Read Tobelo O NEHEMIA 2 Bible Online

O NEHEMIA 2 - Tobelo bible

O NEHEMIA 2

¹O wange moiuku, o mede iata ipaha, enagënanga o Nisan mamedeoka, maöraha ma Koano Artahsasta magogiria wol̄omo, ngohi tihidöaka o angguru unangika de ahi bionoka ihuha. Komamoi uahi ngohi ahi bionoka ihuha ai himangoka hokä o wange gënanga.

²Hababu gënanga ünanga wohileha, ”Yadodoa ngona honi lega-lega hoko gënanga ani hininga ihuha ena hioko nopanyakeua? Maraioka naga okianaga moi ngona ani hininga yahuha.” Ngohi ihi todokana,

³ daha tohaluhu, ”Nowango Jou Koano mangale kahi ado-adonika! Sarakia ngohi ahi hininga ihuhaua, nako o kota tongohi ahi ete de ahi tohora manga lungunu mangï öraha nënanga igogogere kama gogiliangokahi mata-mata de mangorana ma ago-agomo iwederoka youku.”

⁴Ma koano woleha, ”Hoʼ okia noigo?” Ahi hininga magoronaka ngohi toma niata ma Jou Madutuika Wokokuaha o horogaka,

⁵daha ngohi totemo makoanoika, ”Nako Jou Koano ani hininga yadaene de nomau natarima tongohi ahi gogahoko, nohihuloko ngohi o Yehuda matonakika mangale tohigoko okali o kota ahi ete de ahi tohora manga lungunu mangï.”

⁶Daha makoano magogiria wogogeruku midatekuku ma Jou Boki, watarima ahi gogahoko. Unanga wohileha hokokia madekana ngohi aha togogere dokengoka de muruonoka tolio, done tohingahu unangika mawange tohi totatantuoka.

⁷Ipaha ngohi togahoko o hurata mangale o gubernur-gubernur o Efrat o wange ma Dumuniha mapropinsioka, hupaya önanga ihihi gumal̄a ahi dodagi hiädono o Yehudaika.

⁸Mahomoa de gënanga, ngohi o togahoko o hurata mangale o Asaf, o pareta mahongana magogoana, hupaya ünanga wosadia o gota mangale o bebeno o mehele mangorana maamo-amoko ma Jou Ai Tau madatekoka, de mangale o kota mamehele ikali o tau aha wogogogere. Makoano wohitotomo mata-mata ahi gogahoko gënanga, karana ma Jou Madutu wohï riwo ngohi.

⁹Mimakinïki de o tentara manga baluhu yamuruono naga de o tentara o kuda yobare-barene, mangale makoano aipareta ihi nïki, ngohi tomä jobo o Efrat o wange madumuniha. Dokengoka makoano ai hurata gënanga tohi ädono o gubernur-gubernurika.

¹⁰Mä maöraha o Sanbalat, o Bet-Horon manyawa, de o Tobia, womatengo o pangkati o Amonino, yoihene ngohi toboa mangale o Israeloka manyawa manga paralu, önanga idadi duru yosanangua.

¹¹Ngohi tomahiädono o Yerusalemoka, daha tomahi batongo o wange hange.

¹²Madekana gënanga ngohi tohingahuua o nagonaikaö ma Jou Madutu Wohihidoaka o hidumutu ngohino mangale tohigokoli o Yerusalem makota. Iyarehino o hutu-hutui nongohi tomomiki daha tahigaro ahi dodiawo yamuruono naga mioiki o kota maporetika. Mahomoa de o keledai tobö bare-barene, ngomi miaoua o aiwani mio bare-barene mahomoa.

¹³O wange kai hohuhutuohi, maöraha ngomi mia mal̄a o kota mia nonu o Wai ma Ngorana ma Amo-amoko o wange ma dumuniha. Ngomi mio dumutu mameta o koreharail̄e, o Wale ma Ngorana ma Amo-amoko, mianonu o Naga ma Jobubu. Mia dodagi gënanga magoronaka ngohi tatailako magogilianga o kota mabebeno o meheloka deʼ tamakeoli ma ngora-ngorana ma ago-agomo i mamataka youku.

¹⁴Ipaha o wange mahiwaroko idaduoka tongomi mia kota gila-gila o koremieuku, o Akere ma Heli-heli ma Ngorana ma Amo-amokika de ma Koano ai Lupungu. Mä genangoka koiwa naga o ngï mangale o keledai tobare-barenuku gënanga yaboa, karana duru iwoë holi madoropaha.

¹⁵Hoʼ, ngomi miuti o Kidron ma Wai ika de mihi gila-gila mia dodagi o hutu gënanga, ikali mia tailako o kota mabebeno o mehele. Iböto gënanga ngomi mima leboto deʼ milio o kotaika mia nonu o Wai ma Ngorana ma Amo-amoko.

¹⁶Moiua o o kawaha manga balu-baluhino ihi öriki kiaika ngohi toiki, deʼ okia magogiria tohidatoro. Hababu hiädono öraha gënanga ngohi okia-okiaua ngohi tatemo hagala o nyawa mima kohoana moika yaoa o imam-imamika yaoa o balu-baluhika, ekola o pegawe-pegaweika, de o nagona dika aha yonïki ihi goko o Yerusalem makota.

¹⁷Mä ipaha ngohi tatemo onangika, ”Nio lega tongone nanga hangihara nënanga! O Yerusalem igogogere magogilianga de mangora-ngorana ma ago-agomo youku yamataka. Niaino ngone hohi gokoli o Yerusalem makota mabebeno o mehele hupaya ngone inahikauku okauaoli.”

¹⁸Ipaha tohi ade-ade onangika sarakia ma Jou Madutu wohï riwo de okia makoano wotö temo-temoka ngohino. Onanga yohaluhu, ”Niaino ngone homulaenge hohi goko!” Daha önanga kaimahi dodiai mangale mulaenge yokarajanga.

¹⁹Maöraha tongomi miadatoro gënanga ihi öriki o Sanbalat, o Tobia de o Gesyem, womatengo o Araboka, önanga imigogiete de imihohedu ngomi. Onanga yato, ”Okia nimau ngini nidiai? Bote ngini nimau niwi lawani makoano?”

²⁰Ngohi tohaluhu, ”Ma Jou Madutu woko Kuaha o horogaka aha wadiai tongomi mia manarama ihasili. Ngomi ganga Ai gogilaongo de ngomi aha mimulaenge mihigoko. Mä ngini nia hakua ekola kia-kiauaö o Yerusalemoka. I goungu nako o nyawa ihi ade-ade mangale o Yerusalem, nia romanga aha yaheto-hetongua.”