Read Tobelo O TAWARIKH MAHINOTOKA 34 Bible Online

O TAWARIKH MAHINOTOKA 34 - Tobelo bible

O TAWARIKH MAHINOTOKA 34

¹ O Yosia aiumuru o taongo tufange maöraha ünanga wodadi o Yehuda manga koano, de ünanga wopareta o Yerusalemoka o taongo moruange de moi madekana.

²Unanga wadiai ma Jou Ai hininga yasanangi; ünanga wanïki aidulada ma Koano Daud aiete de aitohora, de wohingounu ma Jou Madutu aitita ingodumu de itötotomo.

³O taongo tufange iböto wodadi o koano, aiumuru duru kawogö ohi, o Yosia mulaenge wopuji ma Jou Madutuika wihöhuba-huba ma Koano Daud aiete de aitohora. O taongo iata ipaha ünanga mulaenge wawedere yahuba-huba o gomanga mangï-ngï, o Dewi Asyera madulada-dulada, de o goma-gomanga mahomoa.

⁴ O dulada-dulada de o goma-gomanga gënanga yawede-wederuku o Yosia ainyawa daha maaluhu önanga ihibarihi manga lungunu mal̄okuino hagala o nyawa ihihuba-huba o huhuba o goma-gomangika gënanga. O Baal mahuhuba mangï de o dupa mahuhuba mangï naga genangoka önanga yaruba.

⁵ Ipaha o Yosia watuhuku o imam-imam manga kobo-kobongo o huba mangï gënanga mal̄okuoka, yolöleleani o goma-gomanga gënanga. De hoko gënanga ünanga wadiai o Yehuda de o Yerusalem yopatutokaoli yopuji ma Jouika.

⁶O hali kaimatero wadiaiö o kota-kotaoka de o daera-daera wawöwede-wederoka o Manasye madaera, o Efraim, de o Simeon, hiädono o Naftaliika o koremieuku.

⁷O huhuba mangï-ngï de o Asyera madulada-dulada o Koremieuku mapareta ingodumu o Yosia waruba, daha madulada-dulada de mata-mata o dupa mahuba mangï wawedere. Ipaha o Yosia wolio o Yerusalemika.

⁸Mataongo ngimoi de tufangeoka o Yosia aipareta, ünanga wahehara watebini ibötino o gomanga yahuba-huba ma Jou Ai Tauino de o berera yamode-modekika, ünanga wahidingoto o nyawa yaruange mangale yatiai ma Jou Madutu Ai Tau. O nyawa yaruange gënanga enagënanga o Safan o Azalya aingohaka, o Maaseya o Yerusalem magubernur, de o Yoah o Yoahas aingohaka, womatengo o pegawe magogurutile.

⁹Hagala o Lewi manyawa yogogoa-goana ma Jou Ai Tau ma Ngorana, ihilapahi ma Imam wo Lamo-amokika o Hilkia, o tiwi önanga yatototoomuoka. O tiwi gënanga o Efraim de o Manasye manyawaino, de o kawaha mahomoaino o Koremieuku ma Paretaka, ikali o Yehuda makawahaino, o Benyamin de o Yerusalem.

¹⁰Ipaha o tiwi gënanga ma Imam wo Lamo-amoko o Hilkia wohilapahi o nyawa yaruangeika yahimanarama mangale yogoana ma Jou Ai Tau yatiai gënanga. Gila-gila önanga ihidöaka o tiwi gënanga

¹¹o gota ihituka-tukangi de o tau ihituka-tukangika kokiani ihi ija o helewo de o gota mangale ihitiai o tau-o tau yodogumalaika ikilianga o Yehuda manga kokoano.

¹²Hagala o nyawa yomomanarama yatotiai gënanga igou-goungu yorikoto. Onanga yahibaluhu o Lewi manyawa yaruata: o Yahat de o Obaja o Merari aiahalino, ikali o Zakharia de o Mesulam o Kehat aiahalino. Hagala o Lewi manyawa, mata-mata yosawaro ihigogule o musik,

¹³yahidöaka o manarama yogoana yatoraka o pakakaha-o pakakaha, yahihäeke o buru o manarama mahidoku irupa-rupa, yomanarama o buku-buku, de yogoana o ngorana.

¹⁴Maöraha o roriwo matiwi wohihupu mangï yagögogonino, o Hilkia wamake ma Jou Ai Tita mabuku, enagënanga o tita-tita ma Jou Madutu wohidödoa-doaka o Musaika.

¹⁵O Hilkia witemo o Safanika, ”Ngohi tamake ma Jou Ai Tita mabuku ma Jou Ai Tauoka,” daha wohidöaka o buku gënanga o Safanika.

¹⁶O Safan watarima o buku gënanga, daha woiki makoanoika de wato, ”Mata-mata jou Koano nohipoparetaka ngomi miadiaioka.

