Read Tobelo O EZRA 5 Bible Online

O EZRA 5 - Tobelo bible

O EZRA 5

¹ O oraha gënanga o nabi yahinoto enagënanga o Hagai deʼ o Zakharia o Ido aingohaka, yomulaenge yotemo-temo de o Israeloka manga Jou Madutu Ai romanga o Yahudi manyawaika yogogogere o Yehuda deʼ o Yerusalemoka.

² Yoihene o nabi yahinoto gënanga manga behehongo, o Zerubabil o Sealtiel aingohaka deʼ o Yesua o Yozadak aingohaka demajapati yomulaenge ihigokoli ma Jou Ai Tau o Yerusalemoka deo nabi yahinoto gënanga yoriwo.

³Mä o Tatnai, o Efrat o Wange madumuniha mapropinsi ma gubernur kamamoi o Syetar-Boznai deʼ toönanga manga dodiawo imataiti yoboa o Yerusalemika deʼ yäleha o Yahudi manyawaika, ”O naguna winï huloko ngini nihigoko deʼ hiädono niaböto o Pupuji ma Tau nënanga?”

⁴Onanga yolehaö mata-mata yorö riwo-riwo manga romanga ihigoko ma Jou Ai Tau gënanga.

⁵Mä ma Jou Madutu Watötailako deʼ Wägoana o Yahudioka manga tutuda-tutuda gënanga, hiädono o Persia mapopegawe yaputuhu uha yäduhunu nako önanga ihi dingotowahi o hurata maKoano Dariusika deʼ yatarimaowahi mabobaluhu.

⁶Nenanga doka toönanga manga hurata ihi dingo-dingoto ma Koanoika,

⁷”Mahimanga ma Koano Dariusika. Tanu Jou Koano nopareta kairorahai!

⁸Tanu jou Koano nohioriki, ngomi mioikoka o propinsi Yehudaika deʼ mia make ihigokoli ma Jou Ai Tau, ma Jou Madutu Wo Lamo-amoko deʼ mabebeno o mehele ihilape deogota. Ma karajanga gënanga yadiai duru ihidodiai deʼ itaiti.

⁹Deipaha ngomi mialeha o hoana de o berera gënanga manga tutuda-tutuda, o naguna winihigumal̄a ngini la nihigokoli o Pupuji ma Tau gënanga deʼ hiädono nia böto.

¹⁰Ngomi mialehali toönanga manga romanga hupaya yakunu mihingahu ngonaika jou Koano o nagona dika ihi baluhu o karajanga gënanga.

¹¹Onanga yohaluhu, ’Ngomi nënanga ma Jou Madutu Wakokuaha o alami mata-mataika Ai gilaongo. Ngomi magogiria mihigokoli ma Jou Ai Tau Womatengo o Israeloka manga koano womomulia wohigoko deʼ hiädono iböto dema tao-taongo ipahaika.

¹² Mä karana tongomi mia ete de mia tohora yamomikoka ai dohata ma Jou Madutu wokokuaha o alami done Unanga wahilapahi önanga o Nebukadnezar ai kuahaika, o Babil manga koano o Kasdim madifauku. Unanga Wakilianga o Tau gënanga deʼ Wägoraka tongomi mia hoana de mia berera manyawa o Babelika.

¹³ Deipaha o Kores wodadi o Babil manga koano deʼ o taongo madodihiraka aipareta, ünanga wohihupu o pareta la ihigokoli ma Jou Ai Tau gënanga.

¹⁴Maboboloi ünanga wohigilioli hagala o pakakaha o haaka deʼ o gurasi yapake-pake ma Jou Ai Tau magoronaka deʼ wal̄ö l̄ë l̄ë ma Nebukadnezar o Yerusalemoka daha wohingohama o berhala matau magoronika o Babil matonakoka. Hagala o pakakaha gënanga ma Koano Kores wohidöaka o Sesbazarika, wigora-gorakoka wodadi gubernur o Yehuda matonakoka.

¹⁵Ma koano wihuloko ünanga wal̄ë hagala o pakakaha gënanga de wohigilio ma Jou Ai Tauika o Yerusalem mabereraka, de ikali ihigokoli o Tau gënanga.

¹⁶Daha o Sesbazar woiki o Yerusalemika deʼ wogelenga ma Jou Ai Tau gënanga mapandasi. O öraha gënanga de ihikaino hiädono o öraha nënanga o Tau gënanga igila-gila ihigoko mä koibötowahi.’

¹⁷Nako jou Koano nohigumal̄a, ngomi migahoko hupaya yatailako o Babil mapopareta mahura-hurata magoronaka. De hoko gënanga yakunu nohiöriki boteka itiai naga ma Koano Kores aipareta la ihigokoli ma Jou Ai Tau o Yerusalemoka nënanga. Deipaha ngomi migahoko o abari mangale ani putuhu jou Koano yakorona o perekara gënanga.”