Read Tobelo O TAWARIKH MAHINOTOKA 30 Bible Online

O TAWARIKH MAHINOTOKA 30 - Tobelo bible

O TAWARIKH MAHINOTOKA 30

¹ O Paskah marameanga yakunuahi yadiai o kawaha maöraha mede mahira magoronaka, karana o imam-imam ihitötebi-tebinoka mangadiri duru yohutuluholi manga ngöe de yowoëuahi o nyawa imatoomu o Yerusalemoka. Karana gënanga ma Koano o Hizkia de aipegawe-pegawe ikali o Yerusalem manyawa imateke rimoi mangale ihirame o Paskah gënanga o mede mahinoto magoronaka, de önanga mata-mata yosanangi de o datoro gënanga. Daha makoano wohidingoto o hurata o nyawa mata-mataika o Israel de o Yehuda yongodumu. O Efraim de o Manasye manyawaikaö. O Israel manyawa yongodumu o Dan aihöana madaera de yaino o koremieuku, waahoko ma Jou Ai Tauika o Yerusalemoka mangale ihirame o Paskah de iwihoromati ma Jou o Israeloka manga Jou Madutu hokä ihitantuoka o Musa aitita-tita magoronaka. Komamoiuahi o Paskah ihirame hokä hokogënanga.

⁶Mangale makoano aipareta de aipegawe-pegawe yahidingoto o huhuloko o Yehuda de o Israel yamode-modekika mangale yao o hura-hurata gënanga mademo hoka hokonënanga, ”O Israeloka makawaha! Ngini nilapahioka o Asyur manyawa manga kuahaino. O öraha nënanga kokiani ngini nimaidulu nimahigilaongo ma Jouika, ma Jou Madutu iwihöhuba-huba o Abraham, o Ishak, de o Yakub, hupaya unangö womaidulu winiriwo ngini.

⁷Uha hokä niaete de niatohora de hagala o Israeloka manyawa mahomoa yosetiaua ma Jouika toönanga manga Jou Madutu. Ngini niamakeoka mahirete sarakia madubuho ”Unanga wahukumu önanga.

⁸Uha niatogowini niahäeke hokä önanga, mä niwihingounu ma Jou. Niboa o Yerusalemika, ma Jou Ai Tauika wohitingakoka ma Jou nia Jou Madutu Ai dirika mangale kahiado-adonika. Niaino niwipuji Unangika hupaya itogumu Ai gangamo nginika.

⁹Nako ngini mimaidulu nimahigilaongo ma Jouika, done hagala o nyawa yaao-ao niangohaka de niariadodoto hokä o dagokino, aha yädora de yähayanga de yahigumal̄a önanga yolio. Ma Jou nia Jou Madutu ganga ma Jou Madutu yaoa-oa de Ai dora de Ai hayanga; Unanga aha winitarima ngini nako ngini nilio Unangika.”

¹⁰Maöraha o huhuloko-hu huloko gënanga yoiki o kota moioka de o kota moika o Efraim aihöana de o Manasye hiädono o koremieuku magurutika o Zebulon aihöana madaera, onanga yagogiete de yahikauku.

¹¹Mä, nagaö hagala o nyawa o Asyer aihoanino, o Manasye, de o Zebulon yomau yoboa o Yerusalemika.

¹²O Yehudaokaö ma Jou Madutu womanarama de wohirimoi o kawaha manga hininga mangale igou-goungu ihingounu ma Jou Madutu Ai mauika de yamoteke makoano aipareta de aipegawe-pegawe.

¹³O mede mahinotoka o kawaha manga ngöe imatoomu o Yerusalemoka mangale ihirame o Roti i Ragi-ragi Ua ma Wange ma Ago-agomo.

¹⁴O huba mangï-mangï o Yerusalemoka yapake mangale ihihuba o huhuba de yoduhuku o dupa o giki-gikirika, mata-mata yal̄ë de yaumo o Kidron ma Wai magoronauku.

