Read Tobelo O TAWARIKH MAHINOTOKA 9 Bible Online

O TAWARIKH MAHINOTOKA 9 - Tobelo bible

O TAWARIKH MAHINOTOKA 9

¹ O Syeba maberera ma koano o ngoheka moihene mangale kaiwi heto-hetongo o Salomo. Daha munanga moboa o Yerusalemika mangale miuji o Salomo de o loleha ihuhuha. Munanga moboa imakinïki manga ngöe iminö ninïki de unta magina o rampa-rampa yodoke-dokeme, o muhutika mahelewo, de duru kohangöe o gurasi. Maöraha imamake de o Salomo, o koano o ngoheka gënanga ami loleha hagala rupa o loleha yakunu matö tiba-tibanga.

²Mata-mata o loleha gënanga wakunu wahaluhu o Salomo, koiwa moiö duru ihuha unangika.

³Ma koano o ngoheka gënanga mahirete mahakihi hokokia aibarija o Salomo. Munanga mamake o kadato o Salomo wohigö goko-goko,

⁴aikadato mapegawe-pegawe manga manarama madatoro, de manga pakeanga o rupa moi ikali toönanga manga tau. Munanga mämake o inomo ihidodiai, de manga pakeanga yolöleleani, yoleleani o rameangoka; munanga mamakeö o huhuba-o huhuba wohihöhuba-huba o Salomo ma Jou Ai Tauoka. Mata-mata gënanga o Syeba maberera ma koano o ngoheka gënanga imidiai moheranga de mokiriri.

⁵Daha munanga motemo ma Koano Salomoika, ”Hagala toö ihe-ihene ahiberera madutuoka mangale Tuanga de anibarija Tuanga, igoungu itiai!

⁶Mahira ngohi tongakua, mangohi toboaka de tahakihi mata-mata de ahi lako mahirete, daha ngohi tongaku. Igoungu hagala toö ihe-ihene genanga itogoronauahi ngaro de tamo make-make o örahanenanga. Inyata anibarija de anikaya Tuanga iholoi ilamoko ikurutika ngaro de ihihingöngahu-ngahu ngohino.

⁷Hokokia manga utumu o pegawe-pegawe inilöleleani Tuanga de hoko genangika yomanarama mangale Tuanga hiädono yakunu yoihene Tuangino mahirete hagala o dodotoko ibobarija!

⁸O higiriri ma Jou, ani Jou Madutu Tuanga! De wonigoraka Tuanga nodadi o koano mangale nopareta de Ai romanga, Unanga wohidumutu hokokia ai sanangi Unanga Tuangika. Karana ”Unanga wahininga o umati o Israeloka de womau hupaya önanga kahirahi naga, daha Unanga wonigorakoka Tuanga nodadi toönanga manga koano, hupaya Tuanga yakunu napaliara o tita de o adili.”

⁹Ipaha o Syeba maberera ma koano o ngoheka gënanga mohilapahi o Salomoika o hadia-hadia maö ao-ao, enagënanga o gurasi o kilo 4.000 iholoi de magegetongo koha amoko o muhutika mahelewo ikali o rampa-rampa. Komaiwaka o Salomo watarima o rampa-rampa hoko gënanga marahai maragane hokä mihidö döa-döaka o Syeba maberera ma koano o ngoheka gënanga unangika. (

¹⁰Ma Koano Hiram ainyawa de ma Koano Salomo ainyawa yoao o gurasi o Ofirino mangale o Salomo, yoaoö o muhutika mahelewo de o cendana magota.

¹¹O gota gënanga o Salomo wapake mangale wodiai o ngute ma Jou Ai Tauoka de aikadatoka, mangale yodiaiö o kecapi de o gambus mangale yonyö nyanyanyi. Komaiwahi naga hokä hokogënanga o Yehuda mabereraka.)

¹²O hadia-hadia mabalahi mahomoa aibiaha wohidödoa-doaka o Salomo, o Salomo womihi doakö ma koano o ngohekaika o Syeba mabereraino gënanga hagala mogö gaho-gahoko. Ipaha molio o koano o ngoheka gënanga, ami bereraika imakinïki mata-mata iminö ninïki.

