Read Tobelo O TAWARIKH MAHINOTOKA 14 Bible Online

O TAWARIKH MAHINOTOKA 14 - Tobelo bible

O TAWARIKH MAHINOTOKA 14

¹Ma Koano Abia wohonenge ibötino de iwilungunu o kokoano manga jereoka o Daud aikotaka, aingohaka o nauru o Asa wodadi o koano witagali ünanga. O Asa aipareta matimioka, o Yehuda maberera irïdi o taongo ngimoino madekana.

²O Asa wasanangi ma Jou Ai Jou Madutu Ai hininga de wadiai iadili de yaoa.

³Unanga wohitingaka o hoana mahomoa manga huhuba-huhuba mangï de o gomanga yahuba-huba mangï. O gikiri matugu-tugu wawedere, de o Dewi Asyera madulada maliate-liate waruba.

⁴O Yehuda makawaha wahuloko yowango imamoteke ma Jou Ai mau, toönanga mangaete de mangatohora manga Jou Madutu, de ihingounu Ai dodotoko-dodotoko de Ai pareta-pareta.

⁵Mata-mata o gomanga yahuba-huba mangï de o dupa yoduhu-duhuku mangï wohitingaka o Yehuda makota-kotaino. Daha irïdi o pareta gënanga aipareta matimioka,

⁶hiädono ünanga wakunu wohigoko o bebeno-bebeno o mehele mangale o Yehuda makota-kota. O taongo muruonino naga madekana idadiua o parangi karana ma Jou wihidöaka idame-dame unangika.

⁷O Asa watemo o Yehuda makawahaika, ”Kayaoa ngone hakuata o kota-o kota de hohigoko o bebeno o mehele yakilolitino de o candi-candi ikali o ngorana maago-agomo de madodudukuroka. Ngone hakuahaoka o berera gënanga karana ngone hamotekoka tongone nanga Jou ma Jou Madutu Ai mau. Unanga wona paliaraka ngone de Wogoana tongone nanga berera ingodumu madumuloa.” Daha önanga mulaenge ihigoko de yaböto o manarama gënanga de yaoa-oa.

⁸Ma Koano Asa aitentara o Yehuda manyawa yaratuhu hange manga ribuhu de manga daë o dadatoko de o kuama, de o Benyamin manyawa yaratuhu hinoto de yamoritufange manga ribuhu de manga daë o dadatoko o toimi madoto de mal̄eha. Onanga mata-mata o pajuretoka yobobarani de imadoto-dotokoka.

⁹O öraha moiuku o Sudan manyawa womatengo ai romanga o Zerah waparangi o Yehuda de aiduduono o pajuretoka manga ngöe yasasana moi de o kereta ipoparangi o 300. ”Onanga yotagi magurutika o Meresa.

¹⁰Daha o Asa wohupu wihimanga o Zerah, de yahinotö yatatoro manga duduono moi-moi o Zefata ma Waioka itigi de o Meresa.

¹¹Daha o Asa womaniata o Jou Ai Jou Madutuika, ”Jou, Ngona nakunu nariwo yoböbole-bole yahimanga yokö kua-kuata. Nomiriwo ngomi o öraha nënanga yamia Jou ma Jou Madutu! Ngona ikala ngomi mimahi tangono de Ani romanga ngomi mihupu miparangi mialawani o duduono duru kohaamoko nënanga. Jou, Ngonala tongomi mia Jou Madutu. Uha namal̄aika Ani diri yahihanga o nyawa imatengo.”

¹²Daha o Asa de o Yehuda manga tentara yaparangi o Sudan manga tentara. Ma Jou wahihanga o Sudan manga tentara hiädono önanga ihioara manga diri.

¹³O Asa de aitentara yaginïki önanga hiädono magurutika o Gerar yaika. O Sudanino yoboa-boa duru komanga ngöe yohonenge hiädono toönanga manga tentara imasikaokaua karana ma Jou wabinaha de o Yehuda manga tentaraö yaora duru kohangöe toönanga manga kiahonangino. Ipaha o Yehuda manga tentara yabinaha o kota-kota o Gerar madaera magilolitino, karana ma Jou wädiai manyawa yodadi yohawana. O Yehuda matentara yaora o kota mata-mata gënanga de yamake okiahonanga duru kohangöe.

¹⁵Onangö yaparangi o aiwani o gigini, manga tau-tau, de yatoraka o duba de o onta kohangöe. Iböto gënanga önanga yolio o Yerusalemika.