Read Tobelo O TAWARIKH MAHINOTOKA 6 Bible Online

O TAWARIKH MAHINOTOKA 6 - Tobelo bible

O TAWARIKH MAHINOTOKA 6

¹Ma Koano Salomo womaniata, ”Ya Jou, Ngona iholoi noigo nogogere o lobi mahohuhutu magoronaka.

²O öraha nënanga tohigoko mangale Ngona o tau imomulia, mangale o ngï Ani gogere kahi ado-adonika.”

³Womaniata iböto, ma koano womaidulu o kawahaika yongodumu magogiria imaokoino genangoka, daha ünanga wogahoko ma Jou Madutu Ai barakati mangale önanga.

⁴ Unanga wotemo, ”Mahira ma Jou wojajioka ahiamaika o Daud hokonënanga, ’Mulaenge ngohi taao Ahi umati yohupu o Mesirino hiädono o wange nënanga, o Israel manga bereraka koiwa moinaga o kotaö Tairiki idadi o ngï kiaka kiani ihigoko o tau mangale o puji mangï Ngohino, de moiuaö Täiriki mangale yätuda Ahi umati o Israeloka. Mä öraha nënanga Ngohi täiriki o Yerusalem hokä o puji mangï Ngohino. De ngona, Daud, Toni iriki mangale näpareta Ahi umati.’ O higiriri ma Jou o Israeloka manga Jou Madutu wohi ganapuoka Ai jaji gënanga!”

⁷Wohi gila-gila o Salomo wotemo, ”Ahi ama o Daud wohidatoroka mangale wohigoko o puji mangï matau ma Jouika o Israeloka manga Jou Madutu.

⁸Mä ma Jou witemo unangika, ’Ani dungutu gënanga yaoa.

⁹Mä, ngonaua, mä aningohaka aha wohigoko Ahi Tau gënanga.’

¹⁰O öraha nënanga ma Jou wohiganapuoka Ai jaji. Ngohi todadioka o Israeloka manga koano titagali ahiama, de ngohioli tohigokoka o tau mangale o puji mangï ma Jou, o Israeloka manga Jou Madutu.

¹¹Ma Jou Ai Tau magoronaka gënanga tasadiaka o ngï mangale o Jaji ma Peti madol̄a o jaji mahelewo ma Jou de o umati o Israeloka manga hidogoronaka.”

¹²O Salomo wodiaioka o para-para tabaga ma Jou Ai Tau malöa mahidödogoronaka. Magurutu de mangoata o metere ahohinoto de o senti momonaoko, de magurutil̄e o metere moi de o senti moruange. O kawaha yoboa-boaino manga himangoka, o Salomo wodoa o para-parail̄e gënanga, de woma okoino wohimangika o huba mangï. Mata-mata o nyawa yakunu iwimake. Ipaha ünanga watilabukuku, daha wagoraka aigiama hinotö ikali womamataga o dihangil̄e de womaniata,

¹⁴”Jou, o Israeloka manga Jou Madutu! O dihangoka ekola o duniakaö koiwa hokä Ngona! Ngona nohiganapu Ani jaji de nohidumutu Ani dora Ani umatika yososetia de inihi ngounu de manga hininga magahumu Ngonaika.

¹⁵Ngona nohiganapuoka Ani jaji ahiamaika o Daud. Okia Nojajaji gënanga Nadiaioka o wange nënanga.

¹⁶ Ngonaö nojajioka ahi amaika nako aidifauku i gou-goungu ihingounu Ani titaika hokä ünanga, done mangale kahi ado-adonika womatengo aidifauku aha wopareta hokä o koano o Israeloka. O öraha nënanga, ya Jou o Israeloka manga Jou Madutu, naganapuö mata-mata Nohijöjäjajioka ahiamaika o Daud, Ani gilaongo gënanga.

¹⁸ Mä, ya Jou Madutu, igoungu Ngona noigo nogogere o duniaka nënanga o nyawa manga hidogoronaka? O dihanga ingodumö ma amokika kanodehehoto mangale Ngona, okia hongoli o puji matau tohigö goko-goko nënanga!

¹⁹Ya Jou, ahi Jou Madutu, ngohi Ani gilaongo! Mä tanu noihene ahiniata, de natarima ahigögahoko.

²⁰ Tanu o hutu de o wange Ngona nahohongino o tau nënanga naö iri-irikoka hokä o puji mangï Ngonaika. Tanu Ani ngï nogögogereino o horogaka Ngona noihene de nohihi apongo ngohi ikali o umati o Israeloka, Ani umati gënanga, nako ngomi mio rihimanga o tau nënanga de mimaniata Ngonaika.

²²Nako womatengo iwikalaki wahowono o nyawa mahomoaika de iwiao Ani huhuba mangïika Ani tau magoronaka nënanga mangale wokoboto ünanga wahowonua,

²³ya Jou, tanu Ngona öihene o horogaka de naputuhu Ani gogilaongo manga perekara nënanga. Nahukumu yahö howo-howono de nahilapahi yahö howo-howonua.

