Read Tobelo O TAWARIKH MAHINOTOKA 16 Bible Online

O TAWARIKH MAHINOTOKA 16 - Tobelo bible

O TAWARIKH MAHINOTOKA 16

¹Mataongo moruange de butangaka aipareta ma Koano Asa mangale o Yehuda, o Baesa o Israeloka manga koano waparangi o Yehuda de wakuata o Rama makota mangale wabeno o Yehuda manga ngekomo yohupu yowohama.

²Daha ma Koano Asa wal̄ë o gurasi de o haaka ma Jou Ai Tau makiahonanga magogogonino de ma koano aikadato, daha wohi dingoto o Damsyikika o Benhadadika o Siria manga Koano de o behehongo nënanga,

³”Naino ngone hanikutu nanga dodiawo hokä yadodiaioka nanga dimono. Imanïki nënanga ngohi tohidingoto o gurasi de o haaka hokä o hadia, de tonihigaro Tuanga natoaka anidodohanga de o Baesa o Israeloka manga koano, hupaya ünanga watauru wahigilio aiduduono ahidaeraka.”

⁴O Benhadad womodeke de o taubutu gënanga daha wähuloko aitentara manga balu-baluhu kamamoi de toönanga manga duduono yaparangi o Israeloka manga kota-kota. Onanga yautumu o Iyon, o Dan, o Abel-Bet-Maakha de mata-mata o bobilaono makota-kota o Naftalioka.

⁵Maöraha ma Koano Baesa woihene o hali gënanga, ünanga womatogumu wakuata o Rama de wamal̄a o kota gënanga.

⁶Daha ma Koano Asa watoomu hagala o nyawa o Yehudaino ingodumu yagoraka o helewo de o gota wapöpake-pake o Baesa o Ramaka mangale yakuata o kota gënanga. O pakakaha-pakakaha gënanga wapake o Asa mangale wakuata o Geba de o Mizpa makota.

⁷O örahagënanga ma Nabi Hanani waika ma Koano Asaika de wotemo, ”Karana ngona nomahiake ma koano Siriaika, de ani Jou Madutu ikaua, daha ihihanga ani öraha mangale nahihanga o Israel manga tentara-tentara.

⁸Koigoungua o Sudan deʼ o Libia toönanga manga tentara maamoko de manga kereta ihipoparangi kohangöe de o tentara de manga kudauku yobare-barene? Ngaro hoko gënanga ma Jou wonihidöaka ngonaika mangale nautumu önanga, karana ngona nomahiake unangika.

⁹Ma Jou wogoana o dunia ingodumu mangale wahidöaka Ai kuata mangale hagala o nyawa yososetia Unangika. Ngona nodiaioka ibodo, karana gënanga mulaenge oraha nënanga ngona hoko genangika namao o parangi.”

¹⁰Ma Nabi Hanani aidemo gënanga yadiai o Asa hokogënanga wongamo hiädono ünanga wihingohama o nabi gënanga o bui magoronaika. O öraha genangö o Asa watuku yamuruono naga aikawahaino.

¹¹Mata-mata idadadi o Asa aipareta magoronaka mamulaenge hiädono mabaha itulihoka o Yehuda de o Israel manga Kokoano manga Sejara mabuku magoronaka.

¹²Mataongo moruange de hiwoka o Asa aipareta, watagongo o panyake itotubuho ail̄ouika hinotö. Ngaro hoko gënanga ünanga wolingirua o roriwo ma Jouika, ma’ duga-duga ma doterika.

¹³O taongo hinoto ipaha ünanga wohonenge.

¹⁴Ai mayeti yodereroika o rampa-rampa de o minya mabou-bounu, daha iwi lungunu o kokoano manga lungunoka o Daud aikotaoka. De mangale ihidöaka o horomati unangika o kawaha yotofo o uku o gota madoporono duru kohä amoko.