Read Tobelo O EZRA 4 Bible Online

O EZRA 4 - Tobelo bible

O EZRA 4

¹O abari hagala o nyawa yototabuangoka gënanga magogiria ihigoko ma Jou Ai Tau, o Israeloka manga Jou Madutu o Yehuda deʼ o Benyamin manyawa manga haturu yogihene.

² Hababu gënanga önanga imakamake de o Zerubabel deʼ o hoana manga hae-haeke, deyogahoko, ”Nimi higumal̄a ngomiö miniriwo hohigoko ma Jou Ai Tau nënanga, hababu ngomiö mipuji roriadodoto nia Jou Madutuika, imatero hokä roriadodoto mata-mata. Ngomi salalu mihihuba o huhuba Unangika madero o Esar-Hadon, makoano Asyur womï ao ngomi nënangino.”

³Mä o Zerubabel, o Yesua, deʼ o hoana mahäe-häeke gënanga yohaluhu, ”Ngomi miparalua tingini nia bobatumu mangale ma Jou tongomi mia Jou Madutu Ai Tau. Ngomi aha mihigoko mahirete imamoteke de o Kores, o Persia manga koano, aipareta ngomino.”

⁴Deipaha o berera manyawa yogö gogeroka madekanoka o bereraka gënanga yomulaenge yahibole o Yahudioka manga manarama de ikali yahikoki modongo hupaya imatogumu ihigoko.

⁵Onanga hibelenga o tiwi o Persia mapopareta hupaya o Yahudi manyawa manga karajanga yatätatoro gënanga uha idadi. O hali gënanga kaitaurika gila-gila imatero madekana ma Koano Kores aipareta hiädono ma Koano Darius aipareta.

⁶ Madodihirakahi ma Koano Ahasweros ai popareta, o Yerusalem deʼ o Yehuda manga haturu-haturu yotulihi o galaki mahurata.

⁷Artahsasta, o Persia manga kaisar, ai popareta okaö, idodädadi gënanga ihigalioli: o Bislam, o Mitredat, o Tabeel deʼ toönanga manga dodiawo yotulihi o hurata makoanoika. O hurata gënanga yatulihi deʼ o Aram madeno, deʼ kokiani yautioli mademo maöraha yabasa.

⁸O Artahsasta watarimali o hurata mangale o Yerusalem. O hurata gënanga wohidingoto ma Gubernur Rehum deʼ o Simsai masekretaris propinsi deʼ yörigao toönanga manga dodiawo, enagënanga o haki-hakimi deʼ mata-mata o Persia mapegawe mahomoa manga ahali o Erekh, o Babil, deʼ o Susanino o Elam mabereraka,

¹⁰de ikali o hoana deo berera mahomoa watora-torakoka o Asnapar Womo Mulia deʼ wähuloko yogogere ihigila o Samaria makotaka deʼ o kota-kota mahomoa o Efrat o Wange madumuniha mapropinsi.

¹¹Hoko nënanga mabetongo o hurata gënanga, ”Mahimanga ma Koano Artahsastaika, ani gogilaongoka de yaino jou Koano migö gogogere o Efrat o Wange madumuniha. Tabea.

¹²Tanu Jou Koano Nohiöriki, o Yahudi manyawa yamal̄a-mal̄aka o daera-daera mahomoa Jou Koano ani popareta magoronaka, oraha nënanga yogogere ihi gila-gila o Yerusalemoka deʼ magogiria ihigokoli o kota madorou deʼ yöigo imalawani gënanga. Onanga yomulaengoka ihigokoli mabebeno o mehele deʼ itedekanokaua aha yaböto o karajanga gënanga.

¹³Nako o kota gënanga yadadi ihigokoli deʼ mabebeno-bebeno o mehele yabötoka, maberera manyawa aha yolukoka yofangu o soungu, deo popareta mahasili aha ikuranga.

¹⁴Ani hininga maoa ngomino jou Koano deʼ mio igoua mia make jou Koano ini hirugi-rugi. Karana gënanga ngomi migahoko,

¹⁵hupaya jou Koano nähuloko yatailako o hura-hurata ipöparalu yagögogonika ani ete deani tohora jou Koano. O hurata magoronaka jou Koano aha nohioriki o Yerusalem makota igoungu yöigo imalawani deʼ kahuruoninohi salalu yahirugi o kokoano deo propinsioka yopopareta. Maberera madutu salalu ihuha yätuda. Mahababu gënanga o kota gënanga yabinahaka.

¹⁶Hoʼ ngomi mihigoungu, nako o kota gënanga yadiaioli deʼ mabebeno-bebeno o mehele ihigoko, jou Koano aha konakunokaua nakuaha o Efrat o Wange ma dumuniha mapropinsi.”

¹⁷Ma koano wohidingoto o bobaluhu nënanga, ”Mahimanga ma Gubernur o Rehumika deʼ o Simsai o propinsi masekretaris, de ikali toönanga manga dodiawo yogogogere o Samaria deʼ o kota-o kota mahomoa o Efrat o Wange madumuniha mapropinsi. Tabea.

¹⁸O hurata nihi dingo-dingoto o roriadodoto yautioka mabetongo deʼ ihidabasaka ngohiino.

¹⁹Detongohi ahi pareta önanga yatailakoka, deʼ igoungu itiai kahuruoninohi o Yerusalem salalu yalawani o kokoano manga kuaha demaberera manyawa manga hidogoronaka manga ngöe yolawa-lawani deʼ yododiai o huru-hara.

²⁰Mamoi iböto o kokoano yokua-kuata yopareta dokengoka deʼ yakuaha mata-mataika o Efrat o Wange madumuniha mapropinsi de ikali yofangu o soungu deʼ o ngasi.

²¹Hababu gënanga, nihihupu o pareta la nia togumuku o nyawa geönanga manga karajanga, hupaya o kota gënanga uha ihigokoli hiädono ngohi tohidöaka o pareta mahomoa.

²²Niadiai ahi pareta gënanga dema japati hupaya uha idogo ilamokoli ahi rugi!”

²³Artahsasta ai hurata gënanga iwi dabasaoka o Rehumika deʼ iböto, o Simsai deʼ toönanga manga dodiawo dema japati, imajobo o Yerusalemika deʼ yä pakisa o Yahudi manyawa yatogumu o karajanga ihigokoli o kota gënanga.

²⁴ Ma Jou Ai Tau makarajanga yatogumoka deʼ ihi gila-gilaokaua hiädono o taongo mahinotoka o Darius o Persia manga Koano aipareta.