Read Tobelo O EZRA 9 Bible Online

O EZRA 9 - Tobelo bible

O EZRA 9

¹Mata-mata gënanga yadiaioka deiböto o Israeloka manga balu-baluhu yaino ngohino. Onanga ihingahu o Israeloka makawaha, de ikali o imam-imam, deʼ hagala o Lewi manyawa imahitingakua manga diri de o hoana de o berera manyawa yogö gogere magilolitino gënanga, enagënanga o Amon manyawa, o Moab, o Mesir, o Kanaan, o Het, o Feris, o Yebus deʼ o Amori. Maboboloioli o imam-imam deʼ hagala o Lewi manyawa mayodiai hoko gënanga. Onanga mata-mata yodiai o manarama-manarama ipese-peseke yadodiai hagala o hoana de o berera manyawa gënanga.

²O nau-nauru o Yahudioka yokawingi de ongoheka o berera maporetino, hiädono o umati yätinga-tingakoka idadi toma Jou koitebinokaua. Yo moholoioli duru ihira yodiai gënanga ganga o balu-baluhu de o Israeloka manga popegawe.

³Toihene o hali gënanga ngohi tamao ahi hininga duru ihuha hiädono takakihi ahi pakeanga de ikali tarahuku ahi tadauru ikali ahi parahi, daha togogeruku de ahi hininga duru iwede-wederuku.

⁴Ngohi katogogeruku dika hiädono maöraha ihi huba-huba o huhuba o bimaoa. Deipaha yoboa hagala o nyawa ihi higilolitino. Onanga yohawana imahininga o Israeloka manga Jou Madutu Ai gogohara hagala o nyawaika yolio-lioka o tabuangino gënanga.

⁵Maöraha o huhuba o bimaoa yomulaenge ihihuba, o ngï ahi hininga ihuhuhaka gënanga de tomomiki deʼ ahi pakeanga makä kakihi, ngohi tohuba toma hitudukuku deʼ ahi giama itoakika ma Jou ahi Jou Madutuika.

⁶Ngohi totemo, ”Ya ahi Jou Madutu, ngohi nënanga ihi mal̄eke mangale tagoraka ahi häeke Ani himangoka. Tongomi mia baradoha dema dodoporono tongomi mia häekoka hiädono itiki o dihangil̄e.

⁷Ka demadero tongomi mia ete de mia tohora manga orahoka hiädono öraha nënanga, ngomi Ani umati mibaradoha Ngonaika. Genanga mahababu ngomi, mia kokoano de ikali tongomi mia imam-imam yähohihangoka o kokoano o berera mahomoaino. Ngomi imï toma, imï ora deʼ imï goraka imï ao hokä o dagokino. Ngomi imi hikauku kaikiriaka holi, hokä idadadi o wange nënanga.

⁸Mä öraha nënanga ya Jou mia Jou Madutu, nënanga dahao Ani hininga imura ngomiino. Yamuruono naga mia hidogoronaka hokä o gilaongo Ngona nahibebasoka la yowango kairorahai nenangoka o ngï yatinga-tingakika oka nënanga. Ngona Nomihidöaka ngomino o wowango mahungi.

⁹Maöraha ngomi kaogilaongo magoronaokahi, Ngona Nomï mal̄aua ngomi. Ngona Nadiai o Persia makokoano imïdora ngomi deʼ imihigumal̄a miwango de ikali mihigokoli Ani Tau mahou mangede-ngederokahi gënanga. Ngona nomihidöaka o hohohongo nenangokadau, o Yehuda deʼ o Yerusalemoka.

¹⁰Mä öraha nënanga, ya Jou ma Jou Madutu, hagala idadadi gënanga deiböto, okia yakunu ngomi mitemo? Ngomi mio lega ikakauali hagala Ani pareta,

¹¹Ngona nomihidoa-döaka ngomino demadodagi o nabi-nabi, Ani gogilaongo. Onanga imihingahu ngomino o tonaka kokiani ngomi miogogere gënanga koitebinua karana yongodumu matonaka madutu mabahaka dema bahaika yodiai o peseke deʼ haemo-emono.

¹² O nabi-nabi gënanga imï duhunu ngomi mikawingi mima kaganu deo nyawa geönanga, ekola miäbatumu önanga yodadi yowango okia-kiaua yokuranga deʼ kairorahai. Nako ngomi mihingounu ngomi aha idadi mikuata deʼ mia ol̄omo de miapake o tonaka gënanga mahasili deʼ tongomi mia difauku yapuhaka kahiado-adonika.

¹³Ngomi mibaradohaka deʼ mia tilakuru Ani tita, deʼ Ngona nomï hukumoka ngomi. Mä ngomi mihiöriki, yatongomi mia Jou Madutu, o hukumanga nohidöa-döakoka gënanga madubuho imateroua de kokiani ngomi mia totarima, yomoholoioli Ngona kanomi hihalamatohi ngomi.

¹⁴Hoʼ sarakia hoyakunu ko miolegaikauwali hagala Ani pareta deʼ mikawingi mima kaganu de hagala o nyawa ma dorou gënanga? Nako ngomi miadiai, maraioka Ngona aha duru nomï ngamo hiädono ngomi duru nomï wede-wederuku deʼ kamimatengö de nomï mal̄aikaua miwango.

¹⁵Jou, o Israeloka manga Jou Madutu, Ngona noadili, ngaroko hoko gënanga Ngona Nomihigumal̄a ngomi miwango. Ngomi mimangaku miahowono Ngonaika; ngomi miahaku koiwa la miohimanga Ani himangika.”