Read Tobelo O TAWARIKH MAHINOTOKA 20 Bible Online

O TAWARIKH MAHINOTOKA 20 - Tobelo bible

O TAWARIKH MAHINOTOKA 20

¹O öraha muruono naga ipaha o Moab de o Amon manga tentara, imakinïki de toönanga manga dodiawo o Meunim manga tentara, yaparangi o Yehuda.

²Daha o nyawa yoboa yoao o abari nënanga, ma Koano Yosafatika, ”Duru komangangöe o Edom manga tentara yoboaka o Honenge ma Ngöto mahonongaino mangale iniparangi Jou Koano. Onanga yaoraka o Hazezon-Tamar.” (O Hazezon-Tamar ganga maromanga mahomoa mangale o En-Gedi.)

³O Yosafat idadi wohawana daha ünanga womaniata wogahoko o hidumutu ma Jouino. Ipaha ünanga wahipareta hupaya o kawaha yongodumu yopuaha.

⁴O kota yogetongino o Yehudaka o nyawa yoiki o Yerusalemika mangale yogahoko o roriwo ma Jouika.

⁵Onanga imakinïki de o Yerusalem manyawa imatoomu malöa mahungioka ma Jou Ai Tauoka. Ma Koano Yosafat womaokoino toönanga manga himangoka,

⁶de womaniata de ai ilingi makuatil̄e, ”Ya Jou, tongomi mia ete de mia tohora manga Jou Madutu! Ngona o Jou Madutu o horogaka de napareta mangale mata-mata o hoana de o berera o duniaka. Ngona nokuaha de nokuata; moiuaö yakunu ini lawani Ngona.

⁷ Ngonala tongomi mia Jou Madutu. Maöraha Ani umati, o Israeloka manyawa, yoboa o bereraika nënanga, Ngona naduhu hagala o nyawa öraha gënanga önanga yogogere nenangoka. Daha Ngona nahidöaka o berera nënanga o Abraham aidifaukuika, Ani dodiawo, mangale idadi toönanga mangatonaka madutu kahi ado-adonika.

⁸Onanga yogogeroka nenangoka de ihigoko moi o tau inihuba-huba Ngona mangï. Onanga ihiöriki,

⁹nako önanga yamake o hukumanga karana toönanga manga baradoha, de önanga yabanga o parangi, o panyake o bobaku, ekola o habirokata önanga yakunu yoboa Ngonaika de imaoko o puji matau mahimangoka nënanga. Toönanga manga huha magoronaka, önanga yakunu imaniata Ngonaika, de Ngona aha noihene de nariwo önanga.

¹⁰ O örahanënanga o Amon manyawa, o Moab de o Edom imiparangi ngomi. Maöraha tongomi miaete de miatohora o Mesir deyaino, Ngona nahigumal̄aua önanga yogogere o hoana de o berera mangaberera gënanga. Daha tongomi miaete de mia tohora yal̄ë o ngekomo ikokiloliti de yäbinahaua o Amon manyawa, o Moab de o Edom gënanga.

¹¹O öraha nënanga, hokonënanga manga manarama o hoana de o berera gënanga ngomino. Onanga yomau imiduhu ngomi o bereraino Ngona nomihi döa-döaka ngomino.

¹²Ngonala tongomi mia Jou Madutu! Nahukumu önanga, karana ngomi nënanga miapoaua mia himanga o tentara manga ngöe gënanga, yomau imiparangi ngomi. Ngomi mihiörikua okia kiani miadiai, hababu gënanga ngomi miboa Ngonaika migahoko o roriwo.”

¹³O örahautu gënanga o Yehuda manyawa o nau-nauru mata-mata imakinïki de manga hekata de toönanga manga ngoha-ngohaka imaoko ma Jou Ai Tauoka.

¹⁴O nyawa yowöe-wöe manga hidogoronaka gënanga naga o Lewi manyawa womatengo airomanga o Yahaziel. Unanga o Zakharia aingohaka o Asaf aiahalino o Benaya, o Yeiel, o Matanya manga difauku mariri magoronaka. O öraha gënanga o Yahaziel iwi kuaha ma Jou Ai Womaha,

¹⁵ daha ünanga watemo, ”Jou Koano No Momulia ikali roriadodoto mata-mata. Ma Jou wotemo ngini yakunua nianganono itoaka ekola nihawana niahimanga o tentara manga ngöe gënanga. Hababu niparangi nginiua, mä Jou Madutu.

¹⁶Iyarehe maöraha önanga yodoa yanonu o ngekomo o Zifoka idödoa-doa, nia parangi önanga. Ngini aha nimateke rihimanga dede önanga o wai mabahaka o tonaka makokakaha mahimangoka itigiika o Yeruel.

¹⁷Ngini iparaluua niparangi o parangi magoronaka. Nioiki o ngï ika ihitatantuoka nginika de nitamädika genangoka. Ngini aha niamake ma Jou winihidöaka o utumu nginika. Hei o Yehuda de o Yerusalem manyawa, uha nihawatere ekola nihawana. Niongohama dika o parangi gënanga, ma Jou aha winiriwo ngini.”

¹⁸Daha watilabuku ma Koano Yosafat. O kawaha yongodumu imakinikö dede ünanga yatilabuku iwihuba ma Jou.

¹⁹Daha hagala o Lewi manyawa o Kehat de o Korah manga ahalino imaoko, de imaulili iwipuji ma Jou, o Israeloka manga Jou Madutu.

²⁰Iyarehino mawange ka o ngoru-ngoruminohi, o kawaha yohupu de yoiki o tonaka makokakaha madaeraika o Tekoaika i tigioka. Maöraha önanga yomau imagoraka, o Yosafat wahidöaka o behehongo nënanga onangika, ”O Yehuda de o Yerusalem makawaha! Niwingaku ma Jouika nia Jou Madutu, done ngini aha yakunu nimatumungu. Niatarima nianabi-nabi manga nasihati, done ngini aha nihasili!”

²¹Ima hikadatoro iböto de o kawaha, ma koano wahuloko yonyönyanyanyi imahinoa manga pakeanga kao rupa moi mabiaha yapöpake-pake o upacara-o upacaraoka yodinga-dingakoka o agama magoronaka. Yonyönyanyanyi gënanga kiani imatuduoniha de makumati o tentara manga duduono mahimangoka ikali yonyanyi, ”O higiriri ma Jou Ai dora ikakali kahiado-adonika!”

²²Maöraha yonyö nyanyanyi gënanga mulaënge imaulili yonyanyi, ma Jou wadiai o ruaë manga haturu manga tentara manga hidogoronaka magogiria yoparangi.

²³O Amon de o Moab manga tentara yaparangi o Edom manga tentara de yawedere kamamoiuku. Ipaha önanga imaidulu yaino imateke parangi moi de moi de duru kohagiria.

²⁴Maöraha o Yehuda manga tentara imahi ädono o menara yogoa-goanoka o tonaka makokakahaoka de yatailako ihidodiai o haturu mangï, önanga yamake o haturu manga mayeti-mayeti i mahikokabarihika o tonakoka. Moiokauaö o tentara manga haturuino gënanga yowango.

²⁵Daha o Yosafat imakinïki ainyawa yoiki yaora manga haturu manga kiahonanga. Onanga yamake o aiwani o gigini kohangöe, o dae, o pakeanga de okiahonanga mahomoa dema ija-ijaka. Yatoomu iböto okiahonanga gënanga o wange hange madekana, kahangöeohi okia honanga mahomoa, hiädono pakisa kayo dogumal̄aika.

²⁶O wange maiatoka önanga mata-mata imatoomu o Higiriri ma Waioka de iwihigiriri ma Jou mangale mata-mata wadodiaioka. Genanga hababu o wai gënanga yahetongo ”O Higiriri”.

²⁷Daha o Yosafat watuda o duduono yongodumu yolio o Yerusalemika de mangamorene karana ma Jou wahohihangoka toönanga manga haturu.

²⁸Maöraha imahiädono o kotaka, önanga yotuo-tuono ma Jou Ai Tauika yahingotaka o kecapi de o trompet.

²⁹Mata-mata o negara mahomoa idadi yohawana maöraha yoihene sarakia ma Jou wahihanga o Israeloka manga haturu-haturu.

³⁰Genanga hababu o Yosafat wopareta irïdi de ma Jou wihidöaka unangika o öraha idame-dame o berera ingodumu.

³¹O Yosafat wodadi o Yehuda manga koano aiumuru o taongo moruange de motoa, de ünanga wopareta o Yerusalemoka o taongo monaoko de motoa madekana. Ngoi ayo enagënanga o ngo Azuba o Silhi ngoiora.

³²Hokä aiama o Asa, o Yosafat wodiai maoa-oa ma Jou Ai lolegaka.

³³Mä o gomanga yahuba-huba mangï-mangï wawederua. O kawahaö de manga hininga magahumua yopuji toönanga manga ete de manga tohora manga Jou Madutuika.

³⁴Majarita mahomoa yakorona o Yosafat, aipareta mamulaenge hiädono mabaha, itulihi o Yehu o Hanani aiNgohaka ai Jarita magoronaka, imanoa o Israeloka manga Kokoano manga Sejara mabuku magoronaka.

³⁵O öraha moiuku o Yosafat o Yehuda manga Koano wodiai o dodiawo madodohanga de o Ahazia o Israeloka manga koano, wododiai o dorou mangöe.

³⁶O Ezion-Geber mahohanoka önanga yodiai o kapa-o kapa mangale ihidete o Tarsisika.

³⁷Mä Nabi Eliezer o Dodawa aingohaka o Maresa makotaino wihidöaka o hohininga o Yosafatika wato, ”Karana Jou Koano nodiai o dodiawo madodohanga de o Ahazia, ma Jou ahawawedere Jou Koano animanarama.” Daha iwedere o kapa wadodiaiukuoka hiädono kamamoiuku yakunua ihidete.