Read Tobelo O TAWARIKH MAHINOTOKA 7 Bible Online

O TAWARIKH MAHINOTOKA 7 - Tobelo bible

O TAWARIKH MAHINOTOKA 7

¹ Ma Koano Salomo womaniata ibötoka, o uku iuti o dihanguku yatuhuku o huhuba-o huhuba ihihöhuba-huba ma Jouika. Daha ma Jou Ai boa macahaya yaomanga ma Jou Ai Tau gënanga,

²hiädono o imam-imam yakunua yongohama.

³ Maöraha o Israeloka makawaha yamake o uku iuti o dihanguku de ma Jou Ai boa macahaya yaomanga ma Jou Ai Tau, önanga imahitudukuku o lanteoka daha iwihuba ikali iwihigiriri ma Jou Madutu, karana ”Unanga yaoa de Ai dora ikakali kahiado-adonika.

⁴Iböto gënanga ma Koano Salomo de mata-mata o nyawa imatotoomuino genangoka ihihuba o huhuba ma Jouika.

⁵Mangale o dame mahuhuba o Salomo wohihuba o hapi 22.000 de o duba o 120.000. Hoko gënanga ma koano de o kawaha yongodumu yodiai o upacara ihilapahi o puji matau gënanga ma Jouika.

⁶O imam-imam imaokoino manga ngïoka ihitotatapuoka mangale önanga; imateke rihimanga de o Lewi manyawa iwihigiriri ma Jou de o musik mapakakaha-pakakaha wadödiai ma Koano Daud, ikali ihinyanyi o nyanyi ”Ai dora i Kakali Kahi ado-adonika!” imamoteke de o Daud aihuloko. O imam-imam yawuwu o trompet magogiria o kawaha yongodumu imaoko.

⁷Daha mahidoku madogoronaino malöa o puji matau mahimangoka gënanga wohilapahi o Salomo ma Jouika. Ipaha ünanga wohihuba genangoka o huhuba itötuhu-tuhuku, o huhuba o gandum de o aiwani mahaki mangale o dame mahuhuba. Mata-mata gënanga ihihuba genangoka karana o huhuba mangï o tabaga wadodiaioka duru ietekeholi mangale mata-mata o huhuba gënanga.

⁸O Salomo de o umati o Israeloka yongodumu yadiai o Tau-tau ihi Katu o Hoka-hoka marameanga o wange tumidino madekana. Duru komanga ngöe o nyawa imatoomu mangale o rameanga gënanga. Onanga yoboa madaera magogurutoka deyaino o Hamat ma Ngekomo o koremieuku hiädono maribatingi o Mesir o koreharail̄e.

⁹O wange tumidi madekana önanga imatoomu mangale maupacara ma Jou Ai huba mangï matabisan, ipaha o wange tumidoli mangale o Tau-tau ihi Katu o Hoka-hoka marameanga. Mawange mabobahaka yadiai marameanga mabobaha,

¹⁰de iyarehino mawange, o mede matumidi mawange monaoko de hangeoka, o Salomo wähuloko hagala o nyawa gënanga yolio. Onanga yomorene mangale mata-mata maoa-oa wadodiai ma Jou Ai umatika o Israeloka manyawa, o Daudika de o Salomoika.

¹¹O Salomo wohasiloka wabötoka ma Jou Ai Tau wohigoko de ma koano aikadato imamoteke de aidatoro,

¹²ma Jou womahi matokoli Ai diri unangika maöraha o hutu-hutu. Ma Jou witemo unangika, ”Ani niata toihenoka de Ngohi tatarima o tau nënanga hokä o ngï nohitötinga-tingakoka mangale ihihuba o huhuba Ngohino.

¹³Nako Ngohi tohigutiua o awana ekola Ngohi tohidingoto o kahoho mangale yamata o dunia mahasili ekola yadotoboa o panyake o bobaku Ahi umatuku,

¹⁴daha Ahi umati yapöpake-pake Ahi romanga gënanga imahitipokouku manga diri, de imaniata ikali yoboa Ngohino de yamal̄a toönanga manga manarama itotorou, done o horogaka ngohi aha toihene toönanga manga niata. Ngohi aha tahi apongo toönanga manga baradoha-baradoha de toönanga manga berera idadi mata-mata kademaenangokahi.

¹⁵Ngohi aha hoko genangika tohilega-lega Ahi Tau nënanga de sadia Toihene mata-mata o niata idödoa-doa o ngï il̄e nënanga.

¹⁶Mata-mata gënanga aha Tadiai karana o ngï nënanga Tairikoka de Tohitingakoka idadi o puji mangï Ngohino mangale kahiado-adonika. Ngohi aha tohohininga de Tahohongino o öraha magurutu.

¹⁷Nako ngona, hokä o Daud ani ama, nowango imamoteke Ahi mau de nohingounu Ahi tita-titaika ikali nadiai mata-mata Tohipoparetaka ngonaika,

¹⁸ done Ngohi aha tohiganapu Ahi jaji aniamaika o Daud hokogenangika aha naga womatengo ai difaukuino wodadi o koano o Israelokaka.

¹⁹Mä nako ngona de ani kawaha nia tilakuru Ahi tita-tita de Ahi pareta-pareta, ikali niahuba o gikiri-o gikiri mahomoa,

²⁰done Ngohi aha tinihihupu ngini o bereraino Tinihidö doa-doakoka nginika. Ngohiö aha tamal̄a o tau nënanga Tohitotatapuoka idadi o puji mangï Ngohino. Kiaka honanga o tau nënanga aha ihikauku de yogogiete.

²¹O puji ma Tau nënanga öraha nënanga duru yahoromati, maöraha gënanga o nyawa moi-moi yatilakuru genangino aha yoheranga yamake. Onanga aha yoteme, ”Yadodoa ma Jou wodiai hoko gënanga o bereraika de o tauika nënanga?”

²²Daha o nyawa aha yohaluhu, ’Karana onanga iwimal̄a ma Jou, toönanga manga Jou Madutu wangö ngota-ngotakoka toönanga manga ete de manga tohora yohupu o Mesirino. Onanga yahuba de yojaji setia o giki-gikiri mahomoaika. Genanga mahababu ma Jou wodotagao o huha nënanga onanguku.’ ”