Read Tobelo O NEHEMIA 4 Bible Online

O NEHEMIA 4 - Tobelo bible

O NEHEMIA 4

¹Maöraha o Sanbalat woihene ngomi o Yahudioka manyawa magogiria mihigokoli o kota mabebeno o mehele, ünanga idadi duru wongamo de mulaenge womihohedu ngomi.

²Ai dodiawo de o Samaria manga tentara manga himangoka, ünanga wato, ”O Yahudioka manyawa o dorou okia magogiria yodiai okia-kiaua yakunua gënanga? Boteka önanga yomau ihigoko okali o kota nënanga? Onanga yatobote o manarama nënanga yakunu iböto o wange moi magoronaka, duga-duga de o huhuba ihi huba? Boteka youku-ukuoka mawal̄e madoporono gënanga önanga yakunu ihidadi hagala o bebeno o mehele mahelewo?”

³Daha o Tobia womaokoino ai datekoka wotemoli, ”Nio lega o bebeno o mehele önanga ihi goko-goko! O kaho o honganikaö ma yakunu yaruba!”

⁴Daha ngohi tomä niata, ”Ya Jou Madutu, Noihene sarakia ngomi imihikauku! Nahitapal̄u o hikauku gënanga toönanga manga häeke mal̄okuoka mahirete. Mal̄aika hagala toönanga manga kiahonanga yaora de önanga mahirete yäao hokä o dagokino o berera mahomoaika.

⁵Uha Nahi apongo toönanga manga dorou de uha Nawohanga toönanga manga baradoha, hababu önanga imihi kaukuoka ngomi magogiria mihi goko nënanga.”

⁶O öraha utu gënanga ngomi gila-gila mihigoko okali o bebeno o mehele gënanga, de itedekanua ipahaika o bebeno o mehele ingodumu gënanga iböto mihigoko okali hiädono i togoronaino magurutil̄e, hababu o kawaha yomanarama de manga kuata itototomo.

⁷Maöraha o Sanbalat, o Tobia de hagala o nyawa o Amonino de o Asdod ikali hagala o Arab manyawa yoihene o Yerusalem mabebeno o mehele ihigoko okali gënanga i holoi itagi mahimangika deʼ ipida-pidaha o bebeno o meheloka mulaenge yatamunoka, önanga idadi duru yongamo.

⁸Onanga imahikaturu yomau yaparangi o Yerusalem mangale ihipuda o ruäe.

⁹Karana gënanga ngomi mima niata tongomi mia Jou Madutuika de miogoana o kota gënanga o hutu de o wange.

¹⁰Mä o Yehuda manyawa mulaenge ihi nyanyi o daiana manyanyi nënanga: ”Tongomi mia kuata imata mangale mia goraka o gina, ena hioko o wal̄e kohangoëohi itotoporono. Hamao hakunua ngone homanarama hoko nënanga hohigoko o kota o bebeno o mehele nënanga.”

¹¹O öraha utu gënanga tongomi mia haturu ima hikadatoro mangale imiparangi ngomi de madodagi imi hitodokanino, daha imitoma ngomi hiädono tongomi mia manarama itogumu.

¹²Mä o Yahudi manyawa yogo gogogere toönanga manga datekoka, ihi gali-gali yoboa ngomino mangale ihingahu mia haturu manga datoro gënanga.

¹³Hababu gënanga ngohi tahikodoku o oworo, o kuama de o toimi o kawahaika, daha tahi gogere önanga imamoteke manga ahali moi-moi o bebeno o mehele maporetoka, o ngï-ngï i bobotuahi mihigoko.

¹⁴Maöraha tä make o kawaha yohawana, ngohi tatemo onangika de ihi balu-baluhika ikali o tutuda-tutudaika, ”Uha niä modongo o haturuika! Niwihininga ma Jouika Wokö kua-kuata deʼ himö modo-modongo, deʼ niparangi mangale nia roriadodoto, nia ngoha-ngohaka, nia heka-hekata de nia tau!”

¹⁵Tongomi mia haturu-haturu yoihene toönanga manga datoro ngomi mihiorikoka. Done önanga imamao ma Jou Madutu wakiliangoka toönanga manga datoro gënanga. Ipaha ngomi mata-mata mimanaramokali mihigoko o bebeno o mehele gënanga.

¹⁶Mä mulaenge o wange gënanga duga-duga mahononga ahi nyawaino yomanarama, hoʼ de mahonongali yogoa-goana de imahi noauku o pakeanga ihipoparangi de imahi dae o kuama, o dadatoko de o toimi. O kawaha manga tutuda-tutuda yahiboa itototomo o kawahaika

¹⁷magogiria Ihigoko o bebeno o mehele gënanga iyamö moku-moku o tau mapakakaha yadiai o karajanga gënanga de manga giama moi, hode manga giama mahomoa imajoika o dae.

¹⁸Yomo mehe-mehele yomanarama de imahi likoino o oworo manga goronaino. O trompet yawuwu manonako o bahaya, naga hoko genangika ahi datekoka.

¹⁹Daha ngohi tatemo o kawahaika, o balu-baluhu de o tutuda-tutudaika, ”O manarama nënanga ma amokika hiädono mahoana magurutika, hiädono ngone hodogerewoto o bebeno o mehele magurutu nënanga, imatengo yokurutika de mahomoa.

²⁰Ho, nako ngini ni ihene o trompet mailingi, nima toomu itaiti nimi higilolitino ngomi nenangoka dau. Tongone nanga Jou Madutu aha Woparangi mangale ngone.”

²¹Hoko gënanga ngomi mimanarama mulaenge kai hohuhutuohi hiädono o muru-murumu hamake o dihangoka. O kawaha mahononga ihigokoli o bebeno o mehele, maʼ mahomoa ima goa-goana de o kuama manga giamoka.

²²Madekanino o öraha gënanga mata-mata yomomanarama de toönanga yaro riwo-riwo, tahuloko imä idu o Yerusalemoka. De hoko gënanga mahutuku ngomi yakunu mio goana o kota de o wangeoka mihigoko mabebeno o mehele.

²³Ngohi mahirete, ahi dodiawo-dodiawo, ahi nyawa de ahi gogoana hoko genangika imahinoauku o pakeanga ihi kokarajanga, yaoa o wangeoka yaoa o hutu-hutu. Ngomi kahoko genangika kamima goa-goana, de o dae mia giamoka.