Read Tobelo O TAWARIKH MAHINOTOKA 29 Bible Online

O TAWARIKH MAHINOTOKA 29 - Tobelo bible

O TAWARIKH MAHINOTOKA 29

¹O Hizkia wodadi o Yehuda manga koano aiumuru o taongo monaoko de motoa, de ünanga wopareta o Yerualemoka o taongo monaoko de hiwo madekana. Ngoi ayo amiromanga o ngo Abia o Zakharia ngoiora.

²O Hizkia wodiai ma Jou Ai hininga yasanangi hokä ma Koano Daud aiete de aitohora.

³O mede mamoioka o taongo mahira aipareta magoronaka, o Hizkia wähelenga ma Jou Ai Tau mangora-ngorana de wähuloko o nyawa ihidiai.

⁴O Imam-imam de o Lewi manyawa wähuloko imatoomu o löaoka ma Jou Ai Tau o wange mahiwaroka idaduoka,

⁵de ünanga imateke ade-ade dede önanga dokengoka. Unanga wätemo, ”Ngini, hagala o Lewi manyawa, kiani nihitingaka niadiri mangale ma Jou, de niatebini ma Jou Ai Tau, niaete de niatohora manga Jou Madutu. Mata-mata yapöpese-peseke o tau gënanga kiani nihirehene.

⁶Tongone nanga ete de nanga tohora yosetiaua ma Jouika tongone nanga Jou Madutu de önanga yodiai yasanangua Ai hininga. Onanga iwilegaikaua ”Unanga de yahaduliua Ai gogere mangï.

⁷Önanga yabeno ma Jou Ai Tau mangora-ngorana de yahonenge mahilo-hilo. Onanga yotuhukua o dupa ma Jou Ai Tauoka, de ihihubaua o huhuba ituhu-tuhuku ma Jou Madutuika o Israeloka manyawa iwihö huba-huba.

⁸Daha ma Jou Ai gangamo magoronaka wähukumu o Yehuda de o Yerusalem manyawa. De ngini mata-mata nihiöriki hokokia ma Jou Ai manarama gënanga yadiaioka mata-mata o nyawa yatodokana de yaporohono.

⁹Tongone nanga ama-ama yohonenge o parangi magoronaka, de tongone nanga hekata de nanga ngohaka yaao hokä o dagokino.

¹⁰O öraha nënanga ngohi tomau todiai o jaji de ma Jou, o Israeloka manga Jou Madutu, hupaya ”Unanga wonangamookauaoli ngoneino.

¹¹Ahi ngoha-ngohaka, uha niatuda-tudaoli, hababu ma Jou winiiriki ngini mangale niwipuji de nimahigilaongo Unangika ikali nituhuku o dupa de niatuda o kawaha mangale yopuji.”

¹²Hagala o Lewi manyawa yoboa-boaino o öraha gënanga ganga: O Kehat aiahalino: O Mahat o Amasai aingohaka, de o Yoël o Azarya aingohaka O Gerson ai ahalino: O Yoah o Zima aingohaka, de o Eden o Yoah aingohaka O Elisafan aiahalino: o Simri de o Yeiel O Asaf aiahalino: o Zakharia de o Matanya O Heman aiahalino: o Yehiel de o Simei O Yedutun aiahalino: o Semaya de o Uziel.

¹⁵Ipaha önanga yatoomu hagala o Lewi manyawa mahomoa, de önanga mata-mata ihitebini manga diri. Iböto gënanga, imamoteke de makoano aipareta, o imam-imam yowohama ma Jou Ai Tauika de mulaenge imatebini imamoteke ma Jou Ai tita. Mata-mata ipöpese-peseke yao ihihupu ma Jou Ai Tau malöaika. Genangino o Lewi manyawa yao o Kidron ma Wai ika o kota maporetoka.

¹⁷O manarama gënanga yamulaenge mawange moioka mamede mamoioka. O wange tufange önanga yaböto yatebini ma Jou Ai Tau malöa ingodumu hiädono matau mahimangoka. Ipaha o wange tufangeoli madekana önanga yatebini o tau gënanga mata-mata hiädono iböto mawange ngimoi de butangaka o mede gënanga.

¹⁸Daha hagala o Lewi manyawa gënanga ihingahu ma Koano Hizkiaika, ”Ngomi miabötoka miatebini ma Jou Ai Tau mata-mata idogoika o huhuba ituhu-tuhuku mangï, o meja mangale o roti ihidödiai, de mapakakaha mata-mata.

¹⁹Ngomiö mial̄ë okaoli o pakakaha-pakakaha wohi tinga-tingaka ma Koano Ahas maöraha ünanga wilegaikaua ma Jou maöraha aipareta magoronaka. Mata-mata o pakakaha gënanga ngomi mihitingakokaoli mangale ma Jou, de öraha nënanga naga o huhuba mangï mahimangoka.”

