Read Tobelo O TAWARIKH MAHINOTOKA 36 Bible Online

O TAWARIKH MAHINOTOKA 36 - Tobelo bible

O TAWARIKH MAHINOTOKA 36

¹O Yehuda makawaha iwiiriki de iwigoraka o Yoahas wodadi o koano o Yerusalemoka witagali aiama, o Yosia.

²O Yoahas aiumuru o taongo monaoko de hange maöraha ünanga wodadi o Yehuda manga koano, de ünanga wopareta o Yerusalemoka o mede hange madekana.

³ O Nekho o Mesir manga koano witagoko de wiao o Yoahas o Mesirika, daha ünanga wahuloko o Yehuda yofangu o soungu ma amoko o haaka o kilo o 3.400 de o gurasi o kilo 34. Ipaha ünanga wigoraka o Elyakim o Yoahas ai dodoto wodadi o koano, de watagali airomanga o Elyakim idadi o Yoyakim. Ipaha o Yoahas iwiao o Mesirika.

⁵ O Yoyakim aiumuru o taongo monaoko de motoa maöraha ünanga wodadi o Yehuda manga koano, de ünanga wopareta o Yerusalemoka o taongo ngimoi de moi madekana.

⁶ Maöraha o Nebukadnezar o Babel manga koano waora o Yehuda, unanga witagoko o Yoyakim, de iwiao iwiranteika o Babelika.

⁷Mahononga okiahonanga dema ija-ijaka ma Jou Ai Tauoka o Nebukadnezar wao de wakelenga aikadato magoronaka o Babiloka.

⁸Ma jarita mahomoa yakorona o Yoyakim, yongohamika hagala aimanarama ibobaragunaua de hagala aidorou, itulihoka o Israel de o Yehuda manga Kokoano manga Sejara mabuku magoronaka. Aingohaka o nauru o Yoyakhin wodadi o koano witagali ünanga.

⁹O Yoyakhin aiumuru o taongo ngimoi de tufange maöraha ünanga wodadi o Yehuda manga koano, de ünanga wopareta o Yerusalemoka o mede hange de o wange ngimoi madekana. Unango wobaradoha ma Jouika.

¹⁰ O taongo yaino, ma Koano Nebukadnezar wiao o Yoyakhin o Babelika hokä o dagokino, de okiahonanga dema ija-ijaka ma Jou Ai Tauoka waookali. Ipaha o Nebukadnezar wigoraka o Zedekia, o Yoyakhin aipepe, wodadi o koano mangale o Yehuda de o Yerusalem.

¹¹ O Zedekia aiumuru o taongo monaoko de moi maöraha ünanga wodadi o Yehuda manga koano. Unanga wopareta o Yerusalemoka o taongo ngimoi de moi madekana.

¹²Unangö wobaradoha ma Jouika ai Jou Madutu. Unanga woluku womahitipokouku ai diri de wamotekua ma Nabi Yeremia wohiado-adono o behehongo ma Jouino unangika.

¹³ Ma Koano Nebukadnezar wipakisaoka o Zedekia mangale wokoboto de ma Jou Madutu ünanga aha wosetia o Nebukadnezarika. Mä ipaha o Zedekia womalawani o Nebukadnezarika. O Zedekia watogowini aihäeke ma Jouika, o Israeloka manga Jou Madutu. Unanga woluku wamal̄a hagala aibaradoha de woluku womaidulu ma Jouika.

¹⁴Mahomoa de gënanga, ma Jou Ai Tau wohitö tinga-tingakoka ma Jou mangale Ai diri mahirete, yapeseke o Yehuda manga tutuda-tutuda, o imam-imam, de o kawaha, karana önanga imakinïki yahuba o gomanga de yanïki manga wowango ibobaradoha madodagi o hoana de o bereraino yahigogilolitino önanga.

¹⁵Ma Jou, toönanga manga ete de manga tohora manga Jou Madutu, wogogiliooka wahidingoto Ai huhuloko-huhuloko mangale yahidöaka o hohininga Ai umatika, karana ”Unanga wahayanga onangika de ai Tauika.

¹⁶Mä önanga imahigogule ma Jou Madutu Ai huhuloko-huhuloko gënanga, de yagogiete ainabi-nabi ikali yolegaikaua Ai demo-demo. Mabaha ma Jou hokogënanga wangamo onangika hiädono koiwaka o ngekomo yohupu onangika mangale yolapahi Ai hukumangino.

¹⁷ Ma Jou wagaraki o Babel manga koano aihininga hupaya waparangi önanga. Ma Koano gënanga wätoma o Yehuda manyawa yogögö, yodogoika önanga naga ma Jou Ai Tau magoronaka. Unanga wadoraua kaimatengoö ma, yatotimono ekola yogö gö, o nauru ekola o ngoheka, yopopanyake ekola yototumuloa. Onanga mata-mata ma Jou Madutu wahilapahi makoano Babelika.

¹⁸Ma Jou Ai Tau mapakakaha-pakakaha, de makia honanga dema ija-ijaka, aiarata o makoano de aipegawe-pegawe, mata-mata waora o Babel manga koano gënanga daha wao o Babelika.

¹⁹ Unanga wakilianga o Yerusalem makota mabebeno o mehele, de watuhuku o kota gënanga, idogoika ma Jou Ai Tau de o kadato mata-mata kamamoi makiahonanga dema ija-ijaka kanagahi o kadato-kadato magoronaka gënanga.

²⁰O kawaha yololapahi waao o Babelika. Dokengoka önanga yodadi aigilaongo de aidifauku manga gilaongo hiädono maöraha o Persia mapareta yokuaha.

²¹ Hokogënanga idadi okia wotö temo-temo ma Jou itilakuru o Yeremia o berera gënanga aha koiwa idodato-datomo o taongo 70 madekana hokä madagali o Sabat matao-taongo yahohaduliokaua.

²²Mataongo madodihiraka o Kores aipareta, o Persia manga koano, ma Jou wadiai okia wahöheto-hetongoka itilakuru ma nabi Yeremia. Ma Jou wagaraki o Kores aihininga mangale wohihupu moi o pareta yadabasa aipareta yamode-modekika. Mademo hoko nënanga:

²³ ”Nenanga o Kores aipareta, o Persia manga koano! Ma Jou, o Jou Madutu wokokuaha o horogaka wohihidadioka ngohi o koano mangale o dunia ingodumu, de wohihilapahi ngohi mangale tohigoko o tau Unangika o Yerusalemoka o Yehuda madaeraoka. Hoʼ, ngini mata-mata inidödadadi ma Jou Madutu Ai umati kiani nilio dokengika! Tanu ma Jou nia Jou Madutu winihohongino ngini.”