Read Tobelo O TAWARIKH MAHINOTOKA 31 Bible Online

O TAWARIKH MAHINOTOKA 31 - Tobelo bible

O TAWARIKH MAHINOTOKA 31

¹O rame iböto ipahaino, o kawaha yongodumu yoiki o Yehudaoka makotaika yogetongo, daha yawedere o gomanga matugu-tugu, yaruba o dulada-dulada ihigoko mangale o Dewi Asyera, de yahohihanga o huba mangïngï ikali o gomanga yahuba-huba mangï. Onanga yodiai hokogenangoli o ngï-ngï mahomoaka o Yehudaoka, ikali o Benyamin, o Efraim, de o Manasye manga daeraka. Iböto gënanga önanga mata-mata yolio toönanga manga ngïka moi-moi.

²Ma Koano Hizkia wohitatapuoli o imam-imam de o Lewi manyawa manga doomu-doomu imamoteke toönanga manga manarama mahidoku. O manarama-manarama gënanga yahawoino o hali-hali hokä hokonënanga: ihihuba o huhuba ituhu-tuhuku de o dame mahuhuba, yaleleani o puji maupacara ma Jou Ai Tauoka, de iwihi giriri ikali yotemo tarima kasi ma Jouika hagala o ngïoka ma Jou Ai Tau magoronaka.

³ O aiwani o giginino mahirete makoano wohidöaka o aiwani-aiwani yopoparalu mangale o huhuba ituhu-tuhuku o ngorumino ihigetongo de o bimaoa ihigetongo, de mangale o huhuba ihihöhuba-huba o Sabat mawangeoka, o Mede ma Hungi marameoka, de o rame mahomoaoka hokä ihitotantu ma Jou Ai tita-tita magoronaka.

⁴ Mahomoa de gënanga makoano wähuloko o Yerusalem manyawa yoao o huhuba ihitotantuoka mangale o imam-imam de o Lewi manyawa, hupaya önanga yakunu toönanga manga dibanga magilamoko mata-mata o leleanika ma Jou Ai Tauoka itötuli-tulihi ma Jou Ai tita-tita magoronaka.

⁵O pareta gënanga wohingahu ibötino, o Israeloka manyawa yao ma Jou Ai Tauika manga ngongike-ngongike toönanga manga tonaka mahasilino madodihiraka, enagënanga o gopuno, o angguru, o zaitun maminya, o ohungu magula de o tonaka mahasili mahomoa. Toönanga manga kiahonanga o regu ngimoi önanga yaoö o regu moi.

⁶O nyawa mata-mata yogogogere o Yehuda makota-kotaoka yao o hidoku ngimoi o hidoku moi toönanga manga aiwani o giginino, o hapi de o duba, de magegetongo kohaamoko o ngongike-ngongike mahomoa, daha ihihuba mata-mata gënanga ma Jouika toönanga manga Jou Madutu.

⁷O ngongike-ngongike gënanga mulaenge ikokiboa o mede mahangeoka, de igila-gila ihahuru hiädono o mede matumidi.

⁸Yamake o ngongike mangöe kokogënanga, ma Koano Hizkia de aipegawe-pegawe iwihimulia ma Jou de yahigiriri o Israeloka makawaha, Ai umati.

⁹Maöraha makoano imakoketemo de o imam-imam de o Lewi manyawa mangale o ngongike-o ngongike gënanga.

¹⁰Ma Imam wo Lamo-amoko o Azarya o Zadok aidifauku wato, ”Mamulaenge o kawaha yototaka toönanga manga huhuba-huhuba ma Jou Ai Tauika, ngomi mikurangokaua o inomo, mä kaiholoi, hiädono kohangöeohi tongomi miainomo isadiauku. Mata-mata gënanga ngomi mia tarima karana ma Jou wahibarakatioka Ai umati.”

¹¹Mangale makoano aipareta, önanga yodiai o gudang-gudang ma Jou Ai Tau magilolitino,

¹²daha yagogono mata-mata o ngongike de o hidoku ngimoi o hidoku moi gënanga, o gudang-gudang gënanga magoronaka. Womatengo o Lewi manyawa airomanga o Konanya, iwihimanarama wodadi wogoana, de aidodoto o Simei wihidadi wiriwo-riwo.

¹³Toönanga manga tutuda matimioka naga o Lewi manyawa yangimoi, enagënanga: o Yehiel, o Azazya, o Nahat, o Asael, o Yerimot, o Yozabad, o Eliel, o Yismakhya, o Mahat, de o Benanya. Mata-mata o hali gënanga ihitatapu mangale manga hidumutu ma Koano Hizkia de ma Imam wo Lamo-amoko o Azarya.

¹⁴O Kore o Yimna aingohaka, o Lewi manyawa womatengo wodadi yogoa-goana manga baluhu o Ngorana ma Amo-amokoka o wange mahiwaroko ma Jou Ai Tauoka, iwihilapahi watagongo hagala moi-moi mangale watarima o ngongike-ngongike ihihö huba-huba ma Jouika, daha wohikodoku.

¹⁵O kota-kota mahomoaoka o imam-imam yogögogere mangï, o Kore iwiriwo hagala o Lewi manyawa mahomoa, enagënanga: o Eden, o Minyamin, o Yesua, o Semaya, o Amarya, de o Sekhanya. Okiahonanga yaöol̄o-ol̄omo gënanga yahikodoku imakoketero maamoko o Lewi imahi kokohoana moi manga hidogoronaka yaoa yobalu-baluhu yaoa yogögö imamoteke toönanga manga manarama.

¹⁶Mata-mata o nau-nauru manga umuru o taongo moruange de yakail̄e, yamake o hidoku o manarama o wange ihigetongo ma Jou ai Tauoka, yahidoakö manga hidoku moi-moi imamoteke mangamanarama de imamoteke manga doomu.

¹⁷O imam-imam yahitulihi imamoteke mangaahali, de o Lewi manyawa manga umuru o taongo monaoko de yakail̄e yahitulihi imamoteke mangamanarama de mangadoomu.

¹⁸Onanga yahitulihi mata-mata kamamoi de manga ngohaka de manga hekata, de hagala o nyawa mahomoa manga tau madol̄a manyawa magoronaka, hababu önanga yahipatutu imasosadia o öraha ihigetongo mangale yadiai toönanga manga manarama-manarama ihitingakoka mangale ma Jou.

¹⁹O imam-imam manga hidogoronaka yogogere o kota-kotaoka ihitötatantu mangale o Harun aidifauku, ekola o tonaka ilua-luasi o kota-kota gënanga magilolitino, yatumutu yomomanarama mangale ihikodoku okiahonanga yaol̄o-ol̄omo o nau-naurika mata-mata o imam manga tau manyawa magoronaka, de o nyawaika moi-moi itotuli-tulihi o Lewi aihöana magoronaka.

²⁰O Yehuda ingodumu, ma Koano Hizkia wohidagi o adili, wodiai irikoto, de wasanangi ma Jou Ai hininga ai Jou Madutu.

²¹Unanga wohasili, karana hagala wadodiai mangale ma Jou ai Tau ekola mangale wohingounu ma Jou Ai tita-tita, de wadiai de aihininga magahumu dede hoko genangika wihininga ma Jouika ai Jou Madutu.