¹⁷Ngomi mia l̄eoka o tiwi igogogono ma Jou Ai Tauoka, de mihilapahi yomomanarama de yogoa-goanika.”

¹⁸Ipaha ünanga wodogo, ”O Hilkia wohidöaka o buku nënanga ngohino.” Daha o Safan widabasa o buku gënanga ma koanoika.

¹⁹Woihene o buku gënanga madola, makoano wakakakihi aipakeanga karana aihininga ihuha.

²⁰Daha makoano wohidöaka o pareta nënanga o Hilkiaika, o Ahikam o Safan aingohaka, o Abdon o Mikha aingohaka, o Safan o negara ma Sekretaris de o Asaya makoano wiroriwo-riwo,

²¹”Noiki noleha ma Jouika mangale ngohi de mangale hagala o nyawa kanagahi o Israeloka de o Yehuda yakorona o buku nënaga madol̄a. Ma Jou wonangamo ngoneino karana tongone nanga ete de nanga tohora yadiaiua o pareta-pareta itötuli-tulihi magoronaka.”

²²Daha yoiki o Hilkia, o Ahikam, o Abdon, o Safan de o Asaya yogahoko o hidumutu o ngoheka momatengoika amiromanga o ngo Hulda. Munanga o nabi moi mogogere o kapongo mahungioka o Yerusalemoka. Ami rokata airomanga o Salum o Tikwa aingohaka, o Harhas ai danongo. Unanga wohidödailako o puji mapakeanga ma Jou Ai Tauoka. O ngo Hulda moihene iböto toönanga manga hitararono,

²³munanga mahuloko yolio makoanoika de ihiädono o behehongo nënanga, ”O Jou, ma Jou Madutu o Israeloka manyawa iwihöhuba-huba wotemo,

²⁴’Ngohi aha tahukumu o Yerusalem de manyawa yongodumu de o lolai-o lolai itötuli-tulihi o buku gënanga magoronaka iwidödabasa makoanoika.

²⁵Onanga ihi mal̄aoka Ngohi de ihihuba o huhuba o giki-gikiri mahomoaika. Mata-mata önanga yadodiai yamomiki Ahi gangamo. Ngohi tangamo o Yerusalemika de ahi ga ngamo yakunua imatogumu.

²⁶Mä yakorona ma Koano Yosia, nënanga Ahi behehongo, o Jou o Israeloka manga Jou Madutu: ngona kadeno ihene iböto okia itötuli-tulihi o buku nënanga magoronaka,

²⁷ngona noma toduba de nomahitipokouku anidiri Ahi himangoka. Ngohi tonihihuhaokaua mangale Tahukumu o Yerusalem de manyawa, mä maöraha ngona noihene mangale Tohi huha gënanga ngona noari de nakakihi anipakeanga manonako anihininga ihuha. Ngohi toihenoka aniniata,

²⁸karana gënanga o hukumanga o Yerusalemuku aha Togelengaokaua madekana ngona kanowangohi. Ngona aha tonihigumal̄a nohonenge dema dame.’ ” Daha yolio o huhuloko-huhuloko gënanga makoanoika de ihi ädono o behehongo gënanga.

²⁹Ma Koano Yosia waahoko mata-mata o Yehuda de o Yerusalem manga tutuda,

³⁰daha yoiki dede önanga ma Jou Ai Tauika. Imakinïki önanga yoikö o imam-imam, o Lewi manyawa de o kawaha yongodumu, yaoa yomömihikini yaoa yokökaya-kaya. Toönanga manga himangoka mata-mata maliate mabuturungu madatekoka ihitingakoka mangale makoano, makoano womaokoil̄e de wabasa de aiilingi makuatil̄e o jaji mabuku ingodumu wamömake-makeoka ma Jou Ai Tau magoronaka. Ipaha makoano wodiai o jaji de ma Jou mangale wihingounu Unangika de wadiai de aihininga itotomo de aijiwa magahumu mata-mata aipareta de Ai Tita-tita, ikali wohitotomo o jaji madodagi ma Jou de Ai umati manga hidongoronaka itötuli-tulihi o buku gënanga magoronaka.

³²Mata-mata o Benyamin manyawa de mata-mata o nyawa mahomoa naga o Yerusalemoka wahuloko yojaji mangale ihingounu o jaji gënanga. Daha hagala o Yerusalem manyawa ihingounu hagala o datoro o jaji gënanga magoronaka, enagënanga o jaji önanga de toönanga mangaete de mangatohora manga Jou Madutu manga hidogoronaka.

³³Hagala o gomanga haöemo-emono, naga hagala o ngïoka idogoika o Israeloka manyawa manga daera, mata-mata wawedere ma Koano Yosia. Daha ünanga wähiributu aikawaha iwipuji ma Jouika, toönanga mangaete de mangatohora manga Jou Madutu. Done madekana o Yosia wowango, o kawaha kahirahi yosetia ma Jouika.