Read Tobelo O TAWARIKH MAHINOTOKA 2 Bible Online

O TAWARIKH MAHINOTOKA 2 - Tobelo bible

O TAWARIKH MAHINOTOKA 2

¹Ma Koano Salomo waputuhoka mangale wohigoko ma Jou Ai Tau, de moi o kadato mangale aidiri mahirete.

²Mangale genanga ünanga watoomu o nyawa yamoritumidi manga ribuhu mangale yagoraka o tau mapakakaha, yamori tufange manga ribuhu mangale yohonotoko o helewo il̄öl̄oku-l̄okuoka de o mandoro yaribuhu hange de yaratuhu butanga mangale yogoana o manarama gënanga.

³O Salomo wohidingoto o abari nënanga o Hiramika ma koano Tirus, ”Kokiani Tuanga nodiai o dodohanga o bubukunu dede ngohi hokä de o Daud ahi ama. Tuanga nahukunoka ünangika o Libanon maliwewuru magota mangale wohigoko ai kadato.

⁴O öraha nënanga ngohi tomau tohigoko moi o puji matau tohitö tinga-tingakoka mangale tihoromati ma Jou ahi Jou Madutu. O tauoka gënanga ngohi de ahikawaha aha miwipuji Unangika de madodagi kahirahi. O tauokaö gënanga ngomi aha mihihuba o huhuba itötuhu-tuhuku o ngorumino de yohutuku magetongo, o Sabat mawange magetongo, o Mede ma Hungi mawange ma ago-agomo de hagala o wange mihitö tinga-tingakoka mahomoa mangale miwihoromati ma Jou tongomi mia Jou Madutu. Hababu, Unanga wohi paretaka hupaya o hali gënanga yadiai o Israeloka manyawa mangale kahi ado-adonika.

⁵Ngohi toigo hupaya ma Jou Ai Tau aha tohigö goko-goko gënanga imahirupa o tau imomulia, hababu tongomi mia Jou Madutu iholoi womulia ngaro o gikiri okiaino dika.

⁶ Mä imoteke madiai moiuaö yakunu ihigoko o tau mangale ma Jou Madutu, hababu o gitawa maamo-amoko yamode-modekika yakunua mangale idadi Ai ngï wogogere. Hoʼ, ma Jou Ai Tau yakunu tohigö goko-goko gënanga keiholoi yaika duga-duga mangale mia tuhuku o dupa mangï mangale ma Jou Madutu!

⁷Karana gënanga, Tuanga kiani nihidingoto ngomino womatengo wososawaro wodiai o garade de wakunu wamanarama o gurasi, o haaka, o tabaga, o behi, wosawaroö wodiai o ngöere mabihi-bihi, maungu de madoka-dokara. Unanga aha imakinïki yomanarama de yogö gao-gao o Yehudaoka de o Yerusalem waö iri-irikoka ahi ama o Daud.

⁸Ngohi tohi öriki yotö tol̄a-tol̄anga o gota ani bereraka Tuanga yosawaro yotol̄anga o gota, hababu gënanga kokiani Tuanga nohi dingoto ngohino irupa-rupa o liwewuru magota de o cendana magota o Libanonino. Ngohi aha tatoomu hagala ahi nyawa mangale yariwo hagala ani nyawa Tuanga,

⁹hupaya önanga yosadia o gota magegetongo kohangöe. Hababu ma Jou Ai Tau tomau tohigö goko-goko gënanga kiani ipako deʼ irahai.

¹⁰Mangale manga bilaono hagala ani nyawa Tuanga gënanga aha tohi dingoto ngonaika Tuanga o rupa hinoto o gandum, moi-moi o ton o oribuhu hinoto, o angguru mangöe o litere o oratuhu iata maribuhu.”

¹¹Hokä mabalahi mangale o Salomo aihurata gënanga, ma Koano Hiram wohidingoto o hurata mademo hoko nënanga, ”Karana ma Jou wahininga Ai umati, Unanga wonigorakoka Tuanga nodadi toönanga manga koano.

¹²O higiriri ma Jou o Israeloka manga Jou Madutu o dihanga de o dunia ma Dodadi! Unanga wihidöaka o Daudika o ngohaka o nauru womatengo duru wobarija ikali wosawaro, de ai ganako, oraha nënanga magogiria wohidailako wohigoko moi o tau mangale ma Jou de moi o kadato mangale ai diri.

¹³Imamoteke nënanga ngohi tihidingoto womatengo ngonaika Tuanga duru wanako-nako wosawaro de wogö gao-gao airomanga o Huram.

¹⁴Ngoi ayo o Dan ai hoanino, ai ama o Tirus manyawa. Unanga wakunu wadiai o ngoere mabihi-bihi, maungu-ungu, madoka-dokara, de o ngöere o lenan ö. Hagala irupa o manarama igogarade yakunu wadiai imamoteke madüku okiadika yogahoko yaoa ünanga nihimanarama mangale imakinïki yomanarama aninyawa yogögao-gao Tuanga, de hagala o nyawa yomomanaramoka mangale ma Koano Daud ani ama Tuanga.

¹⁵Ngomi miö damä o dingoto o gandum o rupa hinoto, o angguru de o zaitun maminya Tuanga nohijöjajaji gënanga.

¹⁶Ngomi aha mitol̄anga o liwewuru magota o Libanon mal̄okuino mia wöe-wöe Tuanga nopoparalu, daha miahakoro idadi o getehata, de mia l̄ahini mihi toaka o ngöto hiädono o Yopeika. Dokengino Tuanga yakunu nao o Yerusalemika.”

¹⁷Ma Koano Salomo wodiai o sensus o nyawa maporetinoika mata-mata yogö gogogere o Israelokaka, hokä mamoi iböto wadiai ai ama ma Koano Daud. Inyata naga o nyawa maporetino yaratuhu moi de yamoritoa deʼ hange manga ribuhu deʼ yaratuhu butanga.

¹⁸Yaribuhu moritumidi yahimanarama mangale yagoraka o tau mapakakaha, yamori tufange manga ribuhu mangale yahonotoko o helewo ol̄oku-l̄okuoka, deʼ yaribuhu hange deʼ yaratuhu butanga mangale yogoana deʼ yatagongo moi-moi mangale o manarama gënanga.