Read Tobelo O TAWARIKH MAHINOTOKA 32 Bible Online

O TAWARIKH MAHINOTOKA 32 - Tobelo bible

O TAWARIKH MAHINOTOKA 32

¹Mä Koano Hizkia wadiai iböto o hali-o hali ihidumutu aisetia ma Jouika, o Sanherib o Asyur manga koano waparangi o Yehuda. Unanga wohigiloliti o kota-kota mabebeno o mehele de wahipareta aiduduono hupaya yaora.

²Mä öraha o Hizkia wohiöriki o Sanherib aidungutu waparangi o Yerusalem,

³ünanga imakinïki o pegawe-pegawe de o tentara manga balu-baluhu yaputuhu mangale yatamunu o akere mangi-ngi o kota maporetoka de madungutu hupaya hagala o Asyur manyawa imamakeua o akere nako önanga imahi ädono o Yerusalem madatekoka. O nyawa duru komanga ngöe yatoomu mangale yatamunu mata-mata o akere malako ihohahahuru o kota maporetika.

⁵Daha makoano wakuata o kota madadatoko de wohitiai mabebeno o mehele, wohigoko o menara-menara mal̄okuoka de wohigoko o bebeno o mehele mahomoa maporetoka. Mahomoa de gënanga ünanga watiai o bebeno o mehele ihigo goko-goko o tonaka yododoporono mal̄okuoka o wange mahiwaroko o Yerusalem makota mahidoku madeka-dekanuku. Unango wahuloko yodiai duru kohangöe o kuama de o dadatoko.

⁶Unanga wägoraka o tentara manga balu-baluhu mangale yahibaluhu o nau-nauru mata-mata o kota magoronaka, de wahuloko önanga imatoomu o lapangoka o kota mangorana maamo-amoko mahimangoka. Daha unanga watemo onangika,

⁷”Nima totongohono de ningaku; uha niwimodongo ma Koano Asyurika ekola aiduduonika. O kuata ngoneoka iholoi ilamoko ngaro de unangoka.

⁸To ünanga aikuata kaonyawa, mätongone ma Jou tongone nanga Jou Madutu mangale wonariwo de woparangi mangale ngone.” Onanga yoihene aidemo-demo toönanga manga koano gënanga, o kawaha idadi yobarani.

⁹O öraha muruono naga ipaha maöraha o Sanherib kamamoi o Lakhis okahi, ünanga wahidingoto aihuhuloko o Hizkiaika de o Yehuda makawaha o Yerusalemoka mangale ihiädono o behehongo nënanga, ”Ngohi Sanherib o Asyur manga koano, toigo toleha okia mahababu ngini hokogënanga niabarani mangale kahirahi nigogere o Yerusalemoka magogiria ihigilolitino genanga.

¹⁰Boteka o Hizkia wotemo ma Jou nia Jou Madutu aha winihilapahi ngini tongomi miakuahaino? Uha niwingaku, hababu ünanga duga-duga winitipu ngini. Unanga aha winidogumal̄aika ngini nihihonenge o hahini de o kiriti madudungu.

¹²Unangala wawedere o puji mangï-mangï de o huhuba mangï-mangï mangale ma Jou, daha wahuloko o Yehuda manyawa de o Yerusalem yopuji ikali yotuhuku o dupa o huba mangï moioka dika.

¹³Boteka ngini nihiörikua okia miadodiaioka ngohi de ahiete de ahitohora o hoana de o berera mahomoaika? Komaiwahi o hoana mahomoa manga giki-gikiri yahilapahi manga hoana ma Koano Asyur aikuahaino!

¹⁴O nagona moi onangino mamoi iböto yodiai o hali gënanga? Koidadiua niagikiri yakunu inihihalamati ngini!

¹⁵Uha niwimal̄aika niakoano gënanga winitipu de winihibodo ngini! Uha niwingaku unangika! Hababu komaiwa o hoana manga gikiri okiaino dika yakunu yahilapahi manga hoana makoano Asyur aikuahaino. Maraioka niagikiriö gënanga yakunua dika aha inihi lapahi ngini!”

¹⁶Ma ngöeohi o demo-demo mahomoa ihidemo o Asyur manga huhuloko-huhuloko gënanga mangale iwihikauku o Jou ma Jou Madutu de o Hizkia, ma Jou Ai gilaongo gënanga.

¹⁷Ma koano Asyurö wotulihi o hurata wilawani o Jou, ma Jou Madutu iwihöhuba-huba o Israeloka manyawa. Hoko nënanga mabetongo o hurata gënanga: ”Hagala o hoana mahomoa manga giki-gikiri yakunua yahilapahi manga hoana ahikuahaino, hoko genangö o Hizkia aigikiri gënanga, yakunua yahilapahi aihoana ahikuahaino.”

