Read Tobelo O TAWARIKH MADODIHIRAKA 5 Bible Online

O TAWARIKH MADODIHIRAKA 5 - Tobelo bible

O TAWARIKH MADODIHIRAKA 5

¹ O Ruben ganga o Yakub aingohaka mariaka. Mä karana o Ruben wapesekoka amihoromati momatengo aiama ngoihekata paliara, daha aihaku hokä o ngohaka o riaka warahuku de wihidöaka o Yusufika. Ngaroka hokogënanga ikökua-kuata o Yakub aidifauku mahidogoronaino o Yusuf aihoanua ma o Yehuda aihöana. Duru madodihiraka yodadi o koano o Israeloka maumati yongodumu ganga o Yehuda aihoanino gënanga.

³O Ruben o Yakub aingohaka mariaka toünanga aingohaka o nauru yaruata: o Henokh, o Palu, o Hezron deʼ o Karmi.

⁴ Nenanga imakokadadu o Yoel aidifauku: o Semaya, o Gog, o Simei, o Mikha, o Reaya, o Baal deʼ o Beera. O Beera ganga o tutuda o Ruben aihöana maöraha ünanga iwitagoko o Tiglat-Pileser o Asyur manga koano, de iwiao madaera yätotabuangika.

⁷Manga ahali mabuku magoronaka itulihö o hoana manga balu-baluhu hokä hokonënanga o Ruben aihöana magoronaka: o Yeiel, o Zakharia,

⁸deʼ o Bela o Azas aingohaka o Sema aidanongo o Yoel aihoanino. O Ruben aihöana yogogere o Aroëroka deʼ madaeraoka mulaenge o Aroër deʼ yaino mameta o koremieuku hiädono o Neboika dë o Baal-Meon.

⁹Toönanga manga aiwani o gigini duru kohä ngöe o Gilead madaeraoka. Karana gënanga, önanga yogogere madaera o wange mahiwaroko idaduoka hiädono o tonaka makokakahaika ihoheika magurutika hiädono o Efrat ma Ngairi.

¹⁰Maöraha ma Koano Saul, o Ruben aihöana yaparangi deʼ yahihangoka o Hagri manyawa o Gilead o wange mahiwaroko idaduoka, daha yögogere o berera gënanga.

¹¹O koremieuku idaduoka o Ruben aihöana manga daera yogogere o Gad aihöana o Basan matonakoka hiädono magurutika o Salkha o wange mahiwaroko idaduoka.

¹²O Gad aihoanino gënanga o Yoel ganga yososawaro manga hoana manga ete deʼ manga tohora, deʼ o Safam ganga o hoana o nomori mahinotoka manga ete deʼ manga tohora. O Yaenai deʼ o Safat ganga o hoana-o hoana mahomoa manga ete deʼ manga tohora.

¹³O nyawa mahomoa o Gad aihöana magoronaka yodogoika o hoana tumidi magoronaka hokä hokonënanga: o Mikhael, o Mesulam, o Syeba, o Yorai, o Yakan, o Ziya deʼ o Eber.

¹⁴Onanga o Abihail o Huri aingohaka aidifauku. Madatoro toönanga manga ahali mabuku dau deyail̄e ganga hokä hokonënanga: o Abihail, o Huri, o Yaroah, o Gilead, o Mikhael, o Yesisai, o Yahdo, o Bus.

¹⁵O hoana-o hoana manga baluhu gënanga ganga o Ahi o Abdiel aingohaka, o Guni aidanongo.

¹⁶Onanga yögogere o Basan madaeraka de o Gilead, deʼ o kota-kota o daeraka gënanga ikali o tonaka irata-rata mamomo o Saronoka yamode-modekika.

¹⁷Manga ahali mabuku nënanga yadiai maöraha o Yotam o Yehuda manga koano, deʼ o Yerobeam o Israel manga koano.

¹⁸O Ruben aihöana magoronaka, o Gad deʼ o Manasye aihöana o Yordan o wange mahiwaroko idaduoka naga o tentaraka yaribuhu moruata deʼ iata de yaratuhu tumidi de yamoributanga yabobiaha deʼ ihiö ori-oriki magoronaka yapake o dadatoko, o oworo deʼ o toimi.

¹⁹Onanga yoparangi yalawani o hoana o Yetur, o Nafis, deʼ o Nodab, enagënanga o hoana-o hoana o Hagri manyawa manga hidogoronaka.

²⁰Hagala o tentaraka gënanga iwingaku ma Jou Madutuika deʼ yogahoko o roriwo Unangika, daha ma Jou Madutu wätarima toönanga manga gogahoko deʼ wahidöaka o utumu onangika mangale hagala o Hagri manyawa gënanga deʼ önanga imateke rorimoi.

²¹Karana o parangi gënanga idadi dema Jou Madutu Ai mau, done manga ngöe manga haturu önanga yätoma. Onangö yatagoko yaribuhu oratuhu moi deʼ yaora o onta, o oribuhu moritoa, o duba o oribuhu oratuhu hinoto deʼ moritoa deʼ o keledai o ribuhu hinoto. Iböto gënanga önanga yogogere o daeraka gënanga hiädono maöraha o Israeloka yatagoko de yaao o ngï yatotabuangika.

²³O Manasye aihöana mahononga yogogere o Basan madaeraka hiädono o koremieuku magurutika o Baal-Hermon, o Senir de o Hermon mal̄oku. Onanga iholoi itedekana iholoi yowöe.

²⁴Nënanga toönanga manga hoana ihibö balu-baluhu: o Hefer, o Yisei, o Eliel, o Azriel, o Yeremia, o Hodawya deʼ o Yahdiel. Onanga ganga mata-mata o tentara-tentara yonö nau-nauru.

²⁵O Israeloka manyawa yosetiaua ma Jou Madutuika iwihöhuba-huba toönanga manga ete deʼ manga tohora. Onanga iwimal̄a Unanga deʼ yapuji manga giki-gikirika o hoana deʼ o berera ma Jou Madutu wadöduhu-duhuoka o Kanaan mabereraka.

²⁶ Karana gënanga ma Jou Madutu wagaraki o Pul aihininga o Asyur manga koano, daha ünanga woiki waparangi o berera gënanga. O Pulö iwinako hokä o Tiglat-Pileser. Daha o Ruben aihöana, o Gad deʼ o Manasye o Yordan o wange mahiwaroko idaduoka yaao hokä o dagokino deʼ yaumo o Halahika, o Haborika, o Hara deʼ o ngï moiika itigi deʼ o Gozan ma Ngairi. Dokengoka önanga yogogere deʼ yorïdi hiädono o wange nënanga.