Read Tobelo O EZRA 3 Bible Online

O EZRA 3 - Tobelo bible

O EZRA 3

¹O mede matumidoka, o Israel manyawa yogogere itiaioka toönanga manga kotaka moi-moi. O wange moioka o mede gënanga önanga imatoomu o Yerusalemoka

² daha o Yesua o Yozadak aingohaka de ikali ai dodiawo o imam-imam deʼ o Zerubabel o Selatiel aingohaka de ikali ai roriadodoto, ihigokoli o Israeloka manga Jou Madutu Ai huhuba mangi. De hoko gënanga önanga yakunu yatuhuku o huhuba toena mal̄okuoka, imamoteke de o hidumutu watö tuli-tulihi o Musa ma Jou Madutu Ai gilaongo Ai tita mabuku magoronaka.

³ Ngaroko önanga yämodongo o berera madutuika gënanga, mä önanga kahigoko o huhuba mangï gënanga ihira-hira marioil̄e. Daha önanga yomulaenge ihihubali o huhuba yatö tuhu-tuhuku, o ngorumino deʼ o bimaoa.

⁴ Onangö ihirameoli wange ma Amoko, imamoteke de yatätatoroka; deʼ o wange ihigetongo ihihuba o huhuba ihi tatapuoka mangale o wange gënanga.

⁵ Mahomoa de gënanga önanga dema datoro ihihuba o huhuba yatö tuhu-tuhuku de ikali o huhuba o Mede ma Hungi ma Wange ma Amokoka, deʼ mata-mata o wange ma amoko mahomoa yadodiai mangale iwihuba ma Jou. Onangö ihihuba ihihö huba-huba de manga hininga mahuka ma Jouika.

⁶Ngaroko ma Jou Ai Tau yomulaengowahi ihigoko, mä o wange moioka o mede matumidoka o kawaha yomulaengoka yatuhuku o huhuba mangale ma Jou.

⁷O kawaha yotulungu o tiwi layahihewa yomehe-mehele deʼ o tau yododiai. Onango ihidingoto o inomo, o akere yaoke-okere deʼ ikali o zaitun maminya o Tirus deʼ o Sidon makotaika, la ihi tagali de o Libanon maliwewuru magota o kota-kotaino gënanga. O gota gënanga yao o Yafoika yatiläkuru o ngöto. Mata-mata gënanga o kawaha yakarajanga wahigumal̄a o Kores, o Persia makoano.

⁸Done o mede mahinotoka o taongo mahinoto magoronaka, ipahaika o Israeloka yolio o Yerusalemika, yomulaenge önanga ihigokooli ma Jou Ai Tau. O Zerubabel, o Yesua deʼ toönanga manga dodiawo o hoana de o berera moi, o imam-imam, o Lewi manyawa, o demo madipoko mata-mata manyawa yototabuangoka, yonïki yokarajanga. Hagala o Lewi manyawa manga umuru o taongo monaoko de ihikail̄e yögoana makarajanga ihigoko ma Jou Ai Tau gënanga.

⁹Done o Yesua, o Lewi manyawa gënanga, deʼ ai ngoha-ngohaka deʼ ai roriadodoto deʼ o Kadmiel o deʼ ai ngoha-ngohaka (o Hodawya ai bol̄ara) kamamoi yogoana ma karajanga ihigoko ma Jou Ai Tau gënanga. O Lewi manyawa o Henadad ai bol̄arino yariwo önanga.

¹⁰ Maöraha yokö karajanga o tau yomulaenge yakelenga ma Jou Ai Tau mapandasi, o imam-imam yapake o juba deʼ imahijöino o trompet imahilingiri manga ngï moi-moi. Hagala o Lewi manyawa o Asaf ai bol̄arino o imaokoino genangokadau deʼ imahijöino o lihanga mahohumujuru. Onanga iwi higogiriri ma Jou imamoteke deo datoro ihigogeroka kademadero makoano Daud ai öraha.

¹¹ O kawaha ihi nyanyi o higiriri ma Jouika de inoli yogogilio mahidoku mabaha hoko nënanga mabetongo, ”Ma Jou gënanga yaoa deʼ Ai dora o Israelika ikakali kahiado-adonika.” Yongodumu o kawaha ihimoteke youlili deʼ iwi puji ma Jou, hababu ma Jou Ai Tau mapandasi yakelengaka.

¹²Manga ngöe o imam-imam manga hidogoronaka, o Lewi manyawa deʼ o hoana mahäe-häeke manga umuru ikokurutil̄eoka yamake-makeoka ma Jou Ai Tau ihira-hira. Maöraha önanga yahakihi yakelenga ma Jou Ai Tau nënanga mapandasi, önanga yoari yakua-kuatil̄e. Mä o nyawa mahomoa yohima-himangino genangokadau youlili deyo hagaga yomorene,

¹³hiadono yakunua ihilihowono o morene maulili dema hagaga deʼ o gari. Mailingi hoko gënanga makuatil̄e, hiädono yoihene magö gurutika.