Read Tobelo O TAWARIKH MAHINOTOKA 13 Bible Online

O TAWARIKH MAHINOTOKA 13 - Tobelo bible

O TAWARIKH MAHINOTOKA 13

¹Ma Koano Yerobeam wapareta mangale o Israeloka mataongo ngimoi de tufangeoka, o Abia wodadi o Yehuda manga koano,

²deʼ wopareta o Yerusalemoka o taongo hange madekana. Ngoi ayo enagënanga o ngo Mikhaya o Uriel ngoi ora o Gibea makotaino. Ipaha idadi o parangi o Abia de o Yerobeam manga hidogoronaka.

³O Abia wätoomu o pajuretoka ya 400.000, ho de o Yerobeam watoomu o pajuretoka ya 800.000.

⁴O duduono hinoto gënanga kaima kokihimanga o Efraim madaera de mal̄oku-l̄okuoka. O Abia wodoa o Zamaraim mal̄oku ma tubuil̄e daha wäboaka o Yerobeamika de o Israel manyawaika. ”Ni ihene! Ngini nihi öriki, ma Jou, o Israeloka manga Jou Madutu,

⁵wohilikoka o jaji de o Daud unanga de aidifauku aha yapareta o Israeloka mangale kahi ado-adonika. O jaji gënanga yakunua idohukohi.

⁶Ngaro hoko gënanga, o Yerobeam o Nebat aingohaka gënanga wilawani o Salomoika, aikoano.

⁷Unanga watoomu o doomu yororuae hagala o nyawa manga dodotoko ikura-kuranga de yapakisa toönanga manga mau o Rehabeamika o Salomo aingohaka o nauru, o öraha gënanga duru kawogö ohi de wanakouahi mangale wolawani.

⁸O öraha nënanga ngini niatobote yakunu nialawani o kuaha ma Jou wohidöa-döaka o Daud aidifaukuika, karana nia duduono ilamoko de tingini nia hapi-hapi o gurasi wadodiai o Yerobeam idadi niagikiri.

⁹Koigoungua ma Jou Ai imam-imam o Harun aidifauku de hagala o Lewi manyawa ngini niaduhuoka mata-mata? Hokä madagali o nagona dika yoigo yodadi o imam, iti ünanga woao o hapi o dutu moi ekola o duba o dutu tumidi, ngini niahidadi o imam mangale o Jou Madutuua, hababu igoungu hoko gënanga madodagi o hoana de o berera mahomoa yagoraka toönanga manga imam. Mä ngomi midiaiua hoko gënanga.

¹⁰Ngomi kahirahi mimahigilaongo o Jou, ma Jou Madutuika tongomi mia Jou Madutu de miwimal̄aua Unanga. Tongomi mia imam-imam kahirahi o Harun aidifauku, de hagala o Lewi manyawa kahirahi yäriwo önanga.

¹¹O ngorumino de o bimaoa magetongo önanga yotuhuku o dupa de ihihuba o huhuba ituhu-tuhuku mangale ma Jou, ikali yosadia o roti ihidodiaiuku. O hutu ihigetongo önanga yawango o hilo-hilo matotodengoka o gurasi. Ngomi kahirahi mihingounu ma Jou Ai pareta-pareta, mä ngini niwimal̄aka Unanga.

¹²Tongomi miatutuda ganga ma Jou Madutu mahirete de Ai imam-imam naga nenangoka. Onanga imahidiaioka mangale yawuwu o trompet hokä manonako ngomino mangale miniparangi ngini. Hei o Israeloka manyawa, uha niwilawani ma Jou, niaete de niatohora manga Jou Madutu! Ngini aha niakunua niutumu!”

¹³O örahautu gënanga o Yerobeam wahidingoto o hidoku moi aiduduonino mangale yatatoko o Yehuda manga duduono manga poretino, ho de o hidoku moioli yahimanga toönanga manga himangino.

¹⁴Maöraha o Yehuda manga duduono yämake önanga yahigilolitoka, önanga yopoaka yogahoko o roriwo ma Jouika. O imam-imam yawuwu o trompet,

¹⁵daha o Yehuda manga duduono ihiboaka o parangi maulili de imajobo yoparangi, watuda o Abia. Magogiria onanga ihiboaka, ma Jou Madutu wahohihanga o Yerobeam de o Israeloka manga duduono,

¹⁶hiädono önanga yopiringana. Ma Jou Madutu wadiai o Yehuda manyawa mangale yautumu önanga.

¹⁷O Abia de aiduduono yadotagao yohihanga o Israel manyawaika kohaamoko; toönanga manga tentara duru maoa-oa yohonenge yaratuhu motoa maribuhu.

¹⁸O Yehuda manyawa youtumu, karana önanga iwingaku ma Jou, toönanga mangaete de mangatohora manga Jou Madutu.

¹⁹Maöraha o Abia waginïki o Yerobeam aiduduono, ünanga waora o kota muruono naga de o kapo-kapongo magilolitino. O kota-kota gënanga enagënanga o Betel, o Yesana de o Efron.

²⁰O Abia wopareta madekanino, o Yerobeam wakunua wohigiliooli aikuaha. Mabaha ma Jou witoma ünanga.

²¹Iduluyaino, o Abia iholoi wokuaha. Toünanga aihekata yangimoi de yaruata, aingohaka o nauru yamonaoko de yahinoto de aingohaka o ngoheka yangimoi de yabutanga.

²²O jarita mahomoa yakorona o Abia, de yakorona mata-mata aidemo de aimanarama itulihoka ma Nabi Ido ai Sejara mabuku magoronaka.