¹⁸O Asyur manga huhuloko-huhuloko gënanga ihiboaka mata-mata gënanga de o Ibranioka manga demo mangale yahawa-hawana de yatobiki manga barani hagala o Yerusalem manyawa naga o kota mabebeno o mehele mal̄okuoka, hupaya önanga yakunu yaora o kota gënanga de magapanga.

¹⁹Onanga yotemo-temo mangale ma Jou Madutu iwihö huba-huba o Yerusalemoka mangale kaimatero hokä o hoana mahomoa manga giki-gikiri, enagënanga o dulada-dulada o nyawa yadodiai.

²⁰Daha ma Koano Hizkia womaniata de ma Nabi Yesaya o Amos aingohaka, Onanga imahiboaka yogahoko o roriwo ma Jou Madutuika.

²¹Daha ma Jou wohidingoto o malaekat womatengo wätoma o Asyur manga popajurete de manga tentara manga balu-baluhu gënanga. De duru koai mal̄eke makoano Asyur wolio aibereraika. O wange moiuku maöraha ünanga magogiria aigikiri matau magoronaka, yamuruono naga aingoha-ngohakino mahirete yoboa iwitoma ünanga de o oworo.

²²Hoko gënanga madodagi ma Jou wihilapahi ma Koano Hizkia de o Yerusalem manyawa o Sanherib o Asyur manga koano aikuahaino, de toönanga manga haturu-haturu mahomoa. Ma Jou wahi döaka onangika o wowango irïdi de koiwa maruae o negara-negaraino önanga imakokadateke.

²³O nyawa manga ngöe yoboa o Yerusalemika yoao o huhuba mangale ma Jou de o hadia-hadia mangale o Hizkia, hiädono mulaenge gënanga ünanga iwihoromati hagala o hoana.

²⁴O öraha gënanga magoronaka ma Koano Hizkia wopanyake. Ai panyake gënanga hoko gënanga madubuho hiädono ünanga ngadeke wohonenge. Unanga womaniata, daha ma Jou wohidoaka o nonako unangika ünanga aha wotogumu.

²⁵Maʼ karana ünanga woedenge, ünanga wotarimakasiua mangale wotogumu, ma Jou wihidö doa-doaka unangika. Karana gënanga ma Jou wangamo o Yehuda de o Yerusalemika.

²⁶Maʼ mabahaka o Hizkia de hagala o Yerusalem manyawa imahitipokouku manga diri, done madekanino o Hizkia kawowangohi, o hukumanga gënanga wohidagiua.

²⁷Ma Koano Hizkia idadi duru wokaya, de iwihoromati o nyawa mata-mata. Unanga wodiai o kama-kamari mangale wagogono aiarata enagënanga: o gurasi, o haaka, o itanga de o folori, o rampa-rampa, o dadatoko de okiahonanga mahomoa dema ija-ijaoka.

²⁸To ünanga aiguda-gudangi mangale ai kiahonanga aitonaka mahasilino hokä: o gandum, o angguru, o zaitun maminya; o kurunga-o kurungaö mangale aihapi-hapi de aiduba-duba duru kohangöe.

²⁹Mahomoa de gënanga ünanga wohigokoö o kota mangöe. O kaya wihidödoa-doaka ma Jou Madutu unangika dema boboloi.

³⁰Ma Koano Hizkia gënanga watatoko o Gihon majobubu mahahuru, de ma akere ihahuru yanonu o heli-heli o tonaka magoronaka o Yerusalem makota magoronaika. Hagala wadodiai o Hizkia ihasili.

³¹De maöraha o Babilino manga huhuloko-huhuloko yoboa mangale iwileha unangika mangale wotogumu ihohera-heranga, ma Jou wimalaika o Hizkia wodiai mahirete, hupaya yakunu wauji ai hininga.

³²Majarita mahomoa yakorona ma Koano Hizkia, de yakorona wihininga ma Jouika, itulihi ma Jou Madutuino ai Himatoko ma Nabi Yesayaika o Amos aingohaka aibuku magoronaka, de o Yehuda de o Israeloka manga Kokoano manga Sejara mabuku magoronaka.

³³O Hizkia wohonenge, de iwilungunu o kokoano manga jere matonakoka madodoail̄e idaduoka. O Yehuda de o Yerusalem makawaha yongodumu ihidoaka manga horomati maamoko unangika maöraha ünanga wohonenge. Aingohaka o nauru o Manasye wodadi o koano witagali ünanga.