Read Tobelo O TAWARIKH MAHINOTOKA 25 Bible Online

O TAWARIKH MAHINOTOKA 25 - Tobelo bible

O TAWARIKH MAHINOTOKA 25

¹O Amazia wodadi o koano maöraha aiumuru o taongo monaoko de motaa, de ünanga wopareta o Yerusalemoka o taongo monaoko de hiwo madekana. Ngoi ayo enagënanga o ngo Yoadan o Yerusalemino.

²O Amazia wadiai ma Jou Ai hininga yasanangi, mä de aihininga mahononga.

³Ai gogere ikuatoka de majapati, ünanga wahukumu yohonenge o pegawe-pegawe iwitötoma-toma aiama.

⁴ Ma’ o pegawe-pegawe manga ngoha-ngohaka gënanga watomaua karana ünanga wamoteke ma Jou Ai pareta o Musa ai Buku magoronaka mabetongo, ”Uha niahukumu yohonenge manga dimono karana o dorou yadodiai toönanga manga ngoha-ngohaka, de uha niahukumu yohonenge o ngoha-ngohaka karana o dorou yadodiai toönanga manga dimono. O nyawa moi-moi duga-duga yakunu yahukumu yohonenge karana o dorou yadodiai mahirete.”

⁵Ma Koano Amazia wätoomu mata-mata o Yehuda de o Benyamin manga hoana manyawa daha wahuloko önanga imaoko imamoteke manga ahali moi-moi, wätuda o tentara yaribuhu moi manga duduono manga baluhu de o tentara yaratuhu moi manga duduono manga baluhu. Ipaha ünanga wairiki hagala o nyawa manga umuru o taongo monaoko de ihikail̄e yakunu yoparangi de yosawaro yapake o kuama de o dadatoko. Onanga manga ngöe naga yaribuhu oratuhu hange.

⁶Mahomoa de gënanga ünanga wahewa o tentara o Israelino yaribuhu oratuhu moi de mabobangu o haaka done mudukua o kilo hange de o ons iata.

⁷Mä womatengo o nabi woboa makoanoika de wotemo, ”Uha näpake o Israel mapajurete-pajurete gënanga, hababu ma Jou wariwoua o Israeloka maumati o Koremieil̄e mapareta gënanga.

⁸Mä nako Jou Koano näpake onangö, ma Jou Madutu aha wonimal̄aika Jou Koano inihihanga o haturu ngaroka Jou Koano anitentara yokuata de yobarani. Hababu duga-duga ma Jou Madutu dika wokuaha wohidöaka youtumu ëkola yohihanga.”

⁹”Mä sarakia de mata-mata o haaka tohidöa-döakoka onangika?” o Amazia woleha. O nabi gënanga wohaluhu, ”Ma Jou wakunu wohigilio Jou Koanoika iholoi de gënanga!”

¹⁰Karana gënanga o Amazia wahibebasi o pajurete-pajurete wahewa-hewa gënanga daha wahuloko önanga yolio manga bereraika. Onangö yolio, ma’ de duru yongamo.

¹¹O Amazia wohibarani aidiri de waao aitentara o Asin ma Waiika. Dokengoka önanga imateke parangi ikali yatoma o Edom manga tentara ya 10.000.

¹²Yaribuhu ngimoi mahomoa yatagoko. Onanga yaao ol̄oku o helewo matubuil̄e o Sela makotaka daha yahikaweli daukuku hiädono yohonenge.

¹³O öraha utu gënanga o Israel manga popajurete o Amazia wahulo-hulokoka yolio, de wahigumal̄aua yonïki yoparangi, yaparangioka o Yehuda makota-kota o Samaria de o Bet-Horon mahidogorona. Onanga yatoma ya 3.000 ikali yaora manga kia honanga kohangöe.

¹⁴O Edom manga tentara yahihanga ibötino, o Amazia wolio wao o Edom manyawa manga gomanga madulada-dulada de wohigogere o Yehudaka. Daha ünanga woduhuku o dupa mangale o dulada-dulada gënanga de wahuba.

¹⁵Ai manarama gënanga ma Jou idadi wongamo. Unanga wihuloko womatengo ma nabi o Amaziaika. O nabi gënanga wato, ”Yadodoa Jou Koano nahuba o hoana mahomoa manga gikiri yakunua yahihalamati manga hoana mahirete Jou Koano anikuahaino?”

¹⁶”Nomarïdi,” o Amazia wato, ”Nako kowali, ngomi minitoma ngona! Komamoiuahi ngomi minigoraka ngona nodadi makoano ninonasihati!” Daha o nabi gënanga womarïdi, mä kowahi de gënanga ünanga wakunu wotemo, ”O öraha nënanga ngohi tohiöriki ma Jou Madutu waputuhoka mangale wonibinaha Jou koano karana animanarama Jou Koano gënanga, de karana Jou Koano nolegaikaua tongohi ahinasihati.”

¹⁷O Amazia o Yehuda manga koano de iwinönonasihati imahikagaro madorou yalawani o Israeloka. Unanga wahidingoto aihuhuloko o Yoasika, o Israel manga koano, o Yoahas aingohaka, o Yehu aidanongo, mangale wigahoko ünanga imateke parangi.

¹⁸Mä ma Koano Yoas wohidingoto o bobaluhu nënanga, ”O öraha moiuku o momo mahohihika o Libanon mal̄okuoka ihidingoto magogahoko nënanga o liwewuru mautuika, ’Hei liwewuru mautu, nohidöaka aningohaka o moholehe ahingohakika mangale idadi ngoi hekata.’ Mä ipaha o aiwani o honganika o dutu moi yatilakuru genangino yapito-pitoko o momomahohihika gënanga.

¹⁹Ngona, o Amazia nomahil̄e ngona nahihangoka o Edom manyawa, mä iholoi yaoa ngona nogogogere dika o tauoka. Mangale okia nolingi-lingiri o hali duga-duga aha nohibodito anidiri de anikawaha?”

²⁰Mä o Amazia, o Yehuda manga koano wolegaikaua aidemo-demo o Yoas o Israeloka manga koano. De igoungu ma Jou Madutu womau hupaya o Amazia iwihihanga karana ünanga wahubaka o Edom manyawa manga gomanga madulada.

²¹Karana gënanga o Yoas womagoraka de ainyawa o Bet-Semesika de imateke parangi de o Amazia dokengoka.

²²O Yehuda manga tentara yohihanga de mata-mata manga pajurete yopiringana yolio manga tauika moi-moi.

²³O Yoas witagoko o Amazia de wiao o Yerusalemika, daha wakilianga o kota mabebeno o mehele gënanga magurutika done o metere o ratuhu hinoto, mulaenge o Efraim ma Ngorana maamo-amoko hiädono o Libuku ma Ngorana maamo-amoika.

²⁴Mata-mata o gurasi de o haaka ikali mata-mata o pakakaha wamake ma Jou Ai Tauoka de naga o Obed-Edom wogögoa-goana, mata-mataö o kadato maarata, kamamoi o nyawa yatumu-tumunguku yamuruono naga o Yoas waao o Samariaika.

²⁵O Yoas o Israeloka manga koano wohonengoka, o Amazia o Yehuda manga koano kawowangohioli o taongo ngimoi de motoa.

²⁶Mamulaenge o Amazia wimal̄a ma Jou, o nyawa imahikagaro madorou iwilawani ünanga o Yerusalemoka. Karana gënanga, ünanga woara o Lakhis makotaika, mä aihaturu-haturu iwiginïki ünanga dokengika de iwitoma. Ai mayeti yao de o kuda o Yerusalemika, daha yalungunu o kokoano manga Jereoka o Daud aikotaka. Majarita mahomoa yakorona ma Koano Amazia mamulaenge hiädono aipareta mabobaha itulihi o Yehuda de o Israeloka manga Kokoano manga jarita mabuku magoronaka.