Read Tobelo O TAWARIKH MAHINOTOKA 24 Bible Online

O TAWARIKH MAHINOTOKA 24 - Tobelo bible

O TAWARIKH MAHINOTOKA 24

¹O Yoas aiumuru o taongo tumidi maöraha ünanga wodadi o Yehuda manga koano, de ünanga wopareta o Yerusalemoka o taongo moruata madekana. Ngoi ayo amiromanga o ngo Zibya o Bersyeba makotaino.

²Madekana ma Imam Yoyada wowangohi, o Yoas wodiai o hali-o hali yasanangi ma Jou Ai hininga.

³O Yoyada wingiriki o ngoheka yahinoto mangale o Yoas ngoi hekata, de onangino o Yoas wamake o ngoha-ngohaka o nau-nauru de o ngoheka.

⁴Wopareta o öraha muruononaga madekana iböto, o Yoas waputuhu mangale wohidiai ma Jou Ai Tau.

⁵O imam-imam de o Lewi manyawa wahipareta mangale yoiki o kota-o kota manyawaika o Yehudaka de yotoomu o tiwi o kawahaino yongodumu mangale ihidiai ma Jou Ai Tau o taongo ihigetongo. Unanga wahuloko önanga itaiti yadiai o manarama gënanga, mä hagala o Lewi manyawa imahitotanana.

⁶ Karana gënanga ünanga wiahoko ma Imam Yoyada, toönanga manga tutuda, daha witemo, ”Koigoungua o Musa ma Jou Ai gilaongo wahulokoka o kawaha yofangu o soungu mangale ihibalajanga ma Jou Ai Tau? Orahanënanga, yadodoa hagala o Lewi manyawa gënanga Bapa naributua mangale yotoomu o soungu o kawahaino o Yehuda de o Yerusalem?” (

⁷O ngo Atalya iminöninïki, o ngoheka madorou gënanga, makiliangoka ma Jou Ai Tau, de mangöe okiahonangino ihitötinga-tingakoka mangale ma Jou Madutu önanga yapakeoka mangale yahuba o Baal.)

⁸Daha makoano wahipareta hupaya o Lewi manyawa yodiai moi o tiwi mapeti de yakelenga ma Jou Ai Tau mangorana maamo-amoko mahimangoka.

⁹O Yerusalem de o Yehuda ingodumu ihingahu mata-mata o nyawa kiani yoao o soungu mangale ma Jou, hokä wahitagongoka o Musa.

¹⁰O hingahu gënanga yasanangi o kawaha mangahininga de toönanga manga tutuda-tutuda. Onanga yorame-rame yonoa toönanga manga soungu matiwi o peti magoronauku gënanga.

¹¹O wange ihigetongo o peti gënanga o Lewi manyawa yao makoano aipegaweika mangale yatailako. Nako o peti gënanga iomangoka o Negara maserekretaris de ma Imam Wolamo-amoko aiwakili ihihupu matiwi daha ihigilio o peti gënanga mangiika mahira. Hokogënanga önanga yadiai o wange ihigetongo, de duru kohä ngöe o tiwi yatotoomuino.

¹²Ipaha makoano de o Yoyada ihilapahi o tiwi gënanga o nyawa ihibobalu-baluhika ihidiai ma Jou Ai Tau genanga. Daha o nyawa gënanga yahewa yomehe-mehele, yododiai o tau, youi-uihi o haaka de o gurasi mangale yamanarama o manarama gënanga.

¹³Daha o tuka-tukanga gënanga yo mulaenge ihidiai ma Jou Ai Tau gënanga. Onanga mata-mata yomanarama hokogënanga hiädono mabahaka o Tau gënanga idadi ikuata de irahai hokä mahira.

¹⁴O manarama gënanga ibötoka, o gurasi de o haaka maboloi ihilapahi makoanoika de o Yoyadaika. Daha o gurasi de o haaka gënanga yapake mangale yodiai o pakakaha-pakakaha mangale ma Jou Ai Tau, mahidogoronaka gënanga: o pakakaha-pakakaha mangale o puji maupacara, mangale o huhuba i tuhu-tuhuku, o dodai-o dodai mangale o dupa, de o mangko-mangko. Madekana ma Imam Yoyada kawowangohi, o huhuba i tuhu-tuhuku kahirahi ihihuba ma Jou Ai Tauoka.

