Read Tobelo O TAWARIKH MAHINOTOKA 5 Bible Online

O TAWARIKH MAHINOTOKA 5 - Tobelo bible

O TAWARIKH MAHINOTOKA 5

¹ Ma Koano Salomo wabötoka wohigoko ma Jou Ai Tau gënanga, ünanga wagogono o gudanga-o gudanga de o tau magoronaka gënanga mata-mata o haaka, o gurasi, de o bara-baranga mahomoa wohihö huba-hubaka aiama o Daud ma Jouika.

² Iböto gënanga ma Koano Salomo wähuloko mata-mata o hoana de o ahali manga tutuda o Israel manyawaino imatoomu o Yerusalemoka mangale yatururu ma Jou Ai Jaji ma Peti o Sion de yaino, o Daud ai Kota ma Jou Ai Tauika.

³Daha önanga mata-mata yoboa o Tau-tau ihi Katu o Hoka-hoka ma Wange ma Ago-agomoka.

⁴Mata-mata o tutuda gënanga imatoomu iböto, hagala o Lewi manyawa yagoraka o Jaji ma Peti gënanga,

⁵de yao ma Jou Ai Tauika. Ma Jou Ai gamake ma Tau ikali mata-mata mapakakaha ö yatururu ma Jou Ai Tauika o imam-imam de o Lewi manyawa.

⁶Ma Koano Salomo de o Israeloka ma kawaha yongodumu imatoomu o Jaji ma Peti mahimangoka gënanga daha ihihuba ma Jouika o duba de o hapi hakunua haetongo mangöe.

⁷Iböto gënanga o imam-imam ihingohama o Jaji ma Peti gënanga ma Jou Ai Tau magoronaika de yakelengauku o dodadi o horogaino de magogahuhuoka madulada matimiuku o Ngï Duru i Tebi-tebini magoronaka.

⁸Magahuhu o dulada-dulada gënanga yarefeika yatamunuku o peti gënanga de magota mamomoku.

⁹Magota mamomoku gënanga duru koha gurutu, hiädono mabare-barene kahamake o Ngï Duru i Tebi-tebini mahimangino, mä hamakeua maporetino. (Hiädono o wange nënanga o gota-o gota gënanga kagenangokahi.)

¹⁰ O Jaji ma Peti gënanga magorona madol̄a okia-kiaua sawaliua o helewo mabobal̄ana hinoto. O helewo-o helewo gënanga o Musa wonoaka genanguku o Sinai mal̄okuoka, maöraha ma Jou wodiai o jaji de o Israeloka manyawa maöraha önanga o dodagi magoronaka o Mesir de yaino o Kanaan mabereraika.

¹¹ Mata-mata o imam naga genangoka, o doomu mata-mataino, imahidiaioka mangadiri mangale o upacara gënanga. Mata-mata yonyanyanyi de ihigögogogule o musik o Lewi aihöana magoronaka, enagënanga o Asaf, o Heman, o Yedutun de toönanga manga ahali manyawa yongodumu, yapake o pakeanga o ngöere o lenan. Hagala o Lewi manyawa gënanga ima okoino o huhuba mangï o wange mahiwaroko idaduoka de ima jöika o simbal de o kecapi. Ima kinïki önanga naga o imam ya 120 yowöwuwu o trompet. Yonyö nyanyanyi manga nyanyi ihi teke rimoi de ihinïki o musik trompet, o simbal de o musik mapakakaha mahomoa. Nënanga manyanyi mademo-demo önanga ihinyö nyanyanyi mangale ma Jou: ”O higiriri ma Jou, hababu ünanga yaoa. Ai dora ikakali kahi ado-adonika.” Maöraha o imam-imam yohupu ma Jou Ai Tauino gënanga, itodokanino o Tau gënanga iomanga de o sahaya ma Jou Ai boa, hiädono önanga yakunokaua ihigila-gila o puji maupacara.