Read Tobelo O TAWARIKH MADODIHIRAKA 7 Bible Online

O TAWARIKH MADODIHIRAKA 7 - Tobelo bible

O TAWARIKH MADODIHIRAKA 7

¹O Isakhar toünanga aingohaka o nauru yaruata: o Tola, o Pua, o Yasub deʼ o Simron.

²O Tola toünanga aingohaka o nauru yabutanga: o Uzi, o Refaya, o Yeriel, o Yahmai, o Yibsam deʼ o Samuel. Onanga ganga o Tola ai ahaluku magoronaka manga tau manyawa manga balu-baluhu de duru yanako hokä o tentara yonönau-nauru. Maöraha ma Koano Daud, toönanga manga difauku manga ngöe yaribuhu monaoko de hinoto de yaratuhu butanga.

³O Uzi toünanga aingohaka o nauru womatengo airomanga o Yizrahya. O Yizrahya de aingohaka o nauru yaruata, enagënanga o Mikhael, o Obaja, o Yoel deʼ o Yisia ganga manga balu-baluhu.

⁴Toönanga manga heka-hekata deʼ manga ngoha-ngohaka hokogënanga mangangöe hiädono toönanga manga difauku yakunu yadiai o nau-nauru yamoruange de butunga manga ribuhu mangale yotentara.

⁵Imamoteke mabukuoka ihitötatapuoka, mata-mata manga tau manyawa o Isakhar aihöana magoronaka yamake o nau-nauru yamoritufange de tumidi manga ribuhu yadödaë-daëne mangï mangale yotentara.

⁶O Benyamin toünanga aingohaka o nauru yaruange: o Bela, o Bekher deʼ o Yediael.

⁷O Bela toünanga aingohaka o nauru yamotoa: o Ezbon, o Uzi, o Uziel, o Yerimot deʼ o Iri. Onanga ganga manga tau manyawa manga baluhu toönanga manga ahali magoronaka deʼ duru yanako hokä o tentara yonönau-nauru. Toönanga manga difauku mabuku magoronaka itulihi o nau-nauru yamonaoko de yahinoto manga ribuhu de yamoruange de yaruata yadödaë-daëne mangï mangale yotentara.

⁸O Bekher toünanga aingohaka o nauru yahiwo: o Zemira, o Yoas, o Eliezer, o Elyoenai, o Omri, o Yeremot, o Abia, o Anatot deʼ o Alemet.

⁹Onanga ganga manga tau manyawa manga balu-baluhu toönanga manga ahali magoronaka. Imamoteke mabuku ihitö tatapuoka mata-mata manga tau manyawaino toönanga manga difauku magoronaka yamake o nau-nauru yamonaoko manga ribuhu de yaratuhu hinoto yadödaë-daënoka mangï mangale yotentara.

¹⁰O Yediael toünanga aingohaka o nauru womatengo airomanga o Bilhan. O Bilhan toünanga aingohaka o nauru yatumidi: o Yeus, o Benyamin, o Ehud, o Kenaana, o Zetan, o Tarsis deʼ o Ahisahar.

¹¹Onanga ganga manga tau manyawa manga balu-baluhu toönanga manga ahali magoronaka de duru yänako hokä o tentara yonö nau-nauru. Toönanga manga difauku mabuku magoronaka itulihi o nau-nauru yangimoi de tumidi manga ribuhu de yaratuhu hinoto yadö daë-daënoka mangï mangale yotentara.

¹²O Supim deʼ o Hupim ganga o Ir aidifauku. O Husim ganga o Dan aingohaka.

¹³O Naftali toünanga aingohaka o nauru yaruata: o Yahziel, o Guni, o Yezer deʼ o Salum. Onanga ganga o Bilha aidano-danongo.

¹⁴O Manasye de ngoi hekata paliara, o Aram mangoheka momatengo, manga ngohaka o nauru yahinoto: o Asriel deʼ o Makhir. O Makhir aingohaka enagënanga o Gilead.

¹⁵O Makhir wahilingiri mangale manga hekata o Hupim deʼ o Supim. O Makhir ngoihekata amiromanga gënaga o ngo Maakha. O Makhir aingohaka mahinotoka ganga o Zelafead. O Zelafead toünanga aingohaka o nauru koiwa, duga-duga aingohaka o ngoheka.

¹⁶O Makhir ngoi hekata o ngo Maakha mahingohaka o ngohaka o nauru yahinoto yahiromanga o Peres deʼ o Seres; o Peres to ünanga aingohaka o nauru yahinoto manga romanga o Ulam deʼ o Rekem.