¹⁵O Yoyada wadono o umuru magurutil̄e de wohonenge maöraha aiumuru o taongo 130.

¹⁶Unanga iwilungunu o kokoano manga jereoka o Daud aikotaka mangale yahoromati ai oa-oa ma Jou Madutuika, ma Jou ai Tauika de o Israeloka maumatika.

¹⁷O Yoyada wohonengoka, o Yoas iwibaja de manga jojobo o Yehuda manga tutuda-tutuda hiädono ünanga wolegaikaokauaoli o Yoyada aidodotoko.

¹⁸Daha o kawaha yopuji okauaoli ma Jou Ai Tauoka toönanga manga ete de manga tohora manga Jou Madutu, mä yahuba o gomanga de Dewi Asyera madulada-dulada. Toönanga manga baradoha gënanga idadi hababu ma Jou wängamo o Yehudaika de o Yerusalemika.

¹⁹Ma Jou wähuloko o nabi-nabi mangale yataaëre önanga, hupaya imaidulu imahigilaongo ma Jouika, mä o kawaha yoluku yoihene.

²⁰ Daha ma Jou Madutu Ai Womaha iwi kuaha o Zakharia ma Imam Yoyada aingohaka. O Zakharia wotagi waika o kawaha manga himangoka, daha wopoaka, ”Jou ma Jou Madutu wotemo, ’Yadodoa ngini nihingounua Ahi pareta-paretaika de nihibodito niadiri mahirete. Ngini nihihaduliua Ngohino, done Ngohiö tinihaduliua nginika!ʼ ”

²¹Mä o kawaha yodiai o doomu madorou iwilawani o Zakharia, de ma Koano Yoasö wanïki o doomu madorou gënanga magoronaka. Unanga aha wohiningaua ai oa-oa de aisetia o Yoyada o Zakharia aiama. Mangale aipareta makoano, o Zakharia iwikaweli de o helewo hiädono wohonenge ma Jou Ai Tau maloaoka. Maöraha aha wohonenge, o Zakharia wopoaka, ”Tanu ma Jou wamake niamanarama nënanga de wabalahi!”

²³O taongo genangö, maöraha itagali, o Siria manga tentara yaparangi o Yehuda de o Yerusalem. Onanga yätoma mata-mata o tutuda de yao okiahonanga yaora-oraino mangöe o Damsyikika.

²⁴O Siria manga tentara manga huhutulu dika mä ma Jou wämal̄aika önanga yahihanga o Yehuda manga tentara iholoi yowöe, karana o Yehuda manyawa iwilegaikaua ma Jou toönanga manga ete de manga tohora manga Jou madutu. De madodagi gënanga ma Jou wihukumu ma Koano Yoas.

²⁵O Yoas iwil̄abo kohadubuho. Manga haturu manga tentara yoikoka, aipegawe yahinoto imahigaro madorou. Onanga iwi toma ünanga aingidu-ngidu mangïoka hokä mabalahi ma Imam Yoyada ai ngohakika iwitoma-toma. Ma Koano Yoas iwilungunu o Daud aikotaka, ma o kokoano manga jereokaua. (

²⁶O nyawa imahi kokagaro madorou iwilawani ünanga ganga o ngo Zabad o Simeat ngoi ora o Amon mangoheka, de o ngo Yozabad o Simrit ngoi ora o Moab mangoheka.)

²⁷Ma jarita yakorona o Yoas aingoha-ngohaka, yakorona yaheto-hetongoka itotorou mangale ünanga, de yakorona sarakia ünanga wohidiai ma Jou Ai Tau, mata-mata imanoa o Kokoano manga Buku mahitararono mabuku magoronaka. O Amazia, o Yoas aingohaka, wodadi o koano witagali ai ama.