Read Tobelo O TAWARIKH MAHINOTOKA 4 Bible Online

O TAWARIKH MAHINOTOKA 4 - Tobelo bible

O TAWARIKH MAHINOTOKA 4

¹ Ma Koano Salomo wähuloko yodiai moi o huhuba mangï o tabaga, magurutu de mangoata moi-moi o metere a hiwo-hiwo, de magurutil̄e o metere iata de o senti moritoa.

²Unangö wodiai moi o rube o tabaga mahohululunu, de maduduga hokä hokonënanga: magoronauku maluku o metere hinoto de o senti monaoko, mauruika mangoata o metere iata de o senti moruata, de ma gilolitino o metere ngimoi de hange de o senti monaoko.

³Madateke maporete magilolitino ihiporomu de o hapi ma dulada o datoro hinoto, ihiduguihika de o rube gënanga.

⁴O rube gënanga yogelengauku o hapi o tabaga ngimoi de hinoto maporete mal̄okuoka — hange ihimanga o koremieuku, hange o koreharail̄e, hange o wange madumuniha de hange o wange mahiwaroko.

⁵O rube gënanga mabirini o senti tumidi de mahononga. Madateke marupa o belu-belu madateke magookoro ihupu maporetika yodangadeika o bakung mabunga mahohe. O rube gënanga yakunu imadol̄a doneho litere momoributanga maribuhu.

⁶ Ma Koano Salomoö wodiai ngimoi o bokolo ma ago-agomo, motoa mangale yakelenga ma Jou Ai Tau o koreharail̄e idaduoka, de motoali mangale o koremieuku idaduoka. O bokolo-o bokolo gënanga mabaraguna mangale ihi ihoro o aiwani ilö lui-luituku aha yatukuku hokä o huhuba. O akere o rube ma amo-amoko magoronaka gënanga yasadia o imam-imamika mangale ihitebini manga diri.

⁷ Wadiaiö o hilo matotodenge o gurasino o gahumu ngimoi imamoteke madüku wohidödato-datoroka, de o meja ngimoi. Mata-mata o hilo matotodenge de o meja gënanga yakelenga o kamari duru marorahai ma Jou Ai Tau magoronaka — moi-moi motoa o higiloka, de motoa manirakoka. Wadiaiö o udo-udomo o gurasi o 100.

⁹Ma Koano Salomoö wadiai moi o l̄oa magoronaka mangale o imam-imam, de moi o löa maporetoka. O ngorana mabebeno o ngorana ma ago-agomoka o löa hinoto mahidogoronaka gënanga yalape de o tabaga.

¹⁰O rube yakelenga ma Jou Ai Tau malibuku ihi tigi-tigika o koreharail̄e de wange madumuniha idaduoka.

¹¹O Huram, yogö gao-gao manga baluhu gënanga, wodiai o bohoko-o bohoko, o sikop-sikop de o udo-udomo. Daha ünanga wadiai iböto hagala makiahonanga ma Jou Ai tau imamoteke de aijaji ma Koano Salomoika. Nenanga makiahonanga wadö dodiaioka gënanga: O liate mapako-pako hinoto O liate mahäeke hinoto madüku o udo-udomo wohigogere o liate hinoto mal̄okuoka gënanga O rante ihöhako-hakoro o liate mahäekoka yogetongo O delima o tabaga o o ratuhu iata yatatoro orei hinoto magoronaka yakilolitino o rante ihako-hakoro o liate mahäeke yogetongo O kereta ngimoi O bokolo mapako-pako ngimoi O rube o tabaga O hapi o tabaga ngimoi de hinoto yatö tiki-tikil̄e o rube gënanga O bohoko-o bohoko, o sikop-o sikop de o garpu-o garpu Mata-mata makia honanga gënanga wadödodiai o Huram mangale ma Jou Ai Tau, wadiai o tabaga de wohigihoro hiädono iletongo. O Huram wadiai mata-mata gënanga imamoteke de ma Koano Salomo aipareta.

¹⁷Ma Koano wohuloko yodiai okiahonanga gënanga o gurasi de o haaka yoö ui-uihoka o Sukot de o Zereda mahidogorona o Yordan ma Waioka.

¹⁸O bara-baranga gënanga hokogënanga mangöe, hiädono moiuaö ihi öriki o tabaga o kilo muruono yapö pake-pake.

¹⁹Ma Koano Salomoö wähuloko yadiai o pakakaha-o pakakaha mahomoa o gurasi madutu mangale ma Jou Ai Tau. Nenanga mapakakaha-pakakaha wadödodiai gënanga: O huba mangï O meja mangale o roti ihidodiai Mata-mata o hilo matotodenge de mahilo o gurasi madutu yawango o Ngï Duru ma Debi-debini mahimangoka, imamoteke dema datoro Ma poromu-poromu madüku o bunga O hilo-o hilo O kakatama-kakatama O pakakaha mangale ihitö tebi-tebini o hilo mahubu O udo-udomo-o udo-udomo O dodai-o dodai mangale o dupa O Dodai-dodai mangale o uku mangaboho Mata-mata o ngorana howö woha-wohama ma Jou Ai Tau de o Ngï Duru ma Debi-debini mangorana yalape de o gurasi.