²⁰Wotamä itotedekanua ma Koano Hizkia watoomu o kawaha manga balu-baluhu, daha yoiki imakinïki önanga ma Jou Ai Tauika.

²¹Mangale o huhuba o baradoha maapongo mangale makoano aitau madol̄a manyawa de o Yehuda makawaha, de mangale ihitebini ma Jou Ai Tau, önanga yoao o hapi manauru tumidi, o duba manauru tumidi, o duba mangohaka tumidi, de o kabingi manauru tumidi, Ma koano wahuloko o imam-imam o Harun aidifauku ihi huba hagala o aiwani gënanga o huhuba mangï mal̄okuoka hokä o huhuba ituhu-tuhuku.

²²Hagala o hapi gënanga yatoaka daha o imam-imam ihituagi maawunu o huba mangïuku. Ipaha önanga yadiai hokogenangoli de o duba tumidi de o duba mangohaka tumidi gënanga.

²³Mabaha önanga ya l̄ë hagala o kabingi gënanga de yao makoanoika de o kawaha magogiria yopuji genangoka, daha önanga mata-mata yakelenga toönanga manga giama hagala o kabingi gënanga mal̄okuoka.

²⁴Iböto gënanga hagala o kabingi yatoaka o imam-imam de maawunu yoguhe o huba mangïuku hokä o huhuba manga baradoha maapongo o kawaha yongodumu. O hali gënanga önanga yadiai karana makoano wahiparetaka hupaya yadiai o huhuba ituhu-tuhuku de o huhuba o baradoha maapongo mangale o Israeloka makawaha yongodumu.

²⁵Imamoteke de o hidumutu-o hidumutu ma Jou wohidödöa-döaka o Daudika itilakuru ma Nabi Gad, womanarama mangale makoano de itilakuru ma Nabi Natan, makoano wahigogere hagala o Lewi manyawa ma Jou Ai Tauoka mangale ihigogule o kecapi de o gambus,

²⁶hokä wapöpake-pake o Daud. O imam-imamö wahigogere genangoka de o trompet.

²⁷O Hizkia wohidöaka o nonako hupaya o huhuba ihihuba maupacara yamulaenge. Magogiriaka o huhuba ihihuba, hagala o nyawa mulaenge ihinyanyi o higiriri manyanyi ma Jouika, de ihigogogule o musik yawuwu o trompet ikali o musik mapakakaha mahomoa.

²⁸Ma Koano Hizkia de mata-mata o nyawa naga genangoka yatilabukuku iwihuba ma Jou maöraha yonyanyanyi gila-gila yonyanyi de ihigogogule o musik gila-gila ihigogule manga musik hiädono mata-mata o huhuba gënanga youku imata.

³⁰Ma koano de o kawaha manga balu-baluhu yahuloko hagala o Lewi manyawa ihinyanyi mangale ma Jou o higiriri watotuli-tulihi o Daud de ma Nabi Asaf. Mata-mata o nyawa yonyanyi de duru manga morene ikali yatilabukuku de iwihuba ma Jou Madutu.

³¹Iböto gënanga o Hizkia wätemo, ”Karana ngini örahanënanga inihitingakoka mangale ma Jou, done hokä niasyukur ma hu huba ngini kiani niao o huhuba ma Jou Ai Tauika.” Daha o nyawa mata-mata yoboa-boaino genangoka yao hagala manga huhuba gënanga, i goungu nagaoli de manga hininga mamorenoka yoao hagala o aiwani mangale ihihuba hokä o huhuba i tuhu-tuhuku.

³²Onanga yoao o hapi manauru moritumidi, o duba o ratuhu moi, o duba mangohaka o ratuhu hinoto, ikali ihihuba mangale o hu huba i tuhu-tuhuku ma Jouika.

³³Onangö yoao o hapi manauru o ratuhu butanga de o duba o ribuhu hange mangale ihihuba de yaol̄omo imakinïki mata-mata yoboa-boaino.

³⁴O imam-imam imahi tebi-tebinoka manga diri duru yohutuluholi manga ngöe mangale yahelenga makai mata-mata o aiwani gënanga. Hababu gënanga önanga yariwo hagala o Lewi manyawa, karana o Lewi manyawa i holoi yosetia ihitebini madatorika. Onanga kahirahi yariwo hiadono naga yaoaka o imam ihi tötebi-tebinoka mangadiri.

³⁵Ma homoa de o huhuba ituhu-tuhuku, o imam-imam ö ihihuba o haki o sukur mahuhubaino yaöol̄o-ol̄omo o kawaha. Onangö ihi huba o angguru yoguhe ihikinïki o huhuba ituhu-tuhuku gënanga. Hoko gënanga o puji ma Jou Ai Tauoka yadiaioli.

³⁶Daha yasanangi manga hininga ma Koano Hizkia de aikawaha karana öraha madipoko magoronaka Jou Madutu wariwoka önanga yadiai mata-mata gënanga.