Read Tobelo O EZRA 6 Bible Online

O EZRA 6 - Tobelo bible

O EZRA 6

¹Genanga de iböto de ma Koano Darius aipareta, yatailako o popareta mahura-hurata ipoparalu magoronaka yagö gogono o Babil mabereraka.

²Mä o dulihi yakorona o hali gënanga o Babil mabererakaua de yamake, duga-duga o Ahmeta makotaka o Media madaeraoka. O dulihi gënanga yatulihi o lulu moioka deʼ mabetongo hoko nënanga,

³”O taongo madodihiraka ma Koano Kores aipoparetaka, ünanga wohihupu o pareta hupaya ma Jou Ai Tau o Yerusalem mabereraka ihigokoli hokä mangï o nyawa yoao ihihö huba-huba deʼ yotuhuku o huhuba. O Tau gënanga magurutil̄e kokiani o metere monaoko de tumidi dema ngoatö o metere monaoko de tumidi.

⁴Mabebeno kokiani ihigoko hokä hoko nënanga: mahelewo o lape hange yogetongo mal̄okuoka kokiani ihitabi o lape moi o gota. Mabobangu aha o popareta yatagongo.

⁵Hagala o pakakaha o gurasi de o haakaö ya pake-pake ma Jou Ai Tauoka deʼ wa l̄ö l̄ë l̄ë ma Koano Nebukadnezar o Yerusalem mabereraka de ikali yagoraka o Babilika, kokiani ihigilio mangï ihira-hiraika.”

⁶Deipaha o Darius wohidingoto o bobaluhu hoko nënanga, ”O Tatnaika o Efrat o Wange madumuniha mapropinsi magubernur, deʼ o Syetar-Boznai, de ikali yopopegawe o Efrat o Wange madumuniha. Uha niä burakiti o Yahudi manyawa gënanga,

⁷deʼ uha nia tätatoko ihigoko toönanga manga Puji ma Tau. Niä mal̄aika o Yehuda manga gubernur deʼ o Yahudi manga tutuda-tutuda ihigokoli o Tau gënanga.

⁸Imakomoteke de nënanga ngohi tinihipareta Roriadodoto la niäriwo önanga o manarama ihigoko-goko magoronaka gënanga demadodagi hoko nënanga: Mata-mata ihigö goko-goko mabiaya yal̄ë o negara masoungino o Efrat o Wange madumuniha mapropinsioka deʼ kokiani nifangu onangika gënanga yadohu-dohukua maöraha.

⁹Mahomoa de gënanga okia dika yopöparalu imoteke o imam-imam o Yerusalemoka, o demo ma ade hokä o hapi manauru magö, o duba manauru deʼ o duba mangohaka mangale o huhuba ihihö huba-huba ma Jou Madutuika Wokokuaha o horogaka, de ikali o gandum, o gahi, o anggur deʼ o zaitun maminya, kokiani nia hidöaka onangika o wange ihigetongo de yakunua nialipä.

¹⁰Niadiai mata-mata gënanga hupaya önanga yäkunu ihihuba o huhuba yasosanangi ma Jou Madutu Wokokuaha o horogaka, deʼ hupaya önanga yogahoko o barakati mangale ngohi deʼ mangale ahi ngoha-ngohaka o nauru.

¹¹Ngohi tohipareta hupaya o nyawa yatotilakuru o pareta nënanga manga tau maliate o gahumu moi yarahuku de yatol̄omo mabarene, daha ihi hakara manga roehika gënanga hiädono itotara. Ai tau kokiani yakilianga deʼ yadiai o wal̄e mangï.

¹²Tanu ma Jou Madutu Wairi-irikoka o Yerusalem hokä o ngï iwi huba Unanga, Wä binaha moi-moi o koano ekola o hoana de o berera yobobarani yatilakuru o pareta nënanga deʼ ihitaili yakilianga ma Jou Ai Tau o Yerusalem mabereraka gënanga. Ngohi, o Darius, tohidöakoka o pareta nënanga. Niadiai nihidodiai.”

¹³Ma Koano Darius aipareta gënanga o Tatnai o Efrat o Wange madumuniha magubernur, deʼ o Syetar-Boznai de toönanga manga dodiawo yadiai duru ihi dodiai.

¹⁴ Dema nabi Hagai deʼ o Zakharia manga bobatumu, o Yahudioka manga tutuda-tutuda ihi gila-gila ihigoko ma Jou Ai Tau gënanga. Onanga imataiti yaböto ihigö goko-goko gënanga imamoteke de o Israeloka manga Jou Madutu Ai pareta deʼ o Kores, o Darius deʼ o Artahsasta manga pareta, o Persia ma kokoano gënanga.

¹⁵Ma Jou Ai Tau gënanga iböto o Adar mamede o wange mahangeoka o taongo mabutangaka ma Koano Darius ai popareta.

¹⁶Deipaha de manga morene o Israel manyawa, o imam-imam, o Lewi manyawa deʼ mata-mata yototabuanga ipahaino yatabis ma Jou Ai Tau gënanga.

¹⁷Ima dadadioka gënanga önanga ihihuba ma Jouika o hapi manauru o dutu o ratuhu moi, o duba manauru o dutu o ratuhu hinoto deʼ o duba mangohaka o dutu o ratuhu iata. Mangale o baradoha ma apongo mahuhuba, ihihuba o kabingi manauru o dutu ngimoi de hinoto, o dutu moi o Israeloka manga hoana yogetongo.

¹⁸Deipaha mangale o leleani ma Jou Ai Tau magoronaka önanga yatatoro o imam-imam de o Lewi manyawa manga doomu imoteke o datoro itö tuli-tülihi o Musa ai buku magoronaka.

¹⁹ O wange ngimoi deiatoka o taongo moioli hagala o nyawa yol̄ö lio-lio o tabuangino, ihimulia o Paskah.

²⁰O imam mata-mata deʼ o Lewi manyawa yadodiaioka manga diri madebini maupacara hiädono yapulono yotebini. Deipaha o Lewi manyawa gënanga yotoaka o aiwani-aiwani mangale o Paskah mahuhuba to imam-imam, toönanga mahirete de mata-mata yototabuangoka mahomoahi.

²¹Hagala o huhuba gënanga yaol̄omo mata-mata o Israeloka o tabuangoka de yolio-lioino deʼ o berera madutu gënanga yamo mal̄a-mal̄aoka o wowango iböbaradoha madodagi deʼ yoböa mangale yopuji ma Jouika o Israeloka manga Jou madutu.

²²O wange tumidino madekana önanga de manga morene ihimulia o Roti ma Ragi Koiwa-iwa ma Rameanga. Onanga duru yosanangi hababu ma Jou wadiaioka o Asyur makoano ai hininga imura onangika hiädono wäriwo önanga o karajanga magoronaka ihigokoli ma Jou Ai Tau o Israeloka manga Jou Madutu.