Read Tobelo O TAWARIKH MAHINOTOKA 35 Bible Online

O TAWARIKH MAHINOTOKA 35 - Tobelo bible

O TAWARIKH MAHINOTOKA 35

¹Ipaha o Yosia wohirame o Paskah o Yerusalemoka mangale wihoromati ma Jou. O duba mangale o rame gënanga yatoaka mawange ngimoi de iatoka o mede mahira.

²O Yosia wähikodoku hagala o manarama o imam-imamika önanga kiani yomanarama ma Jou Ai Tauoka, de ünanga wahihihitomo hupaya önanga yomanarama de kayaoa-oa.

³Hagala o Lewi manyawa yahitö tinga-tingakoka mangale ma Jou, de yodadi o Israeloka manga guru-guru yamake o pareta nënanga o Yosiaino, ”Nia kelenga ma Jou Ai Jaji ma Peti itebi-tebini gënanga ma Jou Ai Tau magoronaka wohigö goko-goko ma Koano Salomo o Daud aingohaka o nauru. Ngarouha ngini niatotururuoli. Niwï leleani ma Jou nia Jou Madutu de Ai umati o Israeloka manyawa.

⁴ Nimahidiai ma Jou Ai Tauoka imamoteke niadoomu-doomu, imakadaene de o manarama mahidoku ihitotatapu nginika ma Koano Daud de aingohaka o nauru ma Koano Salomo.

⁵Niatatoro hokogënanga marupa niadoomu-doomu gënanga hiädono hokogenangika naga nginino yakunu niariwo o Israeloka manyawa manga doomu yogetongo ma Jou Ai Tauoka.

⁶Ngini kiani nitoaka o duba mangale o Paskah marameanga. Karana gënanga nihidiai niadiri la ipatutu niwihuba ma Jou, de nihidiai o hagala o huhuba kokiani nihihuba ma Jouika, hupaya de hoko gënanga hagala o Israeloka manyawa mahomoa yakunu yadiai okia wohipoparetaka ma Jou itilakuru o Musa.”

⁷Hupaya hagala o nyawa yoböboa-boa o Paskah marameangoka gënanga yakunu ihihuba o Paskah mahuhuba, ma Koano Yosia wohiriwo aiaiwani o giginino mahirete o duba o dutu 30.000 o duba mangohaka, de o kabingi magö, ikali o hapi manauru o dutu 3.000.

⁸O Yosia aipopegaweö maihidöaka o roriwo mangale o imam-imam, de o Lewi manyawa o kawahaino yongodumu. O popegawe yahilolapahi yatagongo moi-moi mangale ma Jou Ai Tau, enagënanga ma Imam Wolamo-amoko o Hilkia, de o Zakhara, ikali o Yehiel, ya ruange ihi döaka o imam-imamika o duba o dutu 2.600 o duba mangohaka de o kabingi magö ikali o hapi manauru o dutu 300 mangale ihihuba o rameanga gënanga magoronaka.

⁹O tutuda-tutuda o Lewi manyawa, enagënanga: o Konanya, o Semaya de airiadodoto o Netaneel, o Hasabya, o Yeiel, de o Yozabad yahidoaka o Lewi manyawaika o duba mangohaka o dutu o 5.000 o duba mangohaka de o kabingi magö ikali o hapi manauru o dutu o 500 mangale ihihuba o rameanga gënanga magoronaka.

¹⁰Mata-mata itiaioka mangale o Paskah marameanga, o imam-imam de o Lewi manyawa manga doomu-doomu imal̄ë manga ngï moi-moi hokä wahipoparetaka makoano.

¹¹Daha önanga yotoaka o aiwani mangale o Paskah marameanga; o Lewi manyawa yahelenga makai de o imam-imam yodohurero o aiwani maawunu gënanga o huba mangï mal̄okuku.

¹²O tau madol̄a manyawa madoomu yogetongo yoboa-boaino genangoka yamake hagala o aiwanino gënanga o dutu moi aha ihihuba hokä o huhuba ituhu-tuhuku. De hoko gënanga önanga yakunu ihihuhuba o huhuba imamoteke madatoro itötuli-tulihoka o Musa ai Tita mabuku magoronaka.

¹³ Daha hagala o Lewi manyawa yal̄ofo o Paskah mahuhuba o uku mal̄okuoka, imamoteke de madatoro, de yabohoko o huhuba ihitinga-tingakoka o bohobehiuku, o hepeuku de o bohoko mapako-pakouku, ipaha mahiode maakeme yahikodoku imatai-taiti hagala o nyawaika.

