Read Tobelo O TAWARIKH MAHINOTOKA 33 Bible Online

O TAWARIKH MAHINOTOKA 33 - Tobelo bible

O TAWARIKH MAHINOTOKA 33

¹O Manasye aiumuru o taongo ngimoi de hinoto maöraha ünanga wodadi o Yehuda manga koano de ünanga wopareta o Yerusalemoka o taongo moritoa de motoa madekana.

² Unanga wobaradoha ma Jouika, karana wanïki manga biaha-biaha itotorou hagala o hoana wadoduhu-duhu ma Jou o Kanaan matonakino maöraha o Israel manyawa yongohama o berera gënanga.

³O gomanga yahuba-huba mangi-ngi wakokiliangoka aiama, o Hizkia, wohigokokali. Unanga wohigoko o huhuba mangi-ngi mangale wopuji o Baalika, de ünanga wodiai o Dewi Asyera madulada-dulada, ikali wahuba hagala o murumu.

⁴ Ma Jou wotemoka mangale kahiado-adonika o Yerusalem ganga o ngï mangale o puji Unangika, mä dokengoka ma Jou Ai Tauoka genanga, o Manasye wohigokoka o huhuba mangi-ngi mangale hagala o gikiri.

⁵Ma Jou Ai Tau maloa hinoto gënanga ünanga wohigoko o huhuba mangi-ngi mangale wahuba hagala o murumika.

⁶Ai ngoha-ngohaka wahihuba hokä o huhuba ituhu-tuhuku o Hinom ma Waioka. Unango wadiai madodagi manga manarama yohou-houru, yomai-maihi, imapopipidoro, de yogahoko o hidumutu o womaha-o womahika. Unanga duru wobaradoha ma Jouika hiädono yamomiki ma Jou Ai dohata.

⁷ O gomanga madulada wakelenga ma Jou Ai Tau magoronaka, enahioko yakorona o ngï gënanga ma Jou Madutu wotemoka o Daudika de aingohaka o naurika o Salomo, ”Ahi tau o Yerusalemoka nënanga, Taö iri-irikoka o Israeloka manga hoana ngimoi de hinoto madaera mahidogoronaino, ganga o ngï tohitantuoka hokä o puji mangï Ngohino mangale kahiado-adonika.

⁸Nako o Israeloka maumati ihingounu mata-mata Ahi pareta de yamoteke o tita-o tita Ahi gilaongo o Musa wahidödoa-doaka onangika, done Ngohi aha tamal̄aikaua önanga yaduhu o bereraino Tahidödoa-doakoka toönanga mangaete de mangatohoraika.”

⁹O Manasye wodiai o hababu o Yehuda makawaha yodiai o baradoha-baradoha iholoi itorou o baradoha yadodiai hagala o hoana ma Jou wadöduhu-duhu o Kanaanino maöraha ma Jou Ai umati yongohama o berera gënanga.

¹⁰Ma Jou witaaere o Manasye de aikawaha, mä önanga yoluku yoihene.

¹¹Karana gënanga ma Jou wadotagao o Asyur manga tentara manga kokapita yaparangi o Yehuda. O Manasye iwitagoko de o lalakete, daha iwilara de iwiao o Babilika.

¹²Ai hangihara gënanga magoronaka ünanga womahitipokouku aidiri ma Jouika ai Jou Madutu, de womaniata wogahoko Ai roriwo.

¹³Ma Jou Madutu watarima o Manasye ainiata de wihigilio ünanga o Yerusalemika mangale wopareta okali. Karana idödadadi gënanga o Manasye iwidiai wongaku ma Jou ganga o Jou Madutu.

¹⁴Ipaha o Manasye wohikurutil̄e o bebeno o mehele maporetoka o Daud ai Kota o wange mahiwaroko idaduoka. Unanga womulaenge o ngï moi o waioka de yaino o Gihon majobubu madatekoka daha gila-gila o koremieuku hiädono o Nawoko mangorana ma Amo-amoko de daera o kota yahetongo o Ofel. O kota yogetongo mabebeno o mehele o Yehudaka ünanga wahigogereö womatengo makapita.

¹⁵Unanga wohirehene o hoana mahomoa manga gikiri madulada-dulada ikali o goma-gomanga yakokelengaoka ma Jou Ai Tauoka. Unanga wakilianga hagala o gomanga mahuhuba mangï naga ma Jou Ai Tau ol̄okuoka, de o ngï-o ngï mahomoaka o Yerusalemoka. Mata-mata gënanga yao o kota maporetika daha yaumo.

¹⁶Ipaha ünanga watiai o huba mangï, o puji mangï ma Jouika, daha ihihuba genangoka o dame mahuhuba de o sukur mahuhuba. Mata-mata o Yehuda manyawa yahuloko iwipuji ma Jouika o Israeloka manga Jou Madutu.

¹⁷O kawaha kaihihubahi o huhuba ihi huba-huba mangï mahomoaka, maʼ ihi huba-huba gënanga ganga mangale ma Jou.

¹⁸Ma jarita mahomoa yakorona o Manasye, de yakorona ainiata ma Jou Madutuika, ikali ma Jou Madutu Aibehehongo-behehongo ihiado-adono unangika o nabi-nabi mangale ma Jou Ai romanga, o Israeloka manga Jou Madutu, mata-mata itulihoka o Israel manga Kokoano manga Sejara mabuku magoronaka.

¹⁹O nabi-nabi manga sejara mabuku magoronaka itulihokaö o Manasye ainiata de ma Jou Madutu Ai bobaluhu mangale o niata gënanga, ikali majarita mangale aibaradoha-baradoha ünanga womatobauahi, o gomanga yahuba-huba mangï o Dewi Asyera madulada-dulada wadodiai, de o gomanga wahuba-huba.

²⁰O Manasye wohonenge de iwilungunu o kadatoka. Aingohaka o Amon wodadi o koano witagali ünanga.

²¹O Amon aiumuru o taongo monaoko de hinoto maöraha ünanga wodadi o Yehuda manga koano, de ünanga wopareta o Yerusalemoka o taongo hinoto madekana.

²²Hokä aiama unangö wobaradoha ma Jouika. Unanga wahuba o gomanga-o gomanga wahöhuba-huba aiama de wohihuba o huhuba o goma-gomangika gënanga.

²³Mä, imahowono de aiama, o Amon womahitipokoukua aidiri de womaidulua ma Jouikaʼ ünanga koaholi iholoi wobaradoha ngaro de ai ama.

²⁴Ma Koano Amon aipegawe-pegawe imahikagaro madorou iwi lawani ünanga de iwitoma o kadatoka.

²⁵Mä o Yehuda makawaha yätoma iwitö toma-toma ma Koano Amon gënanga, daha iwigoraka aingohaka o Yosia wodadi o koano.