¹³O taongo higetongo ma Koano Salomo watarima o gurasi ngadeke o kilo o 23.000,

¹⁴ietonguahi o balahitengi-balahitengi imatoko maago-agomo de imahuku-hukunu. O Araboka manga kokoano ikali o Israeloka manga gubernur-gubernurö iwihidoaka o gurasi de o haaka unangika.

¹⁵O Salomo wodiai o dadatoko mapako-pako o gurasi yatututukino o 200. O gurasi wapopake-pake mangale o dadatoko yogetongo genanga naga doneho o kilo 7.

¹⁶Unango wodiai o dadatoko o gurasi holoi ieteke o 300. O gurasi wapopake-pake mangale o dadatoko maiteteke yogetongo gënanga naga done o kilo 3, mata-mata o gurasi yatututukino. O dadatoko-o dadatoko gënanga wakelenga o tau maromanga o Libanon ma Hongana ma Tau.

¹⁷Ma Koanö wodiai moi o pareta makuruhi mapako-pako yadiai o gadingino de ihiporomu de o gurasi madutu.

¹⁸O kurihi gënanga de magiamoka de ari hohononga naga o singa madulada. O kuruhiö gënanga toënanga mangute madudukuru butanga, de moi mal̄ou mangï ihilape de o gurasi. Ma l̄ou mangï gënanga ihidadi kamoi de makuruhi.

¹⁹Mabarene o higiloka de mabarene o niraka o kuruhi o gurasi mangute madudukuru gënanga yogetongo naga o singa madulada — mata-mata o gahumu ngimoi de hinoto. Koiwahi naga o kuruhi hokä hoko gënanga o pareta kiakaö dika.

²⁰Mata-mata o pakakaha wohi oke-okere o Salomo yadiai de o gurasino, de mata-mata mapakakaha o Libanon ma Hongana ma Tauokaö wadiai de o gurasi madutuino. O Salomo aiorahoka, o haaka yapulono koiwa maija.

²¹O Salomo toünanga ai kapa maago-agomo kohangöe ihidete o ngöto maago-agomoka imakinïki ma Koano Hiram aikapa-aikapa. O taongo hange mamoi o kapa-o kapa gënanga ilio i ao o gurasi, o haaka, o gadingi, o mia de o totaleo o merak.

²²Ma Koano Salomo holoi wokaya de holoi wobarija o koano okiainoö o duniaka.

²³Mata-mata o koano ihidailako iwimake o Salomo mangale yoihene o dodotoko ibobarija ma Jou Madutu wihidö doa-doaka unangika.

²⁴Onanga moi-moi yoboa de yoao o hadia mangale o Salomo. Onanga iwihidöaka okiahonanga o haaka, o gurasi, o pakeanga, o daë, o rampa-rampa, o kuda de o bagal. Hoko gënanga o taongo itagali o taongo.

²⁵ Ma Koano Salomoö toünanga aikurunga mangale o kuda o 4.000 de makereta. Ai kuda ihipoparangi naga o dutu 12.000. Mahononga wohigogere o Yerusalemoka, de maboloi o kota-kotaika madodoomu mangale aikereta ihipoparangi.

²⁶ Unanga wokuaha mangale o koano mata-mata madaeraoka ingongotika o Efrat ma Ngairi deyaino hiädono o Filistin mabereraika de o Mesir maribatingi.

²⁷ Maöraha o Salomo wopareta magoronaka, o haaka marupa okiahonanga biaha o Yerusalemoka, hokä imatero o helewo, de o Libanon maliwewuru magota duru kohangöe hoka o ara magota biaha.

²⁸ O Salomo wohingohama o kuda o Mesirino de o berera mahomoaino magetongo.

²⁹Majarita mahomoa yakorona o Salomo mamulaengoka deyaino hiädono mabaha itulihoka ma Nabi Natan aijarita mabuku magoronaka de o Ahia ai Hidodemo mabuku magoronaka o Silo manyawa, de ma Nabi Ido ai Lolega mabuku magoronaka, imanoaö o Yerobeam o Israeloka manga koano aipareta majarita.

³⁰O taongo 40 madekana o Salomo wopareta o Yerusalemoka mangale o Israel ingodumu.

³¹Ipaha ünanga wohonenge de iwilungunu o Daud ai Kotaka. Daha aingohaka o Rehabeam wodadi o Koano witagali ünanga.