Read Tobelo O EZRA 7 Bible Online

O EZRA 7 - Tobelo bible

O EZRA 7

¹Dema tao-taongo ipahaika, maöraha o Artahsasta wopareta hokä o Persia makoano, naga o nauru womatengo ai romanga o Ezra, ma Imam wo Lamo-amoko o Harun aidifauku. Aidifauku madatoro dau de yaill̄e hokä hoko nënanga: o Ezra o Azarya o Hilkia

²o Salum o Zadok o Ahitub

³o Amarya o Azarya o Merayot

⁴o Zerahya o Uzi o Buki

⁵o Abisua o Pinehas o Eleazar o Harun ma Imam wo Lamo-amoko

⁶O Ezra o nyawa womatengo wohohakola deʼ unanga iwoe wanako mangale o Tita, ma Jou o Israeloka manga Jou Madutu Wohidoa-doaka o Musaika. Karana o Ezra ma Jou Ai Jou Madutu Wihibarakati homa koano wihidöaka unangika hagala wogaho-gahoko. O taongo matumidoka ai popareta ma Koano Artahsasta, o Ezra womagoraka o Babel de womä jobo wodumutu o Yerusalem kamamoi de o Israel manyawa o dodoomu moi enagënanga o imam-imam o doomu moi, o Lewi manyawa, yo nyä nyanyi de ikali yogoa-goana o ngorana ma ago-agomo ma Jou Ai Tauoka, deʼ yokokarajanga.

⁸Onanga yamal̄a o Babel o wange mamoi o mede mamoioka dede ma Jou Madutu Ai roriwo, önanga imahiadono o Yerusalemika o wange moioka o mede mamotoaka.

¹⁰O Ezra wodogopoaka hagala ai hohininga ma Jou Ai Titaika womau watailako, mangale wadiai ikali wädotoko hagala ihitotantu deʼ toena madatoro o Israel manyawaika.

¹¹Nenanga o hura-hurata wohidoa-doaka ma Koano Artahsasta o Ezraika, ma imam deʼ wososawaro o Tita,

¹²”Ma Koano Artahsastaoka ma Imam Ezraika, wososawaro ma Jou Madutu Wokokuaha o horogaka Ai Tita.

¹³Ngohi tohi pareta mata-mata o imam, o Lewi manyawa deʼ o Israel manyawa mahomoa ingodumu ahi poparetaka, yöigo-igo yoiki o Yerusalemika tahi gumal̄a yoiki dede ngona ahi dodoto.

¹⁴Hababu ngohi deʼ yatumidi ihi nonasihati minihuloko ngona ahi dodoto o Yerusalem deʼ o Yehudaika lana tailako nohidodiai hagala idadadi deʼ nolega-lega boteka ma Jou Madutu Ai Tita mihidoa-doakoka ngonaika ahi dodoto, igou-goungu ihingounu.

¹⁵Ngohi deʼ ihi nonasihati mimau mihihuba o gurasi deʼ o haaka o Israeloka manga Jou Madutuika, ma Jou Madutu wogögogere o Yerusalemoka. Niao tongomi mia huhuba gënanga.

¹⁶Niao oli mata-mata o gurasi deʼ o haaka ahi dodoto natotoomu o Babel yamode-modekika deʼ hagala o Israeloka de ikali manga imam-imam manga dudulungu mangale toönanga manga Jou ma Jou Madutu Ai Tau o Yerusalemoka.

¹⁷Napake o tiwi gënanga nohidodiai mangale noija o hapi manauru, o duba manauru, o duba ma ngohaka, o gandum deʼ o anggur. Nohihuba mata-mata gënanga ma Jou Ai Tau mahuhuba mangï ma l̄okuoka o Yerusalemoka.

¹⁸O haaka deʼ o gurasi mahouohi yakunu ahi dodoto deʼ ani dodiawo yakunu niapake, imamoteke de ahi dodoto ani Jou Madutu Ai mau.

¹⁹Nohidöaka ma Jou Madutuika o Yerusalem mabereraka hagala o pakakaha ihidoa-doaka ngonaika ahi dodoto mangale o pupuji ma Jou Madutu Ai Tauoka.

²⁰Deʼ hagala ipoparalu mahomoa mangale ma Jou Ai Tau, yakunu ahi dodoto nogahoko o popareta matiwi.

²¹Mata-mata ihi dodailakoika o popareta matiwi o Efrat o Wange madumuniha ngohi tohipareta hupaya okia dika wogaho-gahoko ma Imam Ezra wososawaro ma Jou Madutu wokokuaha o horogaka Ai Tita, niwihidöaka unangika itai-taiti,

²²hiädono imatero mangöe de nënanga: o haaka hiädono o kilo o ribuhu hange, o gandum hiadono o kilo 10.000, o anggur hiadono o litere 2.000, o zaitun maminya hiadono o litere 2.000, deʼ o gahi ma amoko hokä yopoparalu.

²³Niadiai duru nihidodiai niasadia hagala moi-moi wogö gaho-gahoko ma Jou Madutu Wokokuaha o horogaka mangale Ai Tau, hupaya Unanga Wohi ngamoua ekola hagala o nyawa yopoparetaika ipahaika de ngohi.

²⁴Ngini yakunua nia dotagahoko o soungu o imam-imamika, o Lewi manyawa, yonyä nyanyi, o ngorana malago-agomo magogoana, yokokarajanga, ekola o nagona dika naga ima dohanga dema Jou Ai Tau.

²⁵Ezra ahi dodoto, napake o sawaro ma Jou madutu Wohidoa-doakoka ngonaika ahi dodoto, deʼ nä goraka o tutuda-tutuda deʼ o haki-hakimi mangale yäpareta mata-mata o nyawa o Efrat o Wange madumuniha yowango imoteke Ai Tita ahi dodoto ani Jou Madutu. Kokiani ahi dodoto nädotoko o tita gënanga o nyawa mata-mataika yanö nako-nakoowahi.

²⁶Moi-moi o nyawa koihingounua hagala Ai tita ahi dodoto ani Jou Madutu, ekola o popareta matita, kokiani itaiti nähukumu yohonenge, ekola näumo, ekola na l̄ë dena tumungu manga arata ekola nä bui.”

²⁷De o Ezra wato, ”Niwihigiriri ma Jou, ma Jou Madutu iwihö huba-huba tongone nanga Jou Madutu! Unanga Wagarakioka makoano ai hininga hiädono ünanga womau watailako wohidodiai ma Jou Ai Tauika o Yerusalem mabereraka.

²⁸De ma Jou Madutu Ai roriwo ngohi wohisanangi makoano, iwinonasihati, deʼ ai popegawe yokokuaha gënanga; ma Jou ahi Jou Madutu Wohihidöakoka o barani ngohino, hiädono ngohi tohasili täbaja manga ngöe o Israeloka manga hoana mabalu-baluhu la yolio o Yerusalem mabereraika.”