Read Tobelo O EZRA 1 Bible Online

O EZRA 1 - Tobelo bible

O EZRA 1

¹ O taongo madodihiraka o Kores aipareta, o Persia ma koano, ma Jou Wadiai okianaga Waheto-hetongoka demadodagi ma Nabi Yeremia. Ma Jou wohititila o Kores ai hininga mangale wohihupu moi o pareta yabasa yamode-modekika ai popareta. Ma betongo hoko nënanga:

² ”Nenanga o Kores aipareta, o Persia makoano. Ma Jou, o Jou Madutu Wokokuaha o horogaka Wohihidadioka ngohi o dunia yamode-modekika makoano, deʼ Wohihuloko ngohi la tohigoko to Unanga Ai tau o Yerusalem mabereraka o Yehuda ai daeraoka.

³Tanu ma Jou Madutu Winïgoana ngini mata-mata nidadi Ai umati. Ngini kokiani nilio o Yerusalemika deʼ nihi gokoli ma Jou Ai Tau, o Israeloka manga Jou Madutu. Ma Jou Madutu Wogogogere o Yerusalem mabereraka.

⁴Nako naga imatengo Ai umati o tabuanga mangïoka nënanga yöparalu o roriwo layakunu yolio, done imakokukere kokiani yahidöaka o roriwo gënanga. Onanga kokiani yahidöaka onangika o haaka deʼo gurasi, o bilaono mangale o ngekomika ikali o aiwani igina-gina, deʼ ikali ihihö huba-huba mangale ma Jou Ai Tau o Yerusalem mabereraka.”

⁵De ipaha o Yehuda deʼ o Benyamin manga hoanino manga bol̄ara mahae-haeke, o imam-imam deʼ o Lewi manyawa, deʼ moi-moi o nyawa ma Jou Madutu wagogaraki manga hininga, imahidiai la yolio o Yerusalemika deʼ ihigokoli ma Jou Ai Tau.

⁶Mata-mata toönanga manga date-datekoka yoriwo deʼ yahidöaka okia honanga hokä o pakakaha o haaka deʼ o gurasi, o bilaono o ngekomika, o aiwani igina-gina, o arata mahomoahi deʼ ihihö huba-huba mangale ma Jou Ai Tau.

⁷O Kores wohihupu hagala o mangko deʼ o galahi kahuruono yapö pake-pake ma Jou Ai Tau magoronaka. O bara-baranga gënanga makoano Nebukadnezar watoraka deʼ wakelenga ai gomanga mahirete matau magoronaka.

⁸O Kores wohidöaka o bara-baranga gënanga o Mitredatika, o popareta ma arata magogoano ma haëke. De ipaha o Mitredat wohitulihi o bara-baranga dewohidöaka o Sesbazarika, o Yehuda manga gubernur.

⁹Nenanga yatuli-tulihuku: o mangko o gurasi mangale ihihö huba-huba maupacara — 30 mangale ihihö huba-huba maupacara — 1.000 o mangko mahomoa — 29 o mangko o gurasi mahohumujuru — 30 o mangko o haaka mahohumujuru — 410 o pakakaha mahomoa — 1.000

¹¹I ngodumu mangöe 5.400 o mangko o gurasi deʼ o haaka de inoli o bara-baranga mahomoa. Mata-mata gënanga o Sesbazar wao maöraha ünanga deʼ o tabuanga manyawa mahomoa imä jobo o Babil deyaino yodumutu o Yerusalem mabereraika.