¹⁵O wange mangimoi de maiatoka o mede gënanga önanga yotoaka o duba mangale ihihuba hokä o Paskah mahuhuba. O imam-imam de hagala o Lewi manyawa kayopesekohi, idadi duru yamal̄eke. Onanga ihitebini manga diri hiädono yakunu ihihuba o huhuba ituhu-tuhuku ma Jou Ai Tauoka.

¹⁶Onanga moi-moi imal̄ë o ngï ma Jou Ai Tauoka imamoteke ihi tatantuoka ituli-tulihi o Musa ai Tita mabuku magoronaka. O awunu o huhuba-huhubaino gënanga ihilapahi o Lewi manyawa o imam-imamika, daha önanga yoguhe o huba mangïuku.

¹⁷Manga ngöe o nyawa yoboa-boaino genangoka manga hidogoronaino ihitebinuahi manga diri, hoönanga yakunua yotoaka o duba mangale o Paskah mahuhuba. Karana gënanga hagala o Lewi manyawa la yadiai o hali gënanga mangale önanga de ihihuba ma Jouika.

¹⁸Mahomoa gënanga, hagala o Efraim manyawa manga hidogoronaino, o Manasye, o Isakhar, de o Zebulon, manga ngöe yoboa iholoi ihira ihitebinuahi manga diri. Hoʼ, önanga ihirame o Paskah gënanga de ihitotomua madodagi. Karana gënanga ma Koano Hizkia womaniata mangale önanga, wato,

¹⁹”Jou, Jou Madutu, tongomi mia ete de mia tohora inihö horomati, tanu Ani hininga maoaino Ngona nahi apongo önanga magogiria yopuji Ngonaika de manga hininga magahu-gahumu, ngaroka önanga yatebinuahi manga diri.”

²⁰Ma Jou woihene o Hizkia ainiata. Unanga wahiapongo hagala o nyawa genanga, de wahukumua önanga.

²¹O wange tumidi madekana, de duru yomorene hagala o nyawa imatotoomuino o Yerusalemoka gënanga yodiai o rameanga o Roti i Ragi-ragi Ua. O wange ihigetongo hagala o Lewi manyawa de o imam-imam iwi puji-puji ma Jou de magou-goungu.

²²Hagala o Lewi manyawa gënanga hoko gënanga manga sawaro yatuda o puji ma Jouika, hiädono o Hizkia wahigiriri önanga. O wange tumidi madekana ibötoönanga yajame o inomo o rameino gënanga ikali ihihuba o huhuba mangale yotemo tarima kase ma Jouika, toönanga manga ete de manga tohora manga Jou Madutu,

²³önanga mata-mata yaputuhu mangale ihigila-gila o rame gënanga o wange tumidoli. Daha önanga ihirameoli de manga morene.

²⁴Ma Koano Hizkia wahidoaka o roriwo o hapi manauru o 1.000 de o duba o 7.000. O Hizkia aipegawe-pegawe ihidoaka o roriwo o hapi manauru o 1.000 de o duba o 10.000. Mata-mata o aiwani gënanga yahidöaka o kawahaika mangale yatoaka de yaol̄omo. O imam duru komanga ngöe imahitebini manga diri.

²⁵O Yehuda makawaha, o imam-imam, hagala o Lewi manyawa, de hagala o nyawa o koremie de yail̄e, ikali hagala o nyawa maporetino yogogeroka o Israel de o Yehudaoka, mata-mata yamao youtumu.

²⁶O Yerusalem makota duru irame karana maöraha mamulaenge o Salomo o Daud aingohaka o nauru, komamoiuahi idadi öraha hokä hokonënanga.

²⁷O imam-imam de o Lewi manyawa yogahoko ma Jou Ai barakati mangale o kawaha, de ma Jou Ai ngï wogogogerino o Horogaka ma Jou Madutu woihene toönanga manga niata ikali watarima toönanga manga gogahoko.