Read Tobelo O TAWARIKH MAHINOTOKA 18 Bible Online

O TAWARIKH MAHINOTOKA 18 - Tobelo bible

O TAWARIKH MAHINOTOKA 18

¹Maöraha o Yosafat o Yehuda manga koano wokayaka de kaiwi heto-hetongo, ünanga wahikawingi womatengo aitau manyawa de o Ahab o Israeloka manga koano aitau manyawa momatengo.

²O taongo muruono naga ipaha o Yosafat woiki wilega o Ahab o Samaria makotaka. Mangale wihoromati o Yosafat de aiduduono, o Ahab wodiai o rameanga de wähuloko yotoaka o duba de o hapi kohängöe. Ma örahoka gënanga ünanga wihigaro o Yosafat mangale yaparangi o Ramot makota o Gileadoka.

³Unanga wileha, ”Kanomodeke ngona hoiki dede ngohi haparangi o Ramot?” O Yosafat wohaluhu, ”Kayaoa, ahitentara aha imakodogo de tongona anitentara. Ngone homakinïki hoparangi.

⁴Mä kayaoa ngone holeha ihira ma Jouika.”

⁵Daha o Ahab wätoomu o nabi doneho ya 400 daha waleha onangika, ”Iyakunu ngohi toiki taparangi o Ramot ekola kowali?” ”Yakunu!” önanga yohaluhu. ”Ma Jou Madutu aha wohï lapahi o kota gënanga Jou Koanoika.”

⁶Mä o Yosafat wolehali, ”Boteka nenangoka koiwaka o nabi mahomoa yakunu yoleha ma Jouika mangale ngone?”

⁷O Ahab wohaluhu, ”Nagaohi womatengo, o Mikha o Yimla aingohaka. Mä ngohi kotï igoua unangika, hababu komamoiuahi ünanga wohidodemo la yaoa mangale ngohi; hoko genangika kaiyaoaua.” ”Ee, uha notemo hoko gënanga!” o Yosafat wohaluhu.

⁸Daha o Ahab wiahoko womatengo o pegawe o kadatoka daha wihuloko ünanga womatai-taiti woiki wingoho o Mikha.

⁹O öraha gënanga o Ahab deʼ o Yosafat, de manga pakeanga i mömulia, yogogeruku o pareta makuruhioka o gandum yobido-bidoro mangïoka o Samaria mangorana ma amo-amoko mahimangoka, magogiria o nabi-nabi yoboa yahimanga de ihi ädono toönanga ihidödemo-demo.

¹⁰Womatengo ani o nabi-nabino gënanga, airomanga o Zedekia o Kenaana aingohaka, wodiai o tataduku-tataduku o behi daha wotemo o Ahabika, ”Nënanga wotö temo-temoka ma Jou, ’De o tataduku-tataduku hokä hoko nënanga Jou Koano aha naparangi o Siria de näwedere önanga.’ ”

¹¹Mata-mata o nabi mahomoa ihigoungu de yotemo, ”Naparangi o Ramot, Jou Koano aha nohasili. Ma Jou aha wonihidöaka o utumu Jou Koanoika.”

¹²O örahautu gënanga o huhuloko wingö ngoho-ngoho o Mikha, witemo o Mikhaika, ”Mata-mata o nabi mahomoa ihidodemo o utumu mangale makoano. Tanu Bapaö nohidodemo kayaoa-oa hokä önanga.”

¹³Mä o Mikha wohaluhu, ”De ma Jou wowango-wango, ngohi duga-duga aha totemo okia ma Jou Madutu wotötemo-temoka ngohino!”

¹⁴O Mikha womahi adonikaka ma Koano Ahab aihimangoka, ma koano wileha, ”Iyakunu ngohi de ma Koano Yosafat mioiki miaparangi o Ramot ekola kowali?” ”Nia parangi!” o Mikha wohaluhu. ”Maraioka Jou Koano aha nohasili. Ma Jou aha wonihi döaka o utumu Jou Koanoika.”

¹⁵O Ahab wohaluhu, ”Nako ngona notemo ngohino de ma Jou Ai romanga, notemo de madiai. Higali muruono naga ngona kiani tonihidöaka o hohininga mangale o hali gënanga?”

