Read Tobelo O TAWARIKH MAHINOTOKA 1 Bible Online

O TAWARIKH MAHINOTOKA 1 - Tobelo bible

O TAWARIKH MAHINOTOKA 1

¹O Salomo ma Koano Daud aingohaka o nauru wodadioka o koano aipangkati ikuakuata o Israel mapareta magoronaka. O Jou Ai Jou Madutu wihibarakati ünanga de wihidadi ünanga duru wokuaha.

²Mata-mata o duduono manga baluhu yaribuhu moi de o duduono yaratuhu moi, mata-mata o popareta yopangka-pangkati, de mata-mata o Israeloka manga tau manyawa manga baluhu wahipareta ma Koano Salomo,

³mangale yoiki dede ünanga o puji mangïka o Gibeonoka. Onanga yoiki dokengika, karana genangoka naga ma Jou Ai gamake ma Tau wadodiai o Musa ma Jou Ai gilaongo maöraha o tonaka makokakahaka. (

⁴ Mä ma Jou Ai Jaji ma Peti naga o Yerusalemoka o gamake matau wohipopake-pake ma Koano Daud mangale o Peti gënanga maöraha ünanga watururu o Kiryat-Yearim de yaino.)

⁵ O huba mangï o tabaga wadodiai o Bezaleel o Uri aingohaka, o Hur aidanongo, nagaö o Gibeonoka ma Jou Ai gamake ma Tau mahimangoka. Ma Koano Salomo de o kawaha yongodumu yopuji ma Jouika dokengoka.

⁶O gamake ma Tau mahimangoka gënanga ma koano wohihuba o huba mangï o tabaga mal̄okuoka o aiwani o oribuhu moi hokä o huhuba itötuhu-tuhuku ma Jouika.

⁷O hutu gënanga ma Jou Madutu womahimatoko Ai diri o Salomoika de wotemo, ”Salomo, nogahoko okia noöigo-igo, gënanga aha Tohi döaka ngonaika!”

⁸O Salomo wohaluhu, ”Ya Jou Madutu, Ngona nohidumutoka Ngona duru nihininga ahiama o Daud, de Ngona nohi gorakoka ngohi todadi o koano titagali ünanga.

⁹ O öraha nënanga, ya Jou, Jou Madutu, tanu Ngona natotomo Ani jaji ahiamaika. Ngona nohi gorakoka ngohi todadi o koano mangale o hoana maamo-amoko nënanga takunua taetongo manga ngöe.

¹⁰Karana gënanga tanu nohihidöaka ngohino o barija de o sawaro topoparalu mangale tätuda önanga. Nako hoko genangua, sarakia done ngohi takunu tapareta Ani umati maamo-amoko nënanga?”

¹¹Wibaluhu ma Jou Madutu o Salomoika, ”Ani gogahoko gënanga yaoa. Ngona nogahokua o kaya ekola o arata ekola aniromanga mabounu ihemoro ekola anihaturu-haturu yohonenge ekola aniumuru ikurutu mangale anidiri mahirete, ma’ o barija de o sawaro mangale napareta Ahi umati Tonihi gogoanoka ngonaika.

¹²Hababu gënanga o barija de o sawaro aha Tonihidoaka ngonaika. Mahomoa gënanga Ngohi aha toni hidadi ngona iholoi anihasil iwöe, iholoi nokaya de iholoi aniromanga mabounu ihemoro ngaro o koano okiainoö dika yaoa maöraha ipaha-paha yaoa maöraha aha ibö boa-boa.”

¹³Ipaha o Salomo wamal̄a o puji mangï o Gibeonoka kiaka naga ma Jou Ai gamake ma Tau-tau, daha wolio o Yerusalemika. Genangino ünanga wohidagi o pareta mangale o Israeloka.

¹⁴ Unanga wangodumu aitentara yopoparangi de o kereta ihipoparangi o yaribuhu moi de yaratuhu iata de o kuda ihipoparangi o ngimoi de hinoto maribuhu. O hidoku moi wohigogere o Yerusalemoka, de maboloi o kota irupa-rupa mahomoaka.

¹⁵ Maöraha o Salomo aipareta magoronaka, o gurasi de o haaka marupa o baranga biaha o Yerusalemoka, kaimatero o helewo; de o Libanon maliwewuru magota duru kohangöe hokä o ara magota biaha.

¹⁶ Itilakuru imahö huku-hukunu iwiriwo ma koano, o kuda ihidingoto o Mesir de o Keweino,

¹⁷deʼ o kereta ihipoparangi ihidingoto o Mesirino ipaha ihihupu ihidingotoli o Het makokoanoika de o Siria ma kokoanoika de maija o tiwi o haaka o oratuhu moi de moritoa mangale o dutu moi o kuda, de o tiwi o haaka o oratuhu butanga mangale moi o kereta ihipoparangi.