Read Tobelo O TAWARIKH MAHINOTOKA 19 Bible Online

O TAWARIKH MAHINOTOKA 19 - Tobelo bible

O TAWARIKH MAHINOTOKA 19

¹O Yosafat o Yehuda manga koano wolioiböto de mahalamati aikadatoka o Yerusalemoka,

²womatengo manabi airomanga o Yehu o Hanani aingohaka woboa wihimanga ma koano. Ma nabi wato unangika, ”Ipatutu Jou Koano nariwo o nyawa madorou de nahiboa o nyawa iwidoha-dohatika ma Jou? Jou Koano animanarama gënanga idadi hababu ma Jou woningamo Jou Koanoika.

³Ngaro hoko gënanga nagaö maoa-oa Jou Koanoka. Jou Koano nohitingakoka mata-mata o Dewi Asyera madulada niahöhuba-huba o kawaha de Jou Koano nohidailakookali mangale nowango imamoteke ma Jou Madutu Ai mau.

⁴Ma Koano Yosafat aingï wogogere o Yerusalemoka. Mä ünanga mamoi-moi walega o kawaha o berera ingodumu mangale wahidöaka o nasihati önanga yolio ma Jouika, toönanga manga ete de manga tohora manga Jou Madutu.

⁵O kota mabebeno o mehele yogetongo o Yehudaoka ünanga wagoraka o hakim-hakim,

⁶de wahidöaka onangika o pareta nënanga, ”Nidiai nisawaro, karana ngini niahakimi mangale o nyawaua maromanga, ma’ mangale ma Jou Ai romanga. Unanga winilega-lega ngini maöraha ngini niaputuhu o perekara.

⁷Ngini kiani niwimdodongo ma Jouika, de nidiai nimahi dodiai hababu ma Jou tongone nanga Jou Madutu wodohata o nyawa yodiai iadi-adilua, yodiai ihitubuho mahononga yototarima o uru mabokumu.”

⁸O Yerusalemokaö, o Yosafat wägoraka o hakim-hakim o Lewi manyawa manga hoanino, o imam-imam de o kawaha manga balu-baluhu. Onanga kiani yaputuhu hagala o perekara-o perekara mahomoa.

⁹O hakim-hakimika gënanga o Yosafat wahidöaka o pareta nënanga, ”Nihidagi niamanarama de niamodongo ma Jouika. Niamoteke aipareta hagala moi-moi magoronaka ngini niadodiai.

¹⁰Nako niadodiawo-dodiawo o kota mahomoaino yao nginika moi o perekara o doma, yatilakuru o tita, ekola yatilakuru o datoro-o datoro, kokiani ngini niahidöaka o hidumutu onangika. De hoko gënanga önanga yahowonua ma Jouika, de ma Jou aha winï ngamoua nginika yaoa onangika. Niadiai o pareta nënanga, done ngini aha niahowonua.

¹¹Ma Imam Womomulia o Amarya tihidöaka o kuaha iko kurutil̄e mangale hagala perekara imadohanga o agama madatoro-madatoro. O Zebaja o Ismael aingohaka, enagënanga o Yehuda manga gubernur, tihidöaka o kuaha ikokurutil̄e mangale hagala perekara mahomoa. Hagala o Lewi manyawa yatagongo moi-moi niogoana hupaya niadiai maputuhu-maputuhu nia tailako o nagona yahowono de o nagona yatiai. Nianïki o hidumutu-ohidumutu nënanga de niadiai de manyata. Tanu ma Jou wadatekuku o nyawa yodiai iadi-adili.”