Read Tobelo O TAWARIKH MAHINOTOKA 15 Bible Online

O TAWARIKH MAHINOTOKA 15 - Tobelo bible

O TAWARIKH MAHINOTOKA 15

¹Ma Jou Madutu Ai Womaha iwikuaha ma Nabi Azarya o Oded aingohaka,

²hiädono ünanga woiki imamake ma koano Asa, de wotemo, ”Hei Koano Asa, de o Yehuda de o Benyamin manyawa yongodumu! Niihene! Ma Jou wotigi nginika nako ngini nitigi Unangika. Nako ngini nigahoko ma Jou Ai hidumutu, ”Unanga aha winihidöaka. Mä nako ngini niwilegaikaua Unanga, Unangö wini legaikaua ngini.

³Duru kohadekana o Israeloka imahi gilaongokaua ma Jou Madutuika wotötotiai, koiwaka toönanga manga tita-tita kokiani ihingounu, de moiokaua toönanga manga imam-imam yadotoko önanga.

⁴Mä maöraha önanga o huha magoronaka, önanga yogahoko o roriwo ma Jouika, o Israeloka manga Jou Madutu. Onanga yogahoko Ai hitumutu de Unanga wahidöaka.

⁵O örahagënanga o nyawa yakunua yotagi de madumuloa, hababu o berera yogetongo naga o ruae maago-agomo.

⁶O hoana moioka yatuku o hoana mahomoa, de o kota moioka yatuku o kota mahomoa, karana ma Jou Madutu wadotagao o ruae maago-agomo onanguku.

⁷Mä ngini kiani nitongohono de nibarani. Nia hidailako aha ihasili.”

⁸Maöraha o Asa woihene ai demo o Azarya o Oded aingohaka gënanga, aihininga makuata ihiru-hiru. Unanga wohirehene mata-mata o gomanga o Yehuda de o Benyamin mabereraka, de o kota-kota wahohihangoka o Efraim de mal̄oku-l̄okuoka, daha ünanga wohidiai ma Jou Ai huba mangï naga ma Jou Ai Tau malöaoka.

⁹Manga ngöe o Efraim manyawa, o Manasye, de o Simeon imakodogo de o Asa, de yogogere aipareta madaeraoka, karana önanga yamake ma Jou wiriwo ünanga. O Asa wähuloko o nyawa mata-mata gënanga kamamoi de o Yehuda de o Benyamin makawaha,

¹⁰imatoomu o Yerusalemoka. Daha önanga imatoomu o mede mahangeoka o Asa aipareta mataongo ngimoi de motoa magoronaka.

¹¹O wange gënanga önanga ihihuba ma Jouika o hapi o 700 de o duba o 7.000, mahasili yaora-ora o parangoka de önanga yaoino.

¹²Onanga yojaji ma Jouika önanga de manga hininga de manga jiwa magahumu aha yowango imamoteke ma Jou Ai mau, toönanga manga ete de manga tohora manga Jou Madutu.

¹³O nagona dika, yotimo-timono ekola yogögö, o nau-nauru ekola o ngongoheka yowango imamotekua ma Jou Ai mau maraioka yahukumu yahohonenge.

¹⁴De manga ilingi makuatil̄e önanga yokoboto ma Jouika önanga aha yasösö o jaji gënanga. Ipaha önanga imauli-ulili de yawuwu o trompet.

¹⁵O Yehuda makawaha yongodumu yomorene karana önanga yodiaioka o koboto gënanga de manga hininga magahumu. Onanga yosanangi yopuji ma Jouika, de ma Jou o aihininga yadaene wätarima önanga. Unanga wahidöaka onangika maöraha irïdi toönanga manga daeraoka.

¹⁶Gila-gila ma Koano Asa womi aiki ngoi el̄e o ngo Maakha, ami pangkati hokä ma koano ngoi ayo hababu munanga modiaioka o gomanga madulada yohowo-howono mangale o Asyera, o dewi iboburere. O Asa wakilianga de wawedere o dulada gënanga daha watuhuku o Kidron ma Waioka.

¹⁷Ngaro mata-mataua o gomanga yahuba-huba mangï o bereraka gënanga wawedere o Asa, ma’ ünanga kahirahi wosetia ma Jouika aiwowango magurutu.

¹⁸Mata-mata o gurasi de o haaka ikali okiahonanga mahomoa o parangoka de yaora-oraino mahasili toai ama madutu de aidiri mahirete wakelenga ma Jou Ai Tauoka mangale idadi toma Jou Madutu.

¹⁹Hiädono mataongo moruange de motoaka o Asa aipareta komaiwaka ipudali o parangi o bereraka gënanga.