Read Tobelo O NEHEMIA 12 Bible Online

O NEHEMIA 12 - Tobelo bible

O NEHEMIA 12

¹Nenanga o imam-imam de o Lewi manyawa yolö lio-lio o tabuangino imakinïki de o Zerubabel o Sealtiel aingohaka de ma Imam Wolamo-amoko o Yesua:

²O imam-imam: O Seraya, o Yeremia, o Ezra, o Amarya, o Malukh, o Hatus, o Sekhanya, o Rehum, o Meremot, o Ido, o Ginetoi, o Abia, o Miyamin, o Maaja, o Bilga, o Semaya, o Yoyarib, o Yedaya, o Salu, o Amok, o Hilkia, de o Yedaya. Onanga ganga o imam-imam manga baluhu o Yesua ai orahoka.

⁸O Lewi manyawa: O sukur manyanyi matutuda: O Yesua, o Binui, o Kadmiel, o Serebya, o Yehuda de o Matanya.

⁹Yonyanyanyi manyawa i hinyö nyanyanyi o bobaluhu manyanyi: O Bakbuya, o Uni de ai dodiawo o ahali moi.

¹⁰Nenanga ma Imam Wolamo-amoko o Yesua aidifauku mariri: o Yesua, o Yoyakim, o Elyasib, o Yoyada,

¹¹o Yonatan, o Yadua.

¹²Nenangala mabuku o imam-imam manga baluhu de toönanga manga ahali maöraha o Yoyakim womanarama hokä o Imam Wolamo-amoko: [Ma imam] — [Ai ahali] o Meraya — o Seraya o Hananya — o Yeremia o Mesulam — o Ezra o Yohanan — o Amarya o Yonatan — o Melikhu o Yusuf — o Sebanya o Adna — o Harim o Helkai — o Merayot o Zakharia — o Ido o Mesulam — o Gineton o Zikhri — o Abia ... — o Minyamin o Piltai — o Moaja o Samua — o Bilga o Yonatan — o Semaya o Matnai — o Yoyarib o Uzi — o Yedaya o Kalai — o Salai o Heber — o Amok o Hasabya — o Hilkia o Netaneel — o Yedaya

²²Mangale o Lewi manga tau manyawa de o Imam manga tau manyawa manga balu-baluhu itulihoka o bukuku maöraha ma Imam-imam yo Lago-agomo hokä hoko nënanga: o Elyasib, o Yoyada, o Yohanan deʼ o Yadua. Madulihi gënanga iböto maöraha makoano Darius wopareta hokä o Persia manga koano.

²³Mä mangale o Lewi ai ahali manga tau manyawa manga balu-baluhu duga-duga itulihi hiädono maöraha o Yonatan o Elyasib ai danongo.

²⁴O Hasabya, o Serebya, o Yesua, o Binui de o Kadmiel manga tutuda matimioka, hagala o Lewi manyawa yaregu o doomu-doomu magoronaka. Mahigeto-getongo naga o doomu hinoto yomanarama iwi puji ma Jou de ihidöaka o sukur Unangika de madodagi imä kokabaluhu, imamoteke de ai datoro ma Koano Daud, ma Jou Madutu Ai gilaongo gënanga.

²⁵Yogögoa-goana ma Jou Ai Tau mangorana ma amo-amoko yahimanarama yogoana o bilaono makama-kamari ma Jou Ai Tau mangorana ma amo-amoko madatekoka enagënanga: o Matanya, o Bakbukya, o Obaja, o Mesulam, o Talmon deʼ o Akub.

²⁶Onanga gënanga yowango maöraha o Yoyakim o Yesua ai ngohaka de o Yozadak ai danongo magubernur Nehemia ai orahoka de ma Imam Ezra, o Tita duru wanö nako-nako gënanga.

²⁷Maöraha o Yerusalem makota mabebeno o mehele yatabisang, yäahoko hagala o Lewi manyawa hagala o ngï ino önanga yogogogere, hupaya yonïki ihirame öraha gënanga de o sukur manyanyi, de o musik o gambus de o kecapi.

²⁸Daha imatoomu yonyö nyanyanyi o Lewi ai tau manyawaino gënanga, yaoa madaera yogogogere o Yerusalem magilolitino, yaoa o kota-kotaino o Netofa magilolitino,

²⁹o Bet-Gilgalino, o Geba de o Asmawet.

³⁰O imam-imam de o Lewi manyawa gënanga yadiai toönanga manga diri ihitebini maupacara ipaha mangale o kawaha, mangale o ngora-ngorana ma ago-agomo de o kota mabebeno o mehele.

³¹Ngohi tähuloko o Yehuda manga tutuda-tutuda yodoa o bebeno o mehele mal̄okuil̄e mangale yatatoro o doomu hinoto ma ago-agomo aha imatuduono yakiloliti o kota ikali ihinyanyi o sukur mahigiriri ma Jou Madutuika. O doomu madodihiraka imatuduono o bebeno o mehele mal̄okuoka, yameta o nirakika, o Wal̄e ma Ngorana ma amo-amokika.

