Read Tobelo O TAWARIKH MAHINOTOKA 17 Bible Online

O TAWARIKH MAHINOTOKA 17 - Tobelo bible

O TAWARIKH MAHINOTOKA 17

¹O Yosafat wodadi o Yehuda manga koano witagali aiama, o Aza de ünanga wakuata aidiri mangale wälawani o Israeloka.

²Unanga wahigogere o tentara o kotaka mabebeno o mehele mata-mata o Yehudaka, de o kota maporetoka madaeraoka o Yehudaka, ikali o kota-kota aiama waora-oraka o Efraim madaeraka.

³Ma Jou wihibarakati o Yosafat karana ünanga wanïki aiama ail̄ou mario; ünanga wahubaua o Baal,

⁴mä wipuji ma Jou Madutuika. Unanga wohi ngounu ma Jou Madutu aipareta-paretaika, de aiwowango hokä o Israelokaua manga kokoano.

⁵Ma Jou wihidöaka o Yosafatika aipangkati ikua-kuata hokä o Yehuda manga koano. O kawaha yongodumu iwihidöaka o hadia-hadia unangika, ünanga wodadi wokaya ikali duru iwihoromati.

⁶De aimau ikua-kuata ünanga wohingounu ma Jou Ai pareta de wawedere mata-mata o gomanga yahuba-huba mangï ikali o Dewi Asyera madulada-dulada o Yehudaka.

⁷Ai pareta o taongo mahangeoka ünanga wähuloko o pangka-pangkati magogurutil̄e mangale yadotoko ma Jou Ai tita-tita o Yehuda makota-kotaoka. Onanga ganga: o Benhail, o Obaja, o Zakharia, o Netaneel de o Mikha.

⁸Onanga yadodiawo o Lewi manyawa yahiwo de o imam yahinoto. O Lewi manyawa gënanga ganga o Semaya, o Netanya, o Zebaja, o Asael, o Semiramot, o Yonatan, o Adonia, o Tobia de o Tob-Adonia. O imam yahinoto gënanga enagënanga o Elisama deʼ o Yoram.

⁹De yao ma Jou Ai Tita-tita mabuku önanga yoiki okiaikahonanga o Yehuda makota mata-mataika de yadotoko o kawaha dokengoka.

¹⁰Ma Jou wadiai mata-mata o pareta o Yehuda magilolitino iwimodongo iwiparangi iwilawani ma Koano Yosafat.

¹¹O Filistin manyawaino ünanga watarima kohangöe o haaka de o hadia-hadia mahomoa, de o Araboka manyawaino ünanga watarima o duba o oribuhu tumidi de oratuhu tumidi de o kabingi o oribuhu tumidi de oratuhu tumidi.

¹²Hoko gënanga o Yosafat iholoi itedekana iholoi wokuaha. O Yehuda ingodumu ünanga wohigoko o bebeno-o bebeno o mehele de o bilaono makota-kota.

¹³Unanga watoomu o bilaono kohangöe o kota-kotaoka gënanga. O Yerusalemoka ünanga wahigogere o tentara manga balu-baluhu yobobarani,

¹⁴moi-moi de manga rimoi imamoteke de manga ahali. O Adna ganga o Yehuda ai ahalino manga rimoi makapita. Unanga watuda o tentara yaratuhu hange manga ribuhu.

¹⁵O nyawa mahinotoka ganga o Yohanan; ünanga wahibaluhu o tentara yaratuhu hinoto de yamori tufange manga ribuhu.

¹⁶O nyawa mahangeoka enagënanga o Amasia o Zikhri aingohaka; ünanga wahibaluhu o tentara yaratuhu hinoto manga ribuhu. (O Amasia ganga womatengo de aihininga mahuka mahirete womahi gilaongo ma Jouika.)

¹⁷O Benyamin aihöana magoronaka manga ahali-ahalino marimoi manga kapita ganga o Elyada, womatengo woparangi wobobarani. Unanga watuda o tentara yaratuhu hinoto manga ribuhu ingodumu de manga toimi de manga dadatoko.

¹⁸O nyawa mahinotoka manga rimoi nënanga magoronaka enagënanga o Yosabad; ünanga watuda o tentara yaratuhu moi de yamori tufange manga ribuhu ingodumu de toönanga manga dae.

¹⁹Onanga yomanarama o Yerusalemoka. Mahomoa de gënanga, ma koano wahigogere o rimoi-rimoi mahomoa o bebeno-bebeno o meheloka o Yehuda madaeraoka.