¹⁴Iböto gënanga daha hagala o Lewi manyawa ihidiai o hidoku mangale toönanga mahirete de mangale o imam-imam o Harun aidifauku. Hababu, hiädono yohutu o imam-imam gënanga yomanarama hoko genangika ihihuba hagala o aiwani hokä o huhuba ituhu-tuhuku, de mahaki yatuhuku o huhuba-huhubaino gënanga.

¹⁵ Yanö nako-nako yomusik o Asaf aiahalino o Lewi aihöana magoronaka naga o manarama mangï magoronaka wohitatantuoka ma Koano Daud mangale önanga. Nenanga toönanga manga roma-romanga: o Asaf, o Heman, de o Yedutun, womatengo o nabi womanarama mangale makoano. O ngorana ma ago-agomo magogoana iparalua yamal̄a toönanga manga manarama mangï, karana önanga yakunu ihirame o Paskah toönanga manga manarama mangïoka de manga roriwo hagala o Lewi manyawa mahomoa.

¹⁶O wange gënanga önanga yadiai hagala moi-moi wahipoparetaka ma Koano Yosia mangale o Paskah marameanga, idogoika o huhuba-o huhuba o huba mangïoka.

¹⁷ O wange tumidi madekana hokogenangika yoboa genangoka ihirame o Paskah de o Roti i Ragi-ragi Ua marameanga.

¹⁸O Paskah hokä hokogënanga komamoiuahi ihirameoli mamulaenge maöraha ma Nabi Samuel. Ihira de ünanga moiua o kokoanoino mamoi iböto ihirame o Paskah hokä hokogenanga ma rame,

¹⁹o taongo ngimoi de tufange magoronaka o Yosia aipareta gënanga, makoano gënanga mahirete kamamoi o imam-imam, o Lewi manyawa, o Yehuda de o Israel manyawa, ikali o Yerusalem manyawa.

²⁰Ma Koano Yosia wadiai mata-mata gënanga iböto mangale ma Jou Ai Tau; o Nekho o Mesir manga koano watuda aiduduono mangale imateke parangi o Karkemisoka o Efrat ma Ngairi madatekoka. O Yosia wohidailako witatoko ünanga,

²¹mä o Nekho wohidingoto o abari nënanga o Yosiaika, ”O parangi nënanga imalaketua ngona, o Yehuda manga koano! Ngohi toboa toni lawanua mangale ngona, maʼ mangale talawani hagala ahi haturu, de ma Jou Madutu wohihuloko ngohi itaiti tadiai. Ma Jou Madutu naga ngohioka, karana gënanga uha nitatoko ünanga, done ünanga woniwedere.”

²²Mä o Yosia womahitogowini mangale wilawani, de woluku wamoteke okia ma Jou Madutu wotö temo-temoka itilakuru ma Koano Nekho. O Yosia womahalere daha wongohama o parangi o Megido marata iwai-waiuku.

²³O parangi magoronaka gënanga ma Koano Yosia iwikorona o toimi. Daha ünanga wahipareta aigogilaongo hupaya iwiao ünanga iwihihupu o parangino karana ünanga iwilabo kohä dubuho.

²⁴Onanga iwigoraka ünanga aikeretail̄e de iwitururu o kureta mahomoaika naga genangoka, ipaha iwiao o Yerusalemika. Dokengoka ünanga wohonenge de iwi lungunu o kokoano manga Jereoka. O Yehuda de o Yerusalem makawaha yongodumu imahipake o duka mapakeanga mangake aihonenge.

²⁵Ma Nabi Yeremia wotulihi moi o dodora manyanyi mangale ma Koano Yosia. Hiädono o öraha nënanga o nyanyi gënanga yapake o Israeloka yonyönyanyanyi, yaoa o nauru yaoa o ngoheka, o duka manonako mangale o Yosia yohininga magoronaka. O nyanyi gënanga ihingohamoka o dodora manyanyi-manyanyi madoomu magoronaika.

²⁶Majarita mahomoa yakorona o Yosia, yakorona wihininga ma Jouika, de aihingounu ma Jou Ai Tita-titaika,

²⁷de madipoko, yakorona aiwowango majarita mamulaenge de yaino hiädono mabaha, itulihoka o Israel de o Yehuda manga Kokoano manga Sejara mabuku magoronaka.