mä o Simei airoriadodoto mahuhutulu dika manga ngohaka. O Simeon aidifauku imaketeroua manga ngöe deʼ o Yehuda aidifauku.

²⁸ Hiädono maöraha ma Koano Daudika, o Simeon aidifauku yogogere o kota-kotaoka hokä hokonënanga: o Bersyeba, o Molada, o Hazar-Sual,

²⁹o Bilha, o Ezem, o Talad,

³⁰o Betuel, o Horma, o Ziklag,

³¹o Bet-Markabot, o Hazar-Susim, o Bet-Biri deʼ o Saarim.

³²Onango yogogere o ngï motoa mahomoaoka, enagënanga o Etam, o Ain, o Rimon, o Tokhen, o Asan,

³³deʼ o kapongo-kapongoka yakokilolitino o ngï-o ngï gënanga hiädono magurutika o Baal makota o wange madumuniha o koreharail̄e idaduoka. Hoko gënanga madulihi nanga naga o Simeon aidifauku mangale manga Ahali mabuku deʼ o ngï-o ngï onanga yogögogere.

³⁴Inoli nënanga ganga manga roma-romanga hoana manga balu-baluhu o Simeon aihöana magoronaka: O Mesobab O Yamlekh O Yosa o Amazia aingohaka O Yoel O Yehu o Yosibya aingohaka (o Yosibya ganga o Seraya ai ngohaka, o Asiel ai danongo), O Elyoënai O Yaakoba O Yesohaya O Asaya O Adiel O Yesimiel O Benaya O Ziza o Sifei aingohaka (madatoro manga ahali mabuku o Sifei deʼ yakail̄e enagënanga: o Alon, o Yedaya, o Simri, o Semaya). Karana toönanga mangatau manyawa-mangatau manyawa gila-gila yodogo-dogo,

³⁹daha önanga imahi gerewoto o wange madumuniha hiädono itigi o Gedor makota magogere o wai moioka. O wange mahiwaroko idaduoka o wai gënanga önanga yamake o momo iboburere matonaka marata deʼ iluasika ikali irïdi mangale toönanga manga aiwani o gigini. Mahira o daera gënanga yogogere o Ham manyawa yowango idame-dame.

⁴¹Maöraha o Hizkia o Yehuda manga koano o Simeon ai difauku gënanga yaparangi o Gedor. Onanga yawedere manga tau-tau o kota manyawa gënanga deʼ o Meunim manyawa, daha yäduhu manyawa. Ipaha önanga yogogere dokengoka karana iwöe o tonaka irata-rata mamomo mangale toönanga manga aiwani ogigini.

⁴²O Yisei aingoha-ngohaka manga tutuda matimioka, enagënanga o Pelaca, o Nearya, o Refaya deʼ o Uziel, o nyawa yaratuhu motoa mahomoa o Simeon aihoanino imatururu o Edomika o wange mahiwaroko.

⁴³Onanga yätoma o Amalek manyawa mahou-houohi, daha yogogere genangoka hiädono öraha gënanga.