³²O Hosaya womadagi yonyö nyanyanyi manga poretoka, yanïki o hidoku moi o Yehudaino manyawa manga tutuda-tutuda.

³³O imam-imam yoturuino nënanga imadagi toönanga manga poretoka ikali yawuwu o trompet: o Azarya, o Ezra, o Mesulam, o Yehuda, o Benyamin, o Semaya de o Yeremia. Onanga wanikino o Zakharia o Yonatan aingohaka o Semaya ai danongo. Yamuruono naga ai ete de ai tohoraino enagënanga: o Matanya, o Mikha, o Zakur o Asaf ai ahalino.

³⁶Ai poretoka imadagi ai ahalino manyawa, enagënanga: o Semaya, o Azareel, o Milalai, o Gilalai, o Maai, o Netaneel, o Yehuda de o Hanani. Onanga mata-mata yao o musik mapakakaha, kaimatero de wohigogogogule ma Koano Daud ma Jou Madutu Ai gilaongo gënanga. Ma Imam Ezra, ma Jou Madutu Ai Tita wanö nako-nako gënanga, womadagi o duduono mahima-himangoka gënanga.

³⁷Imahi adonika o Akere ihaharu ma Ngorana ma Amo-amokoka önanga imaleboto de yadoa o Daud ai Kota mangute, yatilakuru o Daud ai kadato, daha imaidulu o bebeno o mehelika o Akere ma Ngorana ma Amo-amokoka o kota o wange mahiwaroko idaduoka.

³⁸Yonyö nyanyanyi manga doomu moioli imatuduono o bebeno o mehele ma l̄okuoka yameta o higilika, de ngohi tä nïki mimakao de o kawaha o hidoku moi. Ngomi mimatuduono mia tilakuru o Menara ma Uku-ukuoka hiädono o Bebeno o mehele ma Ngoa-ngoatika.

³⁹Daha ngomi mianonu o Ngorana ma Amo-amoko o Efraim, o Ngorana ma amo-amoko ma Deka-dekanuku, o Nawoko ma Ngorana ma Amo-amoko, o Hananeel ma Menara de o Mea ma Menara hiädono o Duba ma Ngorana ma Amo-amokika. Tongomi mia duduono imatogumu o Gogoana ma Ngorana ma Amo-amoko madatekoka ma Jou Ai Tau madatekoka.

⁴⁰Done imahiädono o doomu hinoto yonyanyanyi gënanga ma Jou Ai Tau madatekoka. Mahomoa o tutuda-tutuda ahi doomu magoronaka,

⁴¹yonikö o imam-imam yowo wuwuwu o trompet. Onanga ganga: o Elyakim, o Maaseya, o Minyamin, o Mikha, o Elyoenai, o Zakharia de o Hananya;

⁴²önanga manga porete yanikino o Maaseya, o Semaya, o Eleazar, o Uzi, o Yohanan, o Malkia, o Elam, de o Ezer. Yonyö nyanyanyi yonyanyi o Yizrahya ai tutuda ma timioka.

⁴³O wange gënanga o huhuba mangöe ihihuba ma Jouika. O kawaha yomorene karana ma Jou Madutu Wadiaioka önanga youtumu. O ngongoheka de o ngoha-ngohako yonïki yorameanga, de toönanga manga ilingi manga morene makuatil̄e hiädono magurutika makaho ihene.

⁴⁴O öraha gënanga o nyawa yamuruono naga yahimanarama yogoana o inomo makama-kamari mangï yogogogono o roriwo-roriwo mangale ma Jou Ai Tau, idogoika o huhuba o regu ngimoi o regu moi, de o tonaka mahasili madodihiraka o taongo ihigetongo. Yogoa-goana gënanga kokiani yatoomu o roriwo-roriwo gënanga o dumule-dumuleino o kota magilolitino, o roriwo-roriwo gënanga ihilapahi o imam-imamika de o Lewi manyawa imamoteke de o Torat madatoro. O Yehuda manyawa yahoromati o imam-imam de o Lewi manyawa gënanga,

⁴⁵ karana önanga yadodiai o debini maupacara de o upacara-upacara mahomoa Wohipoparetaka ma Jou Madutu. O musik ihi gogogule de ma Jou Ai Tau mangorana ma amo-amoko magogoano yadiai toönanga manga manarama-manarama, imamoteke de manga datoro ma Koano Daud de aingohaka o nauru o Salomo.

⁴⁶Ma Koano Daud ai orahoka de o Asaf o musik wanö nako-nako, yonyö nyanyanyi ihi nyanyioka o sukur mahigiriri manyanyi ma Jou Madutuika.

⁴⁷O Zerubabel ai orahoka de ai orahokaö o Nehemia, o Israeloka makawaha yongodumu ihidöaka o huhuba mangale ihitotomo manga paralu mawangeil̄e yonyö nyanyanyi de yogoa-goana ma Jou Ai Tau mangorana ma amo-amoko. O kawaha ihi döaka o huhuba ihi tinga-tingakoka o Lewi manyawaika de o Lewi manyawali ihidöaka o imam-imamika o hidoku ihi tatantuoka.