Read Tobelo O TAWARIKH MAHINOTOKA 28 Bible Online

O TAWARIKH MAHINOTOKA 28 - Tobelo bible

O TAWARIKH MAHINOTOKA 28

¹O Ahas wodadi o koano aiumuru o taongo monaoko, de ünanga wopareta o Yerusalemoka o taongo ngimoi de butanga madekana. Unanga wanïkua o dulada maoa-oa ma Koano Daudino, aiete de aitohora, duga-duga wadiai yasanangua ma Jou Ai hininga.

²Unanga wowango hokä o Israeloka manga kokoano de wahuloko o nyawa yodiai o Baal madulada-dulada o gurasi de o haakaino,

³ikali wotuhuku o dupa o Hinom ma Waioka. Maboboloi aingohaka o nauru mahirete wihihuba hokä o huhuba o gomangika, imamoteke manga biaha itotorou hagala o nyawa wadöduhu-duhuoka ma Jou o Kanaan mabereraino maöraha o Israel manyawa yongohama o berera gënanga.

⁴O Ahas wohihuba o huhuba de wotuhuku o dupa o gikiri yahuba-huba mangï-ngïoka ol̄oku-l̄okuoka de o gota-gota mahoka irubu-rubu matimioka.

⁵ Karana ma Koano Ahas wobaradoha, ma Jou Ai Jou Madutu wimal̄aika ünanga iwihihanga o Siria manga koano waaoö o Yehuda manyawa kamangangöe o Damsyikika hokä o dagokino. Ma Jouö wimal̄aika ünanga wihihanga ma Koano Pekah o Remalya aingohaka o Israelino, o wange moi magoronaka yätoma ya 120.000 o Yehuda manga tentara yobobarani. Ma Jou, toönanga mangaete de mangatohora manga Jou Madutu wämal̄aika mata-mata gënanga idadi, karana o Yehuda makawaha iwilega ikaokauaoli ma Jou.

⁷O Zikhri o Israeloka manga tentara manga baluhu womatengo, witoma o Ahas aingohaka o nauru airomanga o Maaseya. O Zikhriö wätoma o Azrikam wohidodailako makoano ai kadato, o Elkana, makoano aigiama maniraka.

⁸Ngaroka hagala o Yehuda manyawa ganga imako hoana moi o Israeloka, mä o Israeloka manga tentara yatagoko o ngongoheka de o ngoha-ngohaka ya 200.000, daha yaao önanga o Samariaika kamamoi de okiahonanga yaora-ora ino duru kohangöe.

⁹Ma Jou Ai nabi womatengo airomanga o Oded wogogere o Samaria makotaka. Maöraha o Israeloka manga tentara yolio yaao yatago-tagokino o Yehudaino, o Oded wabuhukika önanga maöraha önanga ahaö yongohama o kota. Unanga wätemo, ”Ngini niahihangoka o Yehuda manyawa karana ma Jou niaete de niatohora manga Jou Madutu wangamo onangika. Mä ma Jou woihene sarakia ngini koiwa niadora niatoma o Yehuda manga tentara gënanga.

¹⁰De o örahanënanga hagala o Yerusalem manyawa de o Yehuda nimau niahidadi niagogilaongo! Nihiörikua ngini, nginiö nibaradohaka ma Jouika nia Jou Madutu?

¹¹Niihene! Niatago-tagokino nënanga ganga niaröriadodoto. Hoʼ, niahuloko önanga yolio. Nako kowali, ma Jou aha wongamo de winihukumu ngini.”

¹²O Israelino manga balu-baluhu yaruata, enagënanga o Asarya o Yohanan aingohaka, o Berekhya, o Mesilemot aingohaka, o Yehiskia o Salum aingohaka de o Amasa o Hadlai aingohaka, yalawanö manga manarama o tentara yolö lio-lio gënanga.

