Read Tobelo O TAWARIKH MAHINOTOKA 22 Bible Online

O TAWARIKH MAHINOTOKA 22 - Tobelo bible

O TAWARIKH MAHINOTOKA 22

¹Moi o parangi magoronaka mangale o Araboka manyawa manga doomu yororuae, mata-mata o Yehoram aingohaka o nauru yatoma, sowaliua o Ahazia aingohaka madodoto iwitomaua. Karana gënanga o Yerusalem madol̄a iwigoraka o Ahazia wodadi o koano witagali aiama.

²O Ahazia wodadi o koano aiumuru o taongo monaoko de hinoto, de ünanga wopareta o Yerusalemoka o taongo moi madekana. O Ahazia o wowango hokä ma Koano Ahab aitau madol̄a manyawa, karana ngoiayo o ngo Atalya minasihati ünanga mangale wodiai itotorou. O ngo Atalya ganga ma Koano Ahab ngoiora, o Israeloka manga koano o Omri ngoihanongo.

⁴O Ahazia wobaradoha ma Jouika hokä o Ahab aitau madol̄a manyawa, karana önanga yodadi iwinonasihati aiama wohonenge ipahaika. Iwinönonasihati genangala iwihibodito ünanga.

⁵Mangale toönanga manga nasihati, ünanga womahidogo de o Yoram o Israeloka manga Koano mangale iwiparangi iwilawani o Hazael o Siria manga koano. Onanga imateke parangi o Ramotoka, o Gilead madaeraoka. O Yoram iwilabo o parangi gënanga magoronaka

⁶daha ünanga wolio o Yizreel makotaika mangale iwihouru, de o Ahazia woiki wilega ünanga dokengoka.

⁷Ma Jou Madutu wohitantuoka o Ahazia aha yadono aiajali maöraha ünanga wilega o Yoram. Wilega gënanga o Ahazia de o Yoram yamake o galawani o nauru womatengoino airomanga o Yehu o Nimsi aingohaka, ma Jou wiirikoka mangale wabinaha ma Koano Ahab aitau madol̄a manyawa.

⁸Magogiriaka o Yehu wadiai ma Jou Ai hukumanga mangale o taumadol̄a manyawa gënanga, ünanga imakamake de o doomu moi o Yehuda manga nyawa yolago-agomo de o Ahazia ai roriadodoto manga ngoha-ngohaka yonïki iwïlega gënanga magoronaka. Daha o Yehu wätoma önanga mata-mata.

⁹Ipaha ünanga wähuloko o nyawa iwilingiri o Ahazia öraha gënanga ünanga magogiria womangiunika o Samariaka. O Ahazia iwimake iböto, ünanga iwiao o Yehuika daha witoma. Ngaro hokogënanga unangö iwilungunu önanga karana önanga iwihoromati ma Koano Yosafat, aiete womahigilaongo ma Jouika de aihininga magahumu. O Ahazia aitau madol̄a manyawaino koiwa yakunu yal̄ë yatagali o pareta.

¹⁰Maöraha o ngo Atalya mohiöriki amingohaka ma Koano Ahazia wohonengoka, munanga mahipareta hupaya makoano aitau madol̄a manyawa o Yehudaka yätoma.

¹¹O Ahazia toünanga ngoi hiranga momatengo amiromanga o ngo Yoseba mokawingi de womatengo maimam airomanga o Yoyada. De komoilingua o ngo Yoseba mil̄ë o Ahazia aingohaka o nauru womatengo airomanga o Yoas ma koano aingoha-ngohaka manga hidogoronaino o ngo Atalya momau matö toma-toma. O ngohaka gënanga kamamoi de wigö goa-goana mangiunika o kamari moi magoronaka ma Jou Ai Tauoka. Hokogënanga o ngo Yoseba mihihalamati o ngohaka gënanga hiädono o ngo Atalya mitomaua.

¹²O taongo butanga madekana o Yoas iwingiunika ma Jou Ai Tauoka maöraha o ngo Atalya mopareta hokä o koano o ngoheka.