¹⁶ O Mikha wabalahi, ”Ngohi tämake o Israeloka manga tentara yoruaëuku ol̄oku-l̄okuoka. Onanga hokä o duba koiwa magogoana, de ma Jou wotemo mangale önanga, ’Hagala o nyawa nënanga koiwa toönanga manga tutuda. Mal̄aika önanga yolio de manga halamati.’ ”

¹⁷Daha o Ahab witemo o Yosafatika, ”Koigoungua, itiai ahi demo? Komamoiuahi ünanga wohidemo yaoa-oa mangale ngohi! Hoko genangika kaitotorou dika!”

¹⁸O Mikha wotemoli, ”O öraha nënanga noihene okia ma Jou wotö temo-temo! Ngohi tamake ma Jou wogogeruku aipareta makuruhi mal̄okuoka o horogaka, de mata-mata aimalaekat imaokoino aidatekoka.

¹⁹Ma Jou woleha, ’O nagona aha iwibaja o Ahab hupaya ünanga womau woiki woparangi de wohonenge o Ramotoka o Gileadoka.’ O malaekat-malaekat gënanga ihaluhu imakokohowono.

²⁰Mabaha yoaguru mahimangiha moi o womaha. Enanga imahitigi ma Jouika de itemo, ’Ngohi aha tibaja ünanga.’ ’Sarakia madodagi?ʼ ma Jou woleha.

²¹O Womaha gënanga ihaluhu, ’Ngohi aha toiki de tadiai mata-mata o Ahab ainabi yoelu-eluku.’ Ma Jou wato, ’Kayaoa, nadiai gënanga, ngona aha nohasili nibaja ünanga.’ ”

²²Wohi gila-gila o Mikha wotemo, ”Aa, gënangala idödadadi! Ma Jou wadiaioka Jou Koano aninabi-nabi inielu-eluku jou Koanoika hababu ma Jou wohitantuoka mangale inibänga o huha Jou Koanouku!”

²³Daha ma Nabi Zedekia wotagi waika womahitigi o Mikhaika daha wipoka aibionoka de wotemo, ”Kiaka yakunu ma Jou Ai Womaha ihimal̄a ngohi de iniade-ade ngonaika?”

²⁴O Mikha wohaluhu, ”Damä namake manyonyata maöraha ngona nowohama o kamari moiika mangale nomangiunu!”

²⁵”Niwitagoko ünanga!” ma Koano Ahab wopareta, ”de niwiao ünanga o Amonika, o kota mabaluhu, de makoano aingohakika o Yoas.

²⁶Nahuloko önanga iwihingohama ünanga o bui magoronaika, de niwihidöaka ünanga wol̄omo de wokere mahuhutulu dika, hiädono ngohi tolio de ahihalamati.”

²⁷O Mikha wato, ”Nako Jou Koano nolio de anihalamati, mamangarati ma Jou wotemoua itilakuru ngohi. Mata-mata yoboa-boaino nenangoka yodadi o hakihi.”

²⁸Ipaha o Ahab o Israeloka manga koano, de o Yosafat o Yehuda manga koano yoiki yaparangi o Ramot makota o Gileadoka.

²⁹O Ahab witemo o Yosafatika, ”Ngohi aha tomahalere de tonïki o parangi, ma’ ngona kokiani nomahinoa anipakeanga imomulia.” Hokogënanga o Israeloka manga koano womahalere maöraha woiki woparangi.

³⁰O öraha gënanga o Siria manga kureta ihipoparangi manga duduono manga kokapita manga koano wahiparetaka mangale iwiparangi duga-duga o Israeloka manga koano.

³¹Hoʼ, maöraha önanga iwimake ma Koano Yosafat, önanga mata-mata yatobote ünanga o Israeloka manga koano. Karana gënanga önanga iwi parangi ünanga. Ma’ o Yosafat womapoaka, daha ma Jou Madutu wiriwo ünanga, daha yaleboto manga parangi gënanga mameta mahomoaika.

³²Maöraha o Siria manga kereta ihipöparangi manga duduono makokapita imatodokana gënanga o Israelokaua manga koano, önanga imatogumu iwiparangi ünanga.

³³De madodagi imadaenika womatengo o Siria matentara wohitoimi aitoimi madoto wohihomoaika. Mä o toimi madoto gënanga iwikorona o Ahab de iwihidototara aibaju wohipöparangi madohangika. ”Ngohi ihikorona!” o Ahab womahiboaka aikereta woao-aoika, ”Naloliti de nohiao ngohi nohihihupu o parangino!”

³⁴Mä karena o parangi kaihiruohi, ma koano Ahab kahirahi womaokoil̄e ikali witumungika aikereta magoronaka wahimangika o Siria manga tentara. Maöraha o wange itumunu ünanga wohonenge.