Read Tobelo O TAWARIKH MAHINOTOKA 8 Bible Online

O TAWARIKH MAHINOTOKA 8 - Tobelo bible

O TAWARIKH MAHINOTOKA 8

¹O Salomo wohigoko ma Jou Ai Tau de ma koano aikadato maöraha o taongo 20 magoronaka.

²O kota-o kota ma Koano Hiram wihidödoa-doaka unangika wohigokookali, daha wähuloko o Israeloka manyawa yogogere genangoka.

³Unanga waora o Hamat de o Zoba madaera,

⁴ikali wakuata o Tadmor makota o tonaka makokakahaka, daha wohigokookali mata-mata o bilaono madoomu o Hamatoka.

⁵O Bet-Horon-Il̄oku-l̄oku de o Bet-Horon-Itimi-timi makota wohigokookali idadi o kota de mabebeno o mehele de ngorana maamo-amoko de mangorana de madurukuroka.

⁶Wohigoko okaoli o o Baalat makota, de mata-mata o bilaono makota ikali o kota-o kota imatotoomu o kereta ihi poparangi de makuda. Mata-mata o datoro wohigögoko-goko o Yerusalemoka, o Libanon de aikuaha madaera ingodumu wadiaioka.

⁷O Kanaan manyawa manga difauku mata-mata yätoma yamata-mataua o Israeloka manyawa maöraha önanga yogogere o berera gënanga, wätoomu o Salomo mangale o manarama ipopakisa. Önanga ganga o Het manyawa, o Amori, o Feris, o Hewi deʼ o Yebus. Hiädono o öraha nënanga toönanga manga difauku idadi kayogilaongohi.

⁹O Israel manyawa yahulokua yomanarama ipopakisa; önanga yahimanarama hokä o pajuretoka, o tentara manga baluhu, o kureta ihipoparangi manga baluhu de o tentara yojo jara-jara manga duduono.

¹⁰O pegawe yaratuhu hinoto de yamoritoa yahilapahi yatagongo moi-moi mangale hagala o nyawa yadodiai o manarama ipopakisa irupa-rupa o tau ihi goko-goko mangï magoronaka.

¹¹O Salomo womitururu ngoihekata, enagënanga o Mesir manga koano ngoiora, o Daud ai kotaino o tauika wohigögoko-gokoika mangale munanga. Hababu o Salomo womatibanga, ”Ngoi hekata yakunua mogogere o Daud ai kadatoka, o Israeloka manga koano, karana mata-mata o ngï kiaka o Jaji ma Peti mamoi iböto yakelenga ganga o ngï madebi-debini.”

¹²O Salomo wohihuba o huhuba itötuhu-tuhuku ma Jouika o huhuba mangï mal̄okuoka wohigö goko-goko ma Jou Ai Tau mahimangoka.

¹³ O huhuba-huhuba gënanga wohihuba imamoteke o Musa ai tita mangale o wange maago-agomo mahigetongo: O Sabat mawange, o Mede ma Hungi maago-agomo mawange, de o wange ma ago-agomo harahange o taongo magetongo, enagënanga o Roti i Ragi-ragi Ua, mawange maago-agomo, o Gugutuku mawange maago-agomo, de o Tau ihikatu o hoka-hoka mawange ma ago-agomo.

¹⁴Imamoteke de aidatoro-aidatoro o Daud aiama, o Salomo watatoro manga manarama-manarama o wangeil̄e mangale o imam-imam de mangale o Lewi manyawa kiani ihinyanyi o higiriri ma Jouika de yäriwo o imam-imam yadiai o puji maupacara-maupacara magoronaka. Ma Jou Ai Tau magogoanö waregu o doomu-o doomu magoronaka mangale o ngorana ma ago-agomo yogetongo, imamoteke de ahidumutu o Daud ma Jou Madutu Ai gilaongo.

¹⁵Mata-mata o Daud ahidumutu o imam-imamika de o Lewi manyawa yakorona o gudanga-o gudanga de o hali-o hali mahomoa, wanïki de magou-goungu.

¹⁶Daha iböto o tau ihigögoko-goko wohidödato-datoro o Salomo. Mata-mata o manarama mulaenge mafondasi ikelenga de yaino hiädono iböto ma Jou Ai Tau, yamanaramoka de kayaoa-oa.

¹⁷Iböto gënanga o Salomo woiki o Ezion-Geberika de o Elotika, o leleoto makota-kota o Akaba ma Jiko mahohanoka o Edom mabereraka.

¹⁸Ma Koano Hiram wohidingoto unangika o kapa-o kapa ihidagi o Hiram mahirete ainyawa imakinïki o kapa manyawa yanö nako-nako. Onanga yohidete o Ofir mabereraika imakinïki o Salomo ainyawa de yal̄ë dokengino o gurasi o kilo o ribuhu ngimoi de motoa daha yao o Salomoika.