Read Tobelo O TAWARIKH MAHINOTOKA 3 Bible Online

O TAWARIKH MAHINOTOKA 3 - Tobelo bible

O TAWARIKH MAHINOTOKA 3

¹ Ma Koano Daud wohitantuoka ma Jou Ai Tau kiani ihigoko o Yerualemoka o Moria mal̄okuoka o Arauna o Yebus manyawa ai gandum madutu yobido-bidoro mangïoka. Ma Jou Ai Tau gënanga wamulaenge wohigoko ma Koano Salomo,

²aipareta o mede mahinotoka o taongo maiatoka.

³Magurutu o tau gënanga o metere monaoko de tumidi dema ngoata ometere hiwo.

⁴Matire mahimangika kaimatero magurutu de mangoata o tau gënanga, enagënanga ometere hiwo. Magurutil̄e o metere moritoa de iata matire doka magoronaka genanga ihilape de o gurasi madutu.

⁵Ma tire duru irorahai de o liwewuru magota ma aoto maoa-oa ihibeno de ihilape de o gurasi madutu. Malapeika o gurasi gënanga naga magarade o palem magota madulada de o rante madulada.

⁶Mahoano wohiporomu o tau gënanga de muhutika mahelewo marorahai dede o gurasi yaö ao-ao o Parwain mabereraino.

⁷Unanga wapakeö o gurasi gënanga mangale wohilape mabebeno o mehele ma Jou Ai Tau gënanga, mabala-balaki, mangorana maago-agomo de ngora-ngorana. Mabebeno-bebeno o mehele yagarade de o dodadi o horogaino de magogahuhuoka madulada.

⁸ Makamari magoronaka ihi romanga o Ngï Duru ma Debi-debini magurutu ometere hiwo de mangoata ometere hiwo, imatero de ma Jou ai Tau gënanga mangoata. O ton monaoko o gurasi yapake mangale ihilape mabebeno-bebeno o mehele o Ngï Duru ma Debi-debini gënanga

⁹de o gurasi o gram 570 mangale yadiai o paku. Makamari-makamari mabebeno o mehele oderuil̄e il̄öl̄oku-l̄okuö ihilape deo gurasi.

¹⁰Ma koanoö wahuloko yomomanarama gënanga yodiai o dodadi o horogaino de magogahuhuoka madulada hinoto, de o gurasi. O dulada-o dulada gënanga yalape de o gurasi de ihipake imadatekuku o Ngï Duru ma Debi-debinoka yohimangika o ngorana. O dodadi o horogaino de magogahuhuoka yogetongo gënanga toënanga magahuhu hinoto, moi-moi magurutu o metere hinoto de o sentimonaoko. Magahuhu-magahuhu hoko gënanga marupa yahoheika hiädono mabarene moi de moi imakepekeino o kamarimahi dogoronaka de mabarene mahomoa yatikika mabebeno o mehele o higili de o nirakoka. Ho, magahuhu-gahuhu gënanga yarefe magurutu o metere hiwo enagënanga imatero mangoata moi o kamari gënanga.

¹⁴ Mangale o Ngï Duru ma Debi-debini gënanga yadiaioli o guba o lenan de o ngöere mahomoa marupa mabihi-bihi, ma ungu-ungu deʼ madoka-dokara. O guba gënanga yaporomu de o dodadi o horogaino de magögahuhuoka madulada-dulada.

¹⁵Ma koano wodiai o liate hinoto moi-moi magurutil̄e o metere ngimoi de motoa de o senti moritoa, daha wohigoko ma Jou ai Tau mahimangoka. Maliate yogetongo genanga toenanga maliate mahäeke magurutil̄e o metere hinoto de o senti monaoko.

¹⁶Maliate-maliate mal̄okuil̄e genanga ihirahai de o poromu o tabagaino, marupa o rante yohakoro de o delima mahohoko o 100.

¹⁷O liate-o liate gënanga ihigoko ma Jou Ai Tau mangorana howöwoha-wohama o nirakoka de o higiloka madatekoka; o koreharail̄e idaduoka ihiromanga o Yakhin, de o koremieuku idaduoka ihiromanga o Boas.