¹⁷O Ulam toünanga aingohaka o nauru womatengo airomanga o Bedan. Genanga o Gilead aidifauku o Makhir aingohaka, o Manasye ai danongo.

¹⁸O Gilead ngoihiranga amiromanga o ngo Molekhet tomünanga amingohaka o nauru yaruange o Isyhod, o Abiezer deʼ o Mahla.

¹⁹O Semida toünanga aingohaka o nauru yaruata: o Ahyan, o Sekhem, o Likhi deʼ o Aniam.

²⁰O Efraim toünanga aingohaka yaruange: o Sutelah, o Ezer deʼ o Elad. O Efraim aidifauku madatoro itilakuru o Sutelah enagënanga o Bered, o Tahat, o Elada, o Tahat, o Zabad, o Sutelah. O Ezer deʼ o Elat yätoma maöraha yomau yatohiki o Gad maberera madutu manga aiwani.

²²Toönanga manga ama womahi pake o duka manonako kadema wange madekana hiädono airoriadodoto yoboa iwil̄aru ünanga.

²³Ipaha o Efraim imaröehe moioli de ngoi hekata, daha o ngoheka gënanga moröehe de mihingohaka o ngohaka o nauru womatengo. O Efraim wihiromanga o ngohaka gënanga o Beria, karana o boditoönanga yamö mao-maoka gënanga.

²⁴O Efraim toünanga aingohaka o ngoheka momatengo amiromanga o ngo Seera. Munangala mohi goko o kota-o kota o Bet-Horon itimi-timi de o Bet-Horon il̄oku-l̄oku, ikala o Uza deʼ o Seera makota.

²⁵Nagali o Efraim aingohaka o nauru womatengo airomanga o Refah. Nenanga o Refah aidifauku madatoro: o Resef, o Telah, o Tahan,

²⁶o Ladan, o Amihud, o Elisama,

²⁷o Nun, o Yosua.

²⁸Madaera yahidödöa-döaka mangale önanga manga ngï yogö gogere nagala o Betel deyaino hiädono magurutika o Naaran o wange mahiwaroko, de o Gezer o wange madumuniha ikali o kapo-kapongo o kota gënanga magilolitino. O daera gënanga magoronaka idogoikaö o Sikhem deʼ o Aya makota, ikali o kapo-kapongo magilolitino.

²⁹O Manasye aidifauku yakuaha o kota Bet-Sean, o Taanakh, o Megido, o Dor deʼ o kapo-kapongo magilolitino. Genanga mata-mata mangï yogögogere o Yusuf o Yakub aingohaka aidifauku.

³⁰Inoli nënanga ganga o Asyer aidifauku. Unanga aingohaka o nauru yaruata: o Yimna, o Yiswa, o Yiswi, o Beria de o ngoheka momatengo amiromanga o ngo Serah.

³¹O Beria toünanga aingohaka o nauru yahinoto: enagënanga o Heber de o Malkiel wohigoko-goko o Birzait makota.

³²O Heber toünanga aingohaka o nauru yaruange: o Yaflet, o Somer, o Hotam deʼ o ngoheka momatengo amiromanga o ngo Sua.

³³O Yafletö toünanga aingohaka o nauru yaruange: o Pasakh, o Bimhab deʼ o Asywat.

³⁴O Somer o Yaflet aidodoto toünanga aingohaka o nauru yaruata: o Ahi, o Rohga, o Yehuba deʼ o Aram.

³⁵O Hotam o Yaflet aidodoto womatengoli, toünanga aingohaka o nauru yaruata: o Zofah, o Yimna, o Seles deʼ o Amal.

³⁶O Sofah aidifauku enagënanga o Suah, o Harnefer, o Syual, o Beri, o Yimra,

³⁷o Bezer, o Hod, o Sama, o Silsa, o Yitran deʼ o Beera.

³⁸O Yeter aidifauku enagënanga o Yefune, o Pispa deʼ o Ara.

³⁹O Ula aidifauku enagënanga o Arah, o Haniel deʼ o Rizya.

⁴⁰Genanga o Asyer aidifauku. Onanga mata-mata manga tau manyawa manga balu-baluhu yanako hokä yoböbarani de yonönau-nauru de o tutuda yolöago-agomo. O Asyer aidifauku mabuku magoronaka itulihi o nau-nauru yamonaoko de yabutanga manga ribuhu yadödaë-daëne mangï mangale yotentara.