Read Tobelo O TAWARIKH MAHINOTOKA 26 Bible Online

O TAWARIKH MAHINOTOKA 26 - Tobelo bible

O TAWARIKH MAHINOTOKA 26

¹O Amazia wohonengoka, o Yehuda makawaha yongodumu iwiiriki aingohaka o nauru o Uzia wodadi o koano. O öraha gënanga ünanga aiumuru o taongo ngimoi de butanga. Ngoi ayo amiromanga o ngo Yekholya, o Yerusalem mangoheka. O Uzia wopareta o Yerusalemoka o taongo moritoa de hinoto madekana. Unanga waora de wohigoko okali o Elot makota.

⁴Hokä aiama, o Uzia o wodiai yasanangi ma Jou Ai hininga.

⁵O Zakharia ganga airohani manasihati. Madekana o Zakharia wowangohi, o Uzia de aisetia wopuji ma Jouika hiädono ma Jou wihibarakati.

⁶O Uzia imatekeparangi walawani o Filistin manyawa. Unanga wakilianga mabebeno-bebeno o mehele o Gat makota, o Yabne, de o Asdod, daha wohigoko o kota-kota mabebeno o mehele o Asdod madatekoka de madaera mahomoaka o Filistinoka.

⁷Ma Jou Madutu wiriwo ünanga wahihanga o Filistin manyawa, de o Arab manyawa yogögogogere o Gur-Baaloka ikali o Meunim manyawa.

⁸O Amon manyawa o soungu yofangu o Uziaika. Unanga iholoi wokuaha hiädono airomanga yogihene hiädono o Mesirika.

⁹Mangale wakuata o Yerusalem makota, o Uzia wohigoko o menara o Libuku ma Ngorana ma Amo-amoko ma Ngoranoko, o Wai ma Ngorana ma Amo-amokoka de o bebeno o mehele madupukoroka.

¹⁰Unangö wohigoko o menara-menara mabebeno o mehele o tonaka malua-luasi madaeraoka, de wofaiti o humu kohangöe karana ai aïwani o gigini duru kohangöe, yaoa o tonaka irata-rata ikokurutil̄e yaoa o tonaka irata-rata itötotipokouku o wange madumuniha idaduoka. Karana ünanga iholoi wodibanga o dumuleika, daha ünanga wahimanarama o nyawa manga ngöe mangale ihidebini o angguru madodumule madaera de mal̄oku-l̄okuoka, de mangale yamanarama o tonaka madaera i boburereoka.

¹¹O Uzia toünanga aitentara komanga ngöe hokogenangika kaimahidodiai mangale yoparangi: Onanga de manga rimoi-rimoi mangangöe yatulihi yahinoto makoano aisekretaris, enagënanga o Yeiel de o Maaseya o Hananya aitutuda matimioka, womatengoani makoano imamanarama moi manyawa.

¹²O tentara yongodumu de manga dae-daeoka gënanga manga ngöe ya 307.500 yatuda o tentara manga baluhu ya 2.600. Onanga mata-mata toönanga manga kuata duru kohäamoko mangale yoparangi de iwiriwo makoano mangale yahohihanga o haturu.

¹⁴O Uzia wahidongodumika aitentara gënanga de o dadatoko, o kuama, o sapeo o waja, o baju o behi, o toimi mal̄eha de madoto, ikali o gatepel mahelewo.

¹⁵O Yerusalemoka yanönako-nako aidaë yodiaioka o daë yakunu ihimeta o toimi madoto de o helewo mapako-pako o menara magoronaino de o kota mabebeno o mehele malibuku-libukuino. O Uzia iwigihene o kiaka honanga, de ünanga wodadi duru wokuaha karana ma Jou Madutu duru wiriwo ünanga.

¹⁶Ma Koano Uzia wokuatoka, ünanga idadi wöedenge, de gënanga idadi hababu wobinaha. Unanga watilakuru ma Jou Ai Jou Madutu Ai pareta karana wongohama ma Jou Ai Tau mangale wotuhuku o dupa, o dupa mahuba mangï mal̄okuoka.

¹⁷Mä ma Imam Azarya kamamoi o imam mahomoa ya 80 yokua-kuata de yobarani iwinïki ünanga mangale yalawani aimanarama gënanga.

¹⁸ Onanga yato, ”Jou Koano no Momulia! Jou Koano anihakua notuhuku o dupa mangale ma Jou. Genanga manga manarama o imam-imam o Harun aidifauku, hababu onangala yahitingakoka mangale gënanga. Kokiani Jou Koano namal̄a o ngï madebi-debini nënanga! Jou Koano nilawanoka o Jou, ma Jou Madutu, de namakeokauaoli Ai barakati.”

¹⁹O öraha gënanga o Uzia magogiria womaokoino o dupa ihihuba-huba mangï madatekoka ma Jou Ai Tauoka de wohitö tuhu-tuhuku o dupa aigiamoka. Unanga wangamo o imam-imamika gënanga, de itodokanino iwidupuda o pado hoboborohono aibimaoaoka.

²⁰O Azarya de o imam-imam mahomoa iwipulono unangika de duru yatodokana, daha iwigegoto hupaya ünanga wamal̄a ma Jou Ai Tau. Unanga womatai-taiti wohupu karana ma Jou wihukumoka.

²¹Hiädono wohonenge ma Koano Uzia aipanyake gënanga i togu-togumokaua. Unanga iwitingakika o tau moioka de iwihigumal̄aokauaoli wongohama ma Jou Ai Tau. Unanga iwihibebasi aimanarama-manaramino, de aingohaka o nauru o Yotam wapareta o kawaha hokä aiwakili.

²²Majarita mahomoa yakorona ma Koano Uzia aipareta, watulihoka ma Nabi Yesaya o Amos aingohaka.

²³ Maöraha wohonenge, o Uzia iwijere o kokoano manga jere matonaka madatekoka, mä manga jereokaua gënanga mahirete, hababu ünanga wopanyake o pado hoboborohono. Aingohaka o nauru o Yotam wodadi o koano witagali ünanga.