²⁴Nako Ani umati o Israeloka yahohihanga manga haturu-haturu karana önanga yobaradoha, daha imatoduba de inihoromatioli Ngona hokä o Jou, ipaha yoboa Ani Tauika nënanga ikali imaniata yogahoko o apongo Ngonaika,

²⁵tanu Ngona o horogaka noihene toönanga manga gogahoko. Tanu Ngona nahiapongo Ani umati nënanga manga baradoha, de naao önanga yolio o bereraika nahidö doa-doakoka onangika de toönanga mangaete de mangatohoraika.

²⁶Nako Ani umati yobaradoha Ngonaika de Ngona nahukumu önanga de nohigutiua o awana, daha önanga imatoduba toönanga manga baradohaino de inihoromati Ngona hokä o Jou, ipaha yorihimanga Ani Tauika nënanga ikali imaniata Ngonaika, ya Jou o horogaka,

²⁷noihene toönanga manga gogahoko. De naapongo anigogilaongo o umati o Israeloka mangabaradoha. Nadotoko önanga yadiai okia madiai. Iböto gënanga, ya Jou, nohiguti o awana Ani bererauku nënanga, o berera nahidödoa-doaka Ani umatika mangale idadi toönanga madutu kahiado-adonika.

²⁸Nako o berera nënanga yabanga o habirokata ekola o panyake o bobaku, ekola o dadatomo yabinaha o hidal̄oko i hau-hauku, o pipiti ekola o kahoho, ekola nako Ani umati manga haturu yaparangi, ekola o panyake yadaene,

²⁹tanu Ngona noihene toönanga manga niata. Nako Ani umati o Israeloka manga hidogoronaino naga de manga hininga iduka imaniata Ngonaika ikali ihidoakil̄e manga giama mameta Ani Tauika nënanga,

³⁰tanu Ngona anigogere magoronaka o horogaka noihene ikali nahiapongo önanga. Duga-duga Ngona nanako o nyawa manga hininga madol̄a. Hababu gënanga nahidiai o nyawa magetongo imamoteke manga manarama-manarama,

³¹hupaya Ani umati inimodongo de inihingounu hokogenangika Ngonaika madekana önanga yogogere o bereraka nahidödoa-doakoka tongomi miaete de miatohoraika.

³²Nako womatengo o nyawa maporetino o berera magogurutoka woihene mangale Ani mulia de Ani kuata, de Ngona hoko genangika nomahidiai mangale niriwo, daha ünanga woboa Ani Tauoka nënanga mangale womaniata Ngonaika,

³³tanu Ani gogerino o horogaka Ngona noihene ainiata de natarima aigogahoko. De hoko gënanga hagala o hoana o duniaka i ngodumu ininako Ngona de inihingounu Ngonaika hokä Ani umati o Israeloka. Onanga aha ihi öriki o tau tohigö goko-goko nënanga o ngï mangale ini puji Ngonaika.

³⁴Nako Ngona napareta Ani umati mangale yoiki yoparangi yalawani manga haturu, daha kiakaö önanga naga, önanga yohimanga Ani ngongiriki makotaika nënanga de ima niata manga dumutu o tauika nënanga tohigö goko-gokoka mangale Ngona,

³⁵tanu o horogaka Ngona noihene toönanga manga niata gënanga, de nahi döaka o utumu onangika.

³⁶Nako Ani umati yobaradoha Ngonaika — igou-goungu moiuaö la yobaradohaua — daha karana Ani gangamo namal̄aika önanga yahohihanga manga haturu de yaao hokä o dagokino o berera moika magogurutika ekola itigi-tigino,

³⁷tanu Ngona noihene toönanga manga niata. Nako o bereraka gënanga önanga yamal̄a toönanga manga baradoha-baradoha, de imaniata Ngonaika ikali imangaku önanga yobaradohaka de yodiai o dorou, noihene toonanga manga niata, ya Jou.

³⁸Nako o bereraka gënanga önanga de manga hininga i riko-rikoto de yagou-goungu yamal̄a toönanga manga baradoha-baradoha, de imaniata Ngonaika ikali yohimanga o bereraika nënanga nahidödoa-doakoka tongomi miaete de miatohoraika, madumutu Ani ngöngiriki makota de o puji matau tohigö goko-gokoka mangale Ngona nënanga,

³⁹done Ani gogerino o horogaka tanu Ngona noihene toönanga manga niata de nadora önanga. Na apongo mata-mata manga baradoha Ani umati.

⁴⁰O öraha nënanga, ya ahi Jou Madutu, nomihohininga ngomi de noihene o niata-o niata ihiö ado-adono Ngonaika o ngï ino nënanga.

⁴¹ Nomomiki öraha nënanga, ya Jou Madutu! De kamamoi de o Jaji ma Peti ihinonako Ani kuaha gënanga tanu Ngona nongohama o Tau nënanga de nogogere nenangoka mangale kahi ado-adonika. Nohibarakati hagala manga manarama Ani imam-imam, de tanu Ani umati yongodumu youtumu karana Ngona yaoa onangika.

⁴²O ma Jou Madutu, uha nitila o koano ni iri-irikoka nënanga. Nohininga aha Ani dora o Daudika Ani gilaongo.”