Read Tobelo O TAWARIKH MAHINOTOKA 21 Bible Online

O TAWARIKH MAHINOTOKA 21 - Tobelo bible

O TAWARIKH MAHINOTOKA 21

¹O Yosafat wohonenge de iwilungunu o kokoano manga jereoka o Daud ai Kotaka. Aingohaka o nauru o Yehoram wodadi o koano witagali ünanga.

²O Yehoram o Yosafat aingohaka o nauru, o Yehuda manga koano, toünanga airiadodoto o nauru yabutanga: o Azarya, o Yehiel, o Zakharia, o Azariahu, o Mikhail, de o Sefaca.

³Onanga yamake o gurasi kohangöe, o haaka de okiahonanga dema ija-ijaka mahomoa toönanga manga amaino, de moi-moi wahidoakö moi o kota mabebeno o mehele o Yehudaka. Mä karana o Yehoram aingohaka o nauru o riaka, o Yosafat wihitatapu ünanga mangale wodadi o koano.

⁴Maöraha o Yehoram wamao aipangkati hokä o koano ikuatoka, ünanga wahuloko yätoma airoriadodoto mata-mata, de yamuruono nagaö o pangkati magogurutil̄e.

⁵O Yehoram wodadi o koano aiumuru o taongo moruange de hinoto, de ünanga wopareta o Yerusalemoka o taongo tufange madekana.

⁶Unanga wanïki ma Koano Ahab aiwowango madodagi de o Israeloka manga kokoano mahomoa, karana ünanga wokawingi de o Ahab ngoiora momatengo. Unanga wobaradoha ma Jouika,

⁷ mä ma Jou woluku wabinaha makoano o Daud aidifauku karana ünanga wojajioka o Daud aidifauku aha kahirahi yopareta.

⁸ O Yehoram aipareta magoronaka, o Edom imalawani o Yehudaika de ihigoko manga pareta mahirete.

⁹Karana gënanga o Yehoram de aikokapita yohupu de manga kereta-kereta ihipoparangi daha yaparangi o Edom. Unanga iwikilolitoka o Edom manga duduono, mä mahutuku önanga manga haturu yahigogilolitoka yongohama de ihioara mangadiri.

¹⁰Mulaenge o öraha gënanga o Edom yahigihenokauaoli o Yehudaika. O öraha genangö o Libna makotaö imalawani. Mata-mata gënanga idadi karana o Yehoram wimal̄aka ma Jou, aiete de aitohora iwihö huba-huba ma Jou Madutu.

¹¹Unanga igoungu wohigoko o gomanga yahuba-huba mangï-mangï o Yehuda de mal̄oku-l̄okuoka madaeraoka, de idadi o hababu o Yehuda de o Yerusalem makawaha yobaradoha ma Jouika.

¹²Daha o Yehoram wamake moi o hurata watötuli-tulihi ma Nabi Elia maöraha ünanga kawomangangoikahi. Hokonënanga o hurata gënanga mabetongo, ”Ma Jou, o Jou Madutu wihöhuba-huba o Daud, wonihukumu Jou Koano hababu Jou Koano nanikua aniama de ani ete Jou Koano mangario.

¹³Iidulu yaino, jou Koano nowango hokä o Israeloka manga kokoano, de idadi hababu o Yehuda de o Yerusalem makawaha yosetiaua ma Jou Madutuika. Jou Koano nodiai hokä ma Koano Ahab de iwitötotagali. Jou Koano igoungu natoma Jou Koano aniroriadodoto, enahioko önanga iholoi yaoa ngaro de Jou Koano.

¹⁴O hukumanga itotubuho ma Jouino aha yabanga o kawaha, aningoha-ngohaka ikali aniheka-hekata jou Koano, de ibinaha mata-mata jou Koano aniarata.

¹⁵Jou Koano mahireteö aha inidaene o panyake aniwarikoka iholoi itedekana iholoi itubuho!”

¹⁶O örahagënanga naga o Filistin manyawa de o Arab ma nyawa yogogere o Sudan manyawa manga datekoka yogögogere ohohana madaeraoka. Ma Jou wagaraki hagala o nyawa gënanga manga hininga mangale iwiparangi o Yehoram.

¹⁷Onanga yaparangi o Yehuda, yaora ma koano aikadato, daha yoiki yaao mata-mata aingohaka de aihekata o Yehoram hokä o dagokino, sowaliua o Ahazia aingohaka o nauru madodoto.

¹⁸Mata-mata idödadadi gënanga iböto, ma Jou wihukumu o Yehoram de o panyake aiwarikoka itötogu-togumua.

¹⁹Ngadeke o taongo hinoto madekana o panyake gënanga iholoi itubuho hiädono mabaha ünanga wohonenge de duru wohangihara. O kawaha yotofoua o uku madofo madodoporonil̄e hokä manyonyata imakinïki yoduka hokä önanga yadodiai mangale manga ete de manga tohora.

²⁰Moiuaö imatoduba aihonenge. Unanga iwilungunu o Daud aikotaka, ma’ kokoano manga jere magoronaokaua. Maöraha wodadi o koano, o Yehoram aiumuru o taongo moruange de hinoto, de ünanga wopareta o Yerusalemoka o taongo tufange madekana.