Read Tobelo O TAWARIKH MAHINOTOKA 23 Bible Online

O TAWARIKH MAHINOTOKA 23 - Tobelo bible

O TAWARIKH MAHINOTOKA 23

¹O taongo matumidoka ma Imam Yoyada waputuhu mangale wodiai o lolawani. Unanga wodiai o hiningamoi de o tentara manga baluhu yamotoa, enagënanga o Azarya o Yehoram aingohaka, o Ismael o Yohanan aingohaka, o Azarya o Obed aingohaka, o Maaseya o Adaya aingohaka, de o Elisafat o Zikhri aingohaka.

²Onanga yoiki o kota mata-mataika o Yehudaka, de yatoomu hagala o Lewi manyawa de o ahali manga balu-baluhu mata-mata, daha yaao önanga o Yerusalemika.

³ Onanga imatoomu ma Jou Ai Tauoka, de yodiai o jaji de o Yoas, makoano aingohaka o nauru gënanga. O Yoyada watemo onangika, ”Nënanga ma Koano Ahazia wohöhone-honenge aingohaka o nauru! Unanga öraha nënanga kiani o kadatoil̄e wodoa, hababu ma Jou wojajioka ma Koano Daud aidifauku aha itatapu yopareta.

⁴Nenanga kokiani ngone hadiai: Nako o Imam-imam de o Lewi manyawa yomanarama iböto o Sabat mawangeoka, önanga yakunua yolio. O hidoku moi o reguhange onangino kiani o regumoi yonïki yogoana ma Jou Ai Tau mangorana maamo-amoko mangora-ngorana,

⁵o hidoku moioli makoano aikadatoka, de maboloi ma Ngorana ma Amo-amoko ma Hohol̄eoka. O kawaha yongodumu kiani imatoomu ma Jou Ai Tau malöaka.

⁶Moiuaö yakunu yongohama ma Jou Ai Tau sowaliua o imam-imam de o Lewi manyawa magogiria yomanarama. Onanga iyakunu yowohama hababu önanga yahitingakoka mangale ma Jou. Hagala o nyawa mahomoa kiani ihi ngounu ma Jou Ai datorika de yogogere maporetoka.

⁷Hagala o Lewi manyawa kiani imaoko makoano iwihi gilolitino de manga oworo imarahukil̄e, de iwi goana ünanga kiaika dika ünanga woiki. O nagona ihi dailako yongohama ma Jou Ai Tau, kiani niatoma.”

⁸O Yoyada aipareta gënanga yadiai hagala o Lewi manyawa de o Yehuda makawaha. Hagala o nyawa manga manarama ipaha-paha o Sabat mawangeoka wahigumal̄aua yolio. Hoʼ o tentara manga balu-baluhu yakunu yatoomu yaoa hagala o nyawa manga manarama i paha-pahaoka yaoa daha yoboaino mangale yomanarama.

⁹O tentara manga balu-baluhika gënanga o Yoyada wahikodoku o kuama de o dadatoko toma Koano Daud wagögogonika ma Jou Ai Tauoka.

¹⁰O Yoyadaö wahigogere hagala o nyawa de manga oworo imarahukil̄e ma Jou Ai Tau mahimangiha idaduoka yakilolitino mangale iwitatokino makoano.

¹¹Iböto gënanga o Yoyada wiao o Yoas wihihupu, daha wigelenga o makota aihaekuku, de wihilapahi unangika ma Jou Madutu ai Tita mabuku. Hokogënanga o Yoas iwigoraka wodadi o koano. Ipaha ma Imam Yoyada de aingoha-ngohaka iwihituagi o tede maupacara maminya o Yoasuku, daha o nyawa mata-mata yopoaka, ”Nowango koano!”

¹²O ngo Atalya moihene o kawaha imä uli-ulili iwibuhuku makoano. Munanga momatai-taiti moiki ma Jou Ai Tauika kiaka o nyawa yowöe-wöe imatotoomuino.

¹³Munanga mimake makoano mahungi gënanga womaokoino ma Jou Ai Tau mangorana howoha-wohamoka, kiaka ünanga iwi tede-tedeoka, iwihigilolitino o tentara manga balu-baluhu de yawuwu o trompet. O kawaha yongodumu youlili yomorene ikali o trompet yawuwu, de o musik ihigogogule ma Jou Ai Tauoka ihirame o rameanga gënanga de toönanga manga musik mapakakaha-pakakaha. De amihininga ihuha o ngo Atalya makakihi amipakeanga de mopoaka, ”Nisetiaokaua! Nisetiaokaua!”

¹⁴O Yoyada wahigumal̄aua o ngo Atalya imitoma ma Jou Ai Tau madatekoka, hoʼ ünanga wätemo o tentara manga balu-baluhika, ”Nimiao munanga nimihihupu nihitilakuru yogoa-goana manga duduono, de niatoma o nagona dika ihidailako imihihalamati munanga.”

¹⁵Onanga imitagoko munanga, daha imiao o kadatoika. Dokengoka munanga imitoma o Kuda ma Ngorana ma amo-amoko mangoranoka.

¹⁶Ma Imam Yoyada wihigaro ma Koano Yoas de o kawaha imakinïki dede ünanga yodiai o jaji önanga aha yodadi ma Jou Ai umati.

¹⁷Iböto gënanga önanga mata-mata yaparangi de yakilianga o Baal matau. Mahuba mangï ikali madulada-dulada yawedere, de o Matan, o Baal ma Imam iwitoma o huhuba-o huhuba mangï gënanga mahimangoka.

¹⁸Daha o Yoyada wahimanarama o imam de o Lewi manyawa mangale ihidailako o manarama ma Jou Ai Tauoka imamoteke o manarama mahidoku wohita tantuoka ma Koano Daud. Onanga kiani ihihuba o huhuba ituhu-tuhuku ma Jouika — imamoteke de o Musa aitita-tita — de ihirame de o nyanyi-o nyanyi hokä watätatoroka o Daud.

¹⁹Ma Jou Ai Tau mangorana maago-agomoka, o Yoyada wohigogere o gogoana mangale yogoana hupaya o nyawa yopatu-patutua iwihuba ma Jou uha yowohama.

²⁰O tentara manga balu-baluhu, o kawaha manga balu-baluhu, o popareta yopangka-pangkati, de o kawaha yongodumu iwinïki o Yoyada iwihiduono ma Koano Yoas ma Jou Ai Tau de yaino o kadatoika. Onanga yowohama o ngorana maamo-amokino duru il̄ol̄oku-l̄oku daha makoano wogogere o pareta makuruhi malokuoka.

²¹O kawaha yongodumu yomorene, o kotaö irïdi de o ngo Atalya imitomaka.