Read Tobelo O NEHEMIA 5 Bible Online

O NEHEMIA 5 - Tobelo bible

O NEHEMIA 5

¹O öraha muruono naga ipaha o Yahudi manyawa manga ngöe, yaoa o nauru yaoa o ngoheka, mulaenge yotaiana mangale hagala o nyawa imakohoana moi.

²Naga yotemo, ”Ahingohaka manga ngöe. Ngomi miparalu o gandum mangale miwango.”

³Nagali yotemo, ”Ngohi pakisa tohidodanu ahi dumule, o angguru madumule de tongomi mia tau mangale mimahija o gandum hupaya uha o hahini mihi honenge.”

⁴De nagali yotemo, ”Ngomi mibauoka o tiwi mangale mihi fanguoka miasoungu mangale makoano wohito tatantu mangale miadumule de tongomi mia angguru madumule.

⁵Koigoungua ngomi o Yahudi manyawa? Koigoungua tongomi miangohaka kaimatero de o Yahudioka mahomoa manga ngoha-ngohaka? Ngaro hoko gënanga ngomi pakisa mia mal̄aika tongomi miangoha-ngohaka yodadi o gilaongo. Igoungu naga miangohaka o moholehe mia hukunoka yodadi o gilaongo. Ngomi mimasikaokaua karana miadumule de tongomi mia angguru madumule ngomi mihigadeoka.”

⁶Toihene toönanga manga daiana gënanga, ngohi duru tongamo

⁷ de taputuhu mangale tadiai. Daha tataaere o balu-baluhu de o kawaha manga tutuda. Tato, ”Ngimi Mahirete niä tuku nia roriadodoto!” Ipaha ngohi todiai o rapat mata-mata mangale tadiai mahirete o hali gënanga

⁸deʼ totemo, ”De tongone nanga kuata magahumu hatuhukoka tongone nanga roriadodoto o Yahudioka manyawa pakisa yahukunu manga diri o nyawa maporetinoika. Mä o öraha nënanga ngini nënanga koaho niapakisa önanga yahukunu manga diri nginika, ena hioko nginiö o Yahudi manyawa!” O tutuda-tutuda gënanga yakunua yohaluhu o demo kaodoaka moioma.

⁹Daha totemoli, ”Niamanarama gënanga itorou! Kokiani ngini niwango deʼ niamao o modongo ma Jou Madutuika. De hoko gënanga tongone nanga haturu koö iwa-iwa manga jou gënanga nihidoakua o öraha mangale inahikauku ngone.

¹⁰Ngohi mahirete, ahi roriadodoto de ahi dodiawo mia hibauoka o tiwi de o gandum o kawahaika. Ngomi aha mio gahokua ihigilio.

¹¹Kokiani nginiö nia hihangoka o kawaha managimi-nagimi nginika gënanga, yaoa marupa o tiwi, ekola o gandum, yaoa o angguru ekola o zaitun maminya. Nihigilio itaiti manga dumule, manga angguru madumule, manga zaitun madumule de toönanga manga tau!”

¹²O tutuda-tutuda gënanga yohaluhu, ”O nasihati gënanga aha ngomi miamoteke. Ngomi aha mihigilio mata-mata de aha okia-kiaua miogahoko mabobangu onangino.” Daha taahoko o imam-imam de tahuloko o tutuda-tutuda kangano yokoboto o imam-imam gënanga manga himangoka, okia önanga yaheto-hetongoka gënanga, igou-goungu aha önanga yadiai.

¹³Ipaha tahohe ahi hilehebutu ahi goronaino daha tahurero ikali totemo, ”Hoko nënanga kokiani ma Jou Madutu Wahurero moi-moi o nyawa wohiganapua ai jaji. O nyawa gënanga aha yomularati, ai tau de hagala ai arata aha Wal̄e ma Jou Madutu!” O nyawa yongodumu yohaluhu, ”Amin!” daha iwi higiriri ma Jou. Daha o tutuda-tutuda gënanga ihi ganapu toönanga manga jaji.

¹⁴Ngohi todadioka o Yehuda manga gubernur o taongo ngimoi de hinoto madekana, enagënanga mulaenge o taongo mamonaokoka de yaino hiädono o taongo mamoruange de hinotoka aipareta ma Koano Artahsasta. O öraha madekanino gënanga ngohi de ahi roriadodoto komaiwahi mia l̄e ahi gaji madogo hokä o gubernur.

¹⁵Hagala o gubernur kowahi de ngohi, idadioka manga momoku mangale o kawaha hababu önanga yadotagahoko o wange moi o tiwi o haaka moruata mangale manga inomo de o angguru. Koaholi, toönanga manga pegawe-pegawe o yätuku o kawaha. Mä ngohi toluku todiai hoko gënanga karana ngohi timodongo ma Jou Madutuika.

¹⁶Hagala ahi kuata todapadioka o bebeno o mehele mihi goko-gokoika de ngohi tamakeua o tonaka kama huhutulo mä hokä magiliorino, ngaroka mata-mata ihi riwo-riwo yonïki yomanarama o pembangunanoka gënanga.

¹⁷Yaratuhu moi de yamoritoa o Yahudi manyawa de toönanga manga balu-baluhu biaha tahi ol̄omo ahi tauoka, i etonguahi o tamu-tamu o hoana de o berera ngomi mima kokadateke.

¹⁸O wange higetongo tasadia mangale ahi biaya mahirete o hapi o dutu moi, o duba dutu butanga maboburere de o kuru-kuru kohangöe. Madatekoka gënanga, o wange ngimoi magetongo tangodumu tasadia ahi angguru. Ngaro hoko gënanga ngohi toluku todotagahoko o gubernur mapangkati magaji madogo, karana ngohi tohi öriki o kawaha manga momoku yaoaka madubuho.

¹⁹Ngohi togahoko ya Jou Madutu, Nohininga hagala tadodiaioka mangale o hoana nënanga de Nohihi barakati ngohi.