Read Tobelo O TAWARIKH MAHINOTOKA 12 Bible Online

O TAWARIKH MAHINOTOKA 12 - Tobelo bible

O TAWARIKH MAHINOTOKA 12

¹O Rehabeam aigogere ibötoka hokä o koano idadi ikuatoka, ünanga de o Israeloka makawaha yongodumu yolegaikaokaua ma Jou aitita,

²de yosetiaokaua Unangika. Karana gënanga ma Jou wahukumu önanga. O Rehabeam aipareta o taongo mamotoaka, o Sisak o Mesir manga Koano waparangi o Yerusalem,

³de o kereta ihipoparangi o 1.200, o tentara yokö kuda-kuda ya 60.000, o pajuretoka o doomu moi hakunua haetongo manga ngöe, yodogoika o Libia, o Suki de o Sudan manga duduono.

⁴Unanga waora o kota-o kota mabebeno o mehele o Yehudaka daha wodagi hiädono o Yerusalemika.

⁵O öraha gënanga ma Koano Rehabeam de o Yehuda manga tutuda-tutuda imatoomuinoka o Yerusalemoka karana ihioara manga diri o Sisakino. Ma Nabi Semaya woboa onangika de wätemo, ”Hoko nënanga ma Jou wato, ’Ngini nihimal̄aka Ngohi, ho o öraha nënanga Ngohiö tinimal̄a ngini hiädono ngini winikuaha o Sisak.’ ”

⁶Ma koano de o tutuda-tutuda imangaku önanga yobaradohaka. Onanga yotemo, ”Okia wadodiai ma Jou gënanga iadili.”

⁷Maöraha ma Jou wämake önanga imahitipoko ukuoka manga diri, ”Unanga wïtemoli o Semayaika, wato, ”Karana önanga imangaku toönanga manga baradoha, done Ngohi aha tabinahaua önanga. Ngohi aha demajapatioka tahilapahi önanga; o Yerusalem aha ibinahaua. Ngaro hokogënanga, o Sisak,

⁸aha wakuaha önanga, hupaya önanga ihiöriki ihilihowono mahidogoronaka imahi gilaongo Ngohino de imahi gilaongo o dunia yakökokuahaika.”

⁹ Daha ma Koano Sisak woboa wäparangi o Yerusalem makota de waora okiahonanga dema ija-ijaka wamömake-make ma Jou Ai Tauoka de ma koano aikadatoka, o dadatoko-o dadatoko o gurasiö wadodiai ma Koano Salomo.

¹⁰Hokä madagali o Rehabeam wodiai o dadatoko-o dadatoko o tabaga, de wahigogoanika o tentara manga balu-baluhika yogoa-goana o kadato mangorana ma amo-amoko.

¹¹Ma koano woiki wagetongo ma Jou Ai Tauika, yogo goa-goana yao o dadatoko-o dadatoko gënanga, ipaha ihigilio o kamari yogoa-goanika.

¹²Karana ma koano womahitipokouku aidiri ma Jou Ai himangoka, de karana kanagahi o hali-o hali maoa-oa o Yehudaka daha irïdi ma Jou Ai dohata o Rehabeamika de wibinahaua ünanga kamamoiuku.

¹³O Rehabeam wopareta o Yerusalemoka de aikuaha iholoi i lamoko. Maöraha ünanga wodadi o koano aiumuru o taongo moruata de moi, de ünanga wopareta o Yerusalemoka o taongo ngimoi de tumidi madekana, o Israel madaeraino ingodumu makota ma Jou wairikoka mangale idadi o puji mangï unangika. O Rehabeam ngoi ayo ganga o ngo Naama o Amon mabereraino.

¹⁴O Rehabeam wodiai o dorou karana wohidailakoua wadiai ma Jou Ai mau.

¹⁵Ma jarita mangale o Rehabeam mamulaengoka de yaino hiädono mabaha de aiahali mabuku itulihi ma Nabi Semaya ai Sejara mabuku magoronaka de ma Nabi Ido ai Sejara mabuku magoronaka. O Rehabeam de o Yerobeam manga hidogoronaka hoko genangika dika idadi o parangi.

¹⁶O Rehabeam wohonenge de iwi lungunu o Kokoano manga Jereoka o Daud ai kotaka. Aingohaka o nauru o Abia wodadi o koano witagali ünanga.