Read Tobelo O TAWARIKH MAHINOTOKA 10 Bible Online

O TAWARIKH MAHINOTOKA 10 - Tobelo bible

O TAWARIKH MAHINOTOKA 10

¹O Rehabeam woiki o Sikhemika karana o Israeloka makawaha yongodumu o koremieuku imatoomu inoka dokengoka mangale iwi tede ünanga wodadi o koano.

²O öraha gënanga o Yerobeam o Nebat aingohaka kanagahi o Mesiroka karana ma Koano Salomoka de wohioara aidiri. Maöraha ünanga woihene mangale o Rehabeam, ünanga wolio o Israelika.

³O kawaha o koremieuku idaduoka iwiahoko o Yerobeam, daha önanga imakinïki ünanga yoiki iwihimanga o Rehabeam. Onanga yato,

⁴”O Salomo aniama Jou Koano womihi döakoka o momoku i totubuho ngomino. Nako Jou Koano nauwini miamomoku de nakuranga tongomi mia hangihara, ngomi aha minihigihene Jou Koanoika.”

⁵O Rehabeam wohaluhu, ”Ngohi kiani tomapikirohi. O wange hangeohi niboali.” Daha yolio hagala o nyawa gënanga.

⁶Daha o Rehabeam wogahoko o nasihati o nyawa yobalu-baluhika, mamoi iböto yodadi iwinönasihati o Salomo o Rehabeam aiama. ”Sarakia ngohi kiani täbaluhu hagala o nyawa gënanga?” woleha o Rehabeam. ”Okia tingini nianasihati?”

⁷Önanga yohaluhu, ”Nako Jou Koano nomau nodiai yaoa o kawahaika, de nasanangi toönanga manga hininga, nohidöaka o bobaluhu yaoa-oa onangika, done önanga aha yosetia Jou Koanoika kahi ado-adonika.”

⁸Mä o nyawa yobalu-baluhu manga nasihati gënanga o Rehabeam wolegaikaua. Iidulu yaino, ünanga woiki o nyawa yogögöika o gogo moi dede ünanga de o öraha nënanga iwiriwo-riwo ünanga.

⁹Onangika ünanga waleha, ”Okia tingini nianasihati ngohino mangale tobaluhu o kawaha yogahoko hupaya ngohi tahiuwini toönanga manga momoku?”

¹⁰Onanga yohaluhu, ”Hoko nënanga kokiani Jou Koano notemo onangika, ’Ngohi kahimoboleuku, ngohi iholoi kato kuatohi ngaro de ahiama.

¹¹Ahi ama winihidöaka o momoku itotubuho nginika, ma’ ngohi aha tinihidöaka iholoi itubuholi. Unanga wini gohara ngini de o boboha, mä ngohi aha tinigohara ngini de o boboha mahihika o behi!ʼ ”

¹²O wange hange ipaha o Yerobeam de o nyawa mata-mata gënanga iwihimangoli ma Koano Rehabeam, hokä wahipoparetaka.

¹³Ima howono de yatototimono manga nasihati, o kawaha yobö boa-boa unangika gënanga watemo de mabuturungoka.

¹⁴Imamoteke de hagala o nyawa yogögö manga nasihati, ünanga wato, ”Ahi ama winihidöaka nginika o momoku itotubuho, ma’ ngohi aha ti nidiai niamomoku gënanga i holoi i tubuholi. Unanga winigohara ngini de o boboha, ma’ ngohi aha tinigohara ngini de o boboha mahihika o behi!”

¹⁵O kawaha manga gogahoko wolegaikaua. Mä gënanga i goungu o Jou ma Jou Madutu Ai mau. Okia ma Jou wotemo itilakuru ma Nabi Ahia o Siloino yakorona o Yerobeam o Nebat aingohaka kiani idadi.

¹⁶ Maöraha o Israeloka makawaha yamake ma koano woluku wahigihenika önanga, önanga yopoaka, ”Duru hihidodoa de o Daud de aidifauku! Onanga komaiwahi yodiai okianaga mangale ngone. O Israeloka makawaha, niaino ngone holio! Mal̄aika o Rehabeam gënanga wohidailako ai diri mahirete!” Daha yolio o Israel makawaha,

¹⁷deʼ o Rehabeam wodadi o koano duga-duga mangale o Yehuda madaera.

¹⁸Ngaro hokogënanga ma Koano Rehabeam kawihulokohiö o Adoniram, womatengo o manarama ipöpakisa mabaluhu, mangale warïdi o kawaha. Mä önanga iwikawai ünanga de o helewo hiadono wohonenge. O Rehabeam mahirete wohasili wootana de woma tai-taiti wodoa aikeretail̄e, ikali wohioara aidiri o Yerusalemika.

¹⁹Mulaenge o öraha gënanga o kawaha o Israel mapareta o koremieuku idaduoka hoko genangika imalawani o kokoanoika o Daud aidifauku.