Read Tobelo O NEHEMIA 10 Bible Online

O NEHEMIA 10 - Tobelo bible

O NEHEMIA 10

¹O nyawa madodihiraka watulihi ai romanga enagënanga ma gubernur Nehemia o Hakhalya aingohaka. Ipaha winikika o Zedikia. Iböto gënanga hagala o nyawa yoturuinö nënanga yatulihi manga romanga enagënanga:

²O imam-imam O Seraya, o Azarya, o Yeremia, o Pasyhur, o Amarya, o Malkia, o Hatus, o Sebanya, o Malukh, o Harim, o Meremot, o Obaja, o Daniel, o Gineton, o Barukh, o Mesulam, o Abia, o Miyamin, o Maazya, o Bilgai, de o Semaya.

⁹Hagala o Lewi manyawa O Yesua, o Azanya aingohaka, o Binui o Henadad ai ahali manga difa uku, o Kadmiel, o Sebanya, o Hodia, o Kelita, o Pelaya, o Hanan, o Mikha, o Rehob, o Hasabya, o Zakur, o Serebya, o Sebanya, o Hodia, o Bani de o Beninu.

¹⁴O hoana manga tutuda O Paros, o Pahat-Moab, o Elam, o Zatu, o Bani, o Buni, o Azgad, o Bebai, o Adonia, o Bigwai, o Adin, o Ater, o Hizkia, o Azur, o Hodia, o Hasum, o Bezai, o Harif, o Anatot, o Nebai, o Magpias, o Mesulam, o Hezir, o Mesezabeel, o Zadok, o Yadua, o Pelaca, o Hanan, o Anaya, o Hosea, o Hananya, o Hasub, o Halohes, o Pilha, o Sobek, o Rehum, o Hasabna, o Maaseya, o Ahia, o Hanan, o Anan, o Malukh, o Harim deʼ o Baana.

²⁸Ngomi o Israeloka makawaha, o imam-imam o Lewi manyawa, ma Jou Ai Tau mangorana maamo-amoko magogoana, o musik ihi gogogule deʼ ma Jou Ai Tauoka yomomanarama, tongomi mia hekata de mia ngoha-ngohako yaoaoka yobaluhu mangale imangarati ikali mata-mata o nyawa ihingö ngou-ngounu ma Jou Madutu Ai titaika de ihitingakoka manga diri o nyawa maporetino yogogogere tongomi mia bereraka.

²⁹Ngomi mata-mata mimahidogo mia diri de tongomi mia tutuda-tutuda de mikoboto mangale miwango imamoteke ma Jou Madutu Ai Tita Wohidoakoka de madodohanga Ai gilaongo o Musa. Tanu ma Jou Madutu Womihilai ngomi nako ngomi miaganapuua o jaji nënanga. Ngomi mikoboto aha mihingounu hagala o pareta, o tita de ma Jou Ai datoro, tongomi mia Jou Madutu.

³⁰ Ngomi mikoboto mangale mikawingua o nyawa mahomoa de o hoana de o berera maporetino yogogogere tongomi mia bereraka.

³¹ Nako naga o nyawa maporetino yomau yohukunu o gandum ekola o baranga okia o ngomino o Sabat mawangeoka ekola o wange i tebi-tebini mahomoa, ngomi aha mia ijaua. O taongo ihigetongo matumidoka, ngomi aha mikarajangua o dumule de aha mio gahokua o nagimi.

³² O taongo magetongo ngomi moi-moi aha mioriwo mangale ma Jou Ai Tau mabaajanga o haaka o gram motoa.

³³Ngomi aha miasadia hagala o puji maparalu ma Jou Ai Tauoka, enagënanga: o roti ihidodiaiuku, o gandum ihihuba-huba o wangeil̄e, o aiwani mangale o huhuba itebi-tebini mahomoa, o Israeloka manga baradoha ma apongo mahuhuba-huhuba, de hagala okia yopöparalu mangale ma Jou Ai Tau.

³⁴Ngomi, o kawaha o imam-imam de hagala o Lewi manyawa, aha midiai o undi o taongo higetongo mangale mihitantu o ahali kiaka kokiani yosadia o gota ihidofo-dofo mangale o huhuba ihi huba-huba ma Jouika tongomi mia Jou Madutu, imamoteke o Torat madatoro.

³⁵ O taongo ihigetongo ngomi aha miao ma Jou Ai Tauika o gandum mahasili madodihiraka de hagala o hohoko madodihiraka iomuku tongomi mia hohoko mautu-utuoka.

³⁶ Ngomi aha mia ao tongomi mia ngohaka o nau-nauru mariaka o imam-imamika ma Jou Ai Tauoka mangale mia hilapahi ma Jou Madutuika, imamoteke de o Torat madatoro. Ngomi aha mihilapahiö tongomi mia hapi mangohaka, mia duba mangohaka ekola mia kabingi mangohaka madodihiraka imakil̄au.

³⁷ Ngomi aha miao o imam-imamika ma Jou Ai Tauoka o gopuno i peha-pehakuku o gandumino madodihiraka iutuku o taongo ihigetongo, o huhuba-huhubaö mahomoa marupa o angguru, o zaitun maminya de hagala rupa o hohoko. O huhuba o regu ngimoi o regu moi tongomi mia dumule mahasilino ngomi aha miao o Lewi manyawaika yatotoomu o huhuba-huhuba o regu ngimoi o regu moi yototumule manga kota-kotaka.

³⁸ Mä o imam manyawa womatengo o Harun ai difauku kiani wädatekuku hagala o Lewi manyawa gënanga nako önanga yotoomu o huhuba-o huhuba gënanga. De o regu ngimoi o regu moi o huhubaino mata-mata gënanga kiani yao hagala o Lewi manyawa gënanga o inomo makama-kamarika ma Jou Ai Tauoka.

³⁹O Israeloka makawaha de hagala o Lewi manyawa kiani yao o roriwo kahirahi marupa o gandum, o angguru, o zaitun maminya o inomo makama-kamarika ma Jou Ai Tau mapakakaha-pakakaha yagogogono mangï. Genangokali o imam-imam manga gögere mangï magogiria yomanarama, yogoa-goana ma Jou Ai Tau mangorana ma amo-amoko de yonyö nyanyanyi. Ngomi aha mia mal̄aikaua mia paliara tongomi mia Jou Ai Tau.