¹³Onanga yato, ”Uha niao niatago-tagokino gënanga nenangino! Ngone hobaradohaka ma Jouika, de tongone nanga baradoha-baradoha iyaoaka maamoko mangale wonahukumu. O örahanënanga ngini nimau nidiai okianaga moi duga-duga aha yodogo tongone nanga howono.”

¹⁴Daha o popajurete gënanga yahilapahi yatago-tagokino de manga kiahonanga yaora-oraino gënanga o kawahaika de toönanga manga tutuda-tutudaika.

¹⁵Daha o baluhu yaruata gënanga imaoko mangale yahidailako yatötago-tagokino genanga. Onanga yahikodoku o pakeanga okiahonanga yaora-ora yatotago-tagokinoika yopoparalu. Onangö yahikodoku o sapatu, o inomo de yaö oke-okere. Yatago-tagokino manga nabo-nabo yahouru de o zaitun maminya. Mangale imadagi duru komanga mobole, yahidoa o keledai il̄e, daha mata-mata yatago-tagokino gënanga yaao o Yerikhoika, o kurma mautu-utu makota, hupaya önanga yakunu yolio toönanga manga kapongo malöaika o Yehudaoka. Iböto gënanga o Israel manyawa yolio o Samariaika.

¹⁶Hagala o Edom manyawa mulaengoli yaparangi o Yehuda de o nyawa manga ngöe yatagoko. Karana gënanga ma Koano Ahas wogahoko o Tiglat-Pileserika, o Asyur manga koano, hupaya wohidingoto airoriwo.

¹⁸O öraha genangö hagala o Filistin manyawa magogiria yaparangi o kota-kota o l̄oku matimino madaeraoka o wange madumuniha idaduoka, de o Yehuda o koreharail̄e idaduoka madaeraoka. Onanga yaora o Bet-Semes makota, o Ayalon, de o Gederot, ikali o kota Sokho, o Timna, de o Gimso ikali o desa-desa o kota hange gënanga magilolitino, daha yogogere genangoka.

¹⁹Karana o Ahas o Yehuda manga koano wimal̄aka ma Jou de wapareta o kawaha hokä madiaiokaua, daha ma Jou wodotagao o huha o Yehudaoka.

²⁰O Asyur manga koano gënanga woboa mangale wiriwoua o Ahas, mä mangale wihihuha.

²¹Pakisa o Ahas wal̄ë o gurasi ma Jou Ai Tauino, o kadatoino, de o kawaha manga tutuda manga tau-tauino, daha wohilapahi o Asyur manga koanoika. Mä genangö ibaragunaua unangika.

²²O hali duru ihuhuba gënanga magoronaka, o Ahas koaho duru iholoi wobaradoha ma Jouika.

²³Unanga wohibodito ai diri de ai kawaha karana wohihuba o huhuba o Siria manyawa manga giki-gikirika iwihihihangoka ünanga. Unanga womapikiri, ”O Siria manga Giki-gikiri yariwoka o Siria manga kokoano, hoʼ nako ngohi tohihuba o huhuba onangika, mudukua ngohiö aha ihiriwo.”

²⁴Ipaha ünanga wal̄ë mata-mata ma Jou Ai Tau mapakakaha de wawedere. Daha wabeno ma Jou Ai Tau, de wohigoko o huhuba-huhuba mangï o Yerusalem ingodumu.

²⁵O kota de o kapongo yogetongo o Yehudaoka ünanga wohigoko o gomanga yahuba-huba mangï-mangï mangale yoduhuku o dupa o hoana mahomoa manga giki-gikirika. De hoko gënanga unanga wodiai ma Jou Ai ete-ete de ai totohora manga Jou Madutu wingamo unangika.

²⁶Majarita mahomoa yakorona aipareta de mata-mata ai manarama mamulaengoka de yaino hiädono mabaha itulihi o Yehuda de o Israeloka manga Kokoano manga Sejara mabuku magoronaka.

²⁷ O Ahas wohonenge; de iwilungunu o Yerusalemoka o kokoano manga jere okaua. Aingohaka o nauru o Hizkia wodadi